Библиотека литературы Древней Руси. Том 16 (XVII век)

Благослови, отче.

Божия некия тайны, великаго его человеколюбия немало пред нашим родом знамения явлена быша. Светлейша же и образнейша явишася в наша лета, ихже мнози самовидцы быша вси, елико нас обретшиися в сей приморьстей стране. Сих же повести не лепо есть молчанию предати, неправедно бо есть Божих тайн в забвении глубоце покрывати.[4457] Зане елико могу, толикоже некако о божественных явлении покушуся глаголати. Присно бо иже нас ради и нашего ради спасения сшедый с небес Сын Божий и Богь, воплотивыйся от Пречистыя Девы Марии, и пострадавый нас ради, и воскресе в третий день, и вознесеся на небеса, и седе одесную Бога и Отца. Мати же его, Пресвятая Приснодева Мария, яже великому божественному его воплощению послужити сподобися, сущи воистинну Богородицы бывши, и именуема, и славима, яко воистинну сущи Бога нашего Мати. Еще же ей на земли пребывание творящи с сущими всегда святыми ученики и апостолы своего ея Сына и Бога. Един же от тех, присно поминаемый апостол, евангелист Лука, емуже похвала во Благовестии Христове, всяку премудрость и наказание извык, еже живописати. И написа на дсце начертанием шаровным[4458] образ самыя Пресвятыя Владычицы нашея Богородицы и Приснодевы Марии, и изрядное видение тоя уподобив опасно[4459], и приносит к первообразному тоя, Госпоже Царице. Она бо очи свои возложивши на ту и своего пророчества воспомянувши, егоже изгласи, Бога зачинающи: «Се отныне блажат мя вси роди!» Возрадовав же ся и глаголет к тому благоговейне и со властию: «Благодать моя с тобою».[4460] И бысть слово и дело, вскоре иконе спребываяй вечно чюдеса, и знамения, и тмы чюдотворения пречестно содеющи иконе Божия Матере, и образ, и глас, и всяк ум превосходящия благодать во вся роды и роды. Такоже и в божественнем преставлении своем на небеса к Сыну своему и Богу нашему обещася назирати мир свой милостию своею.

И тако, якоже обещася, милует, заступающи, всех православных, исповедающих ея сущую Богородицу, и во всяком месте призывающих святое имя ея, всех моления исполняющи. Присно же паче в сей Росийстей стране новых людей своих милостивно назирает, различныя милости своея на них богатно изливающи и всяко место своею милостию посещающи. И сего ради от всех присно славима на всяком месте, и не обрящет никтоже никоего места: ни града, ни веси, ни монастыря, ни в просте живущих людей, в нихже несть Богородичны церкви. По всей бо земли, идеже Божия слава проповедана бысть, ту и рождшая его хвалима есть и славима. Паче же всех месть сия великая Росийская страна имееть изряднее[4461], еже толицеми церквами Богородичными освящатися честне, и божественне, и верне славити святое имя ея, и тоя выну[4462] имети спасение, и стену, и забрало. Сия же силою своею озаряет и просвещает, темже и вси отнюд святители же, и царь, и того повинницы, сановитии же, и безсановитии, и простым житием живущии о всякой вещи радостне по различных чюдотворных местех к Богу и к Богородицы пририщут, о всякой печалной вещи молящеся, и тягость печали отлагают. Оставлю убо число неисчитаемое от нея бывающих чюдес и целеб от различных недуг, да не ослабею недоведением на вящая повести.

О МЕСТЕ ЧЕРНЫЯ ГОРЫ

Есть же убо о сем страна некая великия Росии, Двинская нарицаема, прилежащая краем Великаго моря окияна, по немуже и корабли приходят от Западных стран в Росию, идеже великая река Двина вмещается в нем. Есть же и предел тоя же Двинския области, река, нарицаемая Пенега, впаде в ту же великую реку Двину. Имат же и сия река многия веси по себе, продолжающися яко на пятьсот поприщ.[4463] Есть же убо, прилежащи краем к реце той, гора некая велика и превысока зело, Черная наричема, иже продолжающися до того же Великаго моря окияна на северную страну. Имать же величество свое яко триста поприщ и болши. Исходят же из нея и реки многи. Высотою же превысока зело, имеющи на себе великия лесы, и езера, и блата, и дивиих[4464] зверей множество. Восход же имущи на ню от реки Пенеги, единою стезею взыти на ню, яко поприще едино и пол, идеже ныне манастырь стоит благодатию Христовою. С высоты же ея видети, яко с воздуха, окрест ея стоящия веси. Сия же Черная, реку же ныне Светлая, гора присещением Божия Матери от сотворения мира пуста стояше и небрегома никимже. И никтоже от человек живяше на ней, отнелиже и крещена бысть Росийская земля. Егда же восхоте Бог прославити сию, якоже древле Синайскую явлением угоднику своему Моисею,[4465] такоже и ныне явлением честнаго образа Матери Своея, свято и преславно показа место святое сие. Бысть же сице в лето от создания мира 7111 (1603) во царство царя и великаго князя Бориса Феодоровича всея Росии,[4466] егда изволи Пресвятая Богородица прославити место святое сие.

Бе некто игумен именем Варлам, служитель церкви Воскресения Христова, иже в Кевроле,[4467] на тойже Пенеге реце. Имяше же игумен Варлам у себе икону — образ Пречистыя Владычицы нашей Богородицы и Приснодевы Марии, иже Владимирская нарицается. И велию веру имяше к святей иконе той. Пришедшу же ему уже во глубоку старость, помышляше предати по себе святую икону ту единому некоему от христолюбивых муж. Изыскав же и обрете некоего мужа именем Харитона, прозванием же Иванна, мнев его благочестива суща страннаго[4468] ради жития его. Тойже Иван, аще и житием благочестив являшеся, делы же прост некако. Се же помышляющу игумену тому о семь, и яко уже и предати хотяше честную икону ту мужу тому. Бысть же во един от дний тех, пришедшу игумену тому от утрени в келию свою, и абие в сон сведен бысть. И видит, яко отверзошася двери келии его, и глас бысть яко жены некия, глаголющ к нему умилно: «О старче, что помышляеши отдати икону Пречистыя Богородицы мужу неискусну сушу. Но отдай ю вдовому попу Мирону, хощет бо Бог сею прославити место Черныя горы». По скончании же гласа того абие игумен он возбнув от сна того, и не яко во сне, но яко явленно повеленная ему дела ведый, исполняя, якоже рече: «Держащим бо ся чистым светолитием душам сонными вящая боговиденми глаголет, яко своим уже бывшим, тем беседует, и радующимся преподобным во славе его». И вскоре хотя исправити, размышляйте же в себе: «Не ведый, кто есть иерей Мирон, не ведый, и где есть».

Сице же тому помышляющу. Абие[4469], яко Богом послан, прииде иерей той Мирон, церковных ради святитилских оброков даяти. Бе бо той иерей Мирон служитель церкви великаго чюдотворца Николы веси Юролы,[4470] иже близ тоя великия Черныя горы яко за два поприща. Слышав же игумен Варлам о пришествии его, и со тщанием воста, призва его к себе. Нача же его вопрошати о месте горы тоя. Он же поведа ему: «Есть, — рече, — господине, близ нашея веси сия великая гора, место же то пусто и не живомо человеки. Угодно же, яко аз мню, ко иноческому пребыванию. Помышляю же, яко не оставит Бог места того». Абие же игумен со словом того поведает ему видение свое. И тако вкупе прослависта Бога, глаголюще: «Воля Господня да будет!» И воставше, идоста во церковъ, идеже стояше святая икона та. Облече же ся игумен Варлам во освященная одежа, и тако молебная совершают. По скончании же молебнаго пения со многими слезами много помолившеся, таже приемлет игумен Варлам честную икону ту и предаст ю в руце иерею Мирону с подписанием своею рукою позади иконы, написа сице. А писано: «Божиею милостию и молитвами Пречистыя Богородицы, ея явлением, Воскресенской игумен Варлам Кеврольския десятины благословил вдоваго попа Мирона образ Пречистыя Богородицы сея иконы и по ея явлению велел строити пустыню, монастырь в Черной горе, где она производила». Приим же он безценный той бисер,[4471] честную богородичную икону, и полагаеть ю в ковчежец, и отъиде восвояси. И пришед, постави ю в веси, идеже сам живяше, во церкви чюдотворца Николы. На предпомянутую же ону великую гору приити не возможно тогда зимнаго ради времени, понеже месту тому тогда пусту сушу, и снегу велику, и несть мощно взыти тамо нужды ради и пустоты места того.

Чюдо первое. В то же время, в неже иерей Мирон от Кевролы прииде со иконою Пресвятыя Богородицы, бяше некая девица именем Марфа, живяше в веси, нарицаемая Цымола. Бе же боляше зело очима, яко отнюд лишатися видения света сего. Бысть же ей в то время видение некое Божие во сне, якобы прииде иерей Мирон прежепомянутый от Кевролы и принесе с собою былие[4472], целящее очи. Поведает же девица видение то вдовице некоей именем Акилине и молит ея, да идет ко иерею Мирону и просит у него былия того. Прииде же жена та ко иерею Мирону и поведает ему вся реченная от нея. Слышав же он реченная от нея и разуме, быти былию оному иконе Пресвятыя Владычицы нашея Богородицы и Приснодевы Марии. И глагола жене той: «О жено, воистинну убо есть у мене былие, целящее не токмо телесныя очи, но и душевныя. Приведи убо девицу семо[4473]». Она же шедши и приведе девицу ту к нему. Иерей же востав, и иде с ними во церковь пред чюдесный той образ Богоматере, и молебная совершив. Девица же та припаде со многими слезами пред честною иконою Богоматере и абие исцеление получи вскоре, яко николиже болевше. Отъиде в дом свой, радуяся и славя Бога, яко всем дивитися скорому исцелению ея и славити Бога о преславном том чюдеси. Се первое чюдо бысть от иконы Пречистыя Богородицы.

По малех же днех паки является икона Пресвятыя Богородицы девице той, глаголя: «Иди и рцы иерею Мирону, да сотворит повеленное ему и отнесет икону мою на повеленное ему место во ону Черную гору, не изволих бо в чюжем дому пребыти, хощу бо, да и тамо устроит ми ся дом, и прославится имя мое ту». Она же шедше, возвести видение то иерею тому Мирону. Иерей же, яко услыша глаголемая от нея, абие подъемлет святую ту и Богородичну икону честно, со многим благоговением и страхом, и несе ю на превысокую ту гору, на великий холм, иже верху горы тоя, идеже та изволила. И тамо водружает честный крест на освящение места того и на прогнание невидимых враг. Ту же поставляет и честную ту Богородичну икону, оградив ю дщицами. И совершив молебная пред нею, и отъиде восвояси. Нача же потом часто приходити тамо молитвы ради, овоже и земледельства ради, начат убо разчищати место то на селитву себе. Пришедшу же зимнему времени, и снегом великим падшим, и нестроения ради воздушнаго не возможе ходити тамо, понеже снегове велицы, и не бяше мощи доити тамо нужди ради зимныя. Святая же та Богородична икона стояше тамо на пусте месте, никимже брегома.

В та же лета Богу попустившу за наша грехи, излия бо ся тогда фиял гнева ярости Господня на Рускую землю.[4474] Воста бо тогда в Велицей Росии некто злый царь, и неблагочестив, и законопреступник, и отметник Христовы православныя веры, подобен Улияну злочестивому,[4475] и законопреступнику, иже во грецех бывшему, нечестивому царю, именем Гриша, прозванием же и чином рострига, иже сверже с себе великий аггельский образ, и попра чин чернеческий, и лжею сприплете себе имя благовернаго царевича Димитрия Ивановича, бывшаго сына царя и великаго князя Ивана Васильевича всеа Росии. Той же окаянный рострига велие гонение на християны и на благочестивых воздвиже. И повсюду правовернии изгоними бываху, инии же и мучения венцы увязошася. Мнози же от скорби тоя по странам великия Росии скитающеся, страха ради мучителева.

Един же некто от таковых, инок благоискусен именем Иона, и той такоже в то время отъиде от царствующаго града Москвы, належащаго ради нестроения того. И уклонився, иде в пределы приморския, и прииде на прежереченную реку Пенегу, в пределы Кеврольския страны, в весь, Чаколу наричему. Случися ему витати[4476] у некоего христолюбива мужа именем Евфимия, от путнаго шествия утрудившуся старцу тому, возлег мало почити. И абие видит во сне, яко в некоем месте обретшу ему икону — образ Пресвятыя Владычицы нашей Богородицы и Приснодевы Марии, иже Владимирская наричется. И якобы взя его, и обви плашаницею, и вложи и недра своя. И абие возбнув от сна, и бысть во ужасе о видении том. И востав, изыде от веси тоя и прииде во ину страну, в весь тояже страны, иже прозывается Валтева гора, и обита ту у некоего христолюбива мужа. Нача же инок той Иона у человека того о пустынных местех страны тоя вопрошати, якоже есть обычай черньцем. Той же человек именем Никифор поведает ему, яко: «Есть, — рече, — отче, во стране сей, в пределех Двинския области, на сей же реце Пенеге, растояние имущи от места сего яко 30 поприщ, гора превелика и высока зело, Черная наричема. Имать же на себе лесы великия и многи зело, и езера же, и блата имеюши многи. Приходят же на ню жителие стран тех, ловы деющи дивиих зверей».

По беседе же той прежепомянутый той старец Иона отъиде оттуду и прииде паки во ину весь тояже страны, Пильегоры именуемы, и вита ту. И по обычной молитве возлег почити. И абие видит во сне жену некую благоговейну, пришедшу к нему и глаголющу: «Аз есмь Парасковия нарицаюся.[4477] Ты же убо старче не трудися всуе, скитаяся, но востав, иди в Черную гору, о нейже ти поведа Никифор он, на той бо горе иерей некто именем Мирон хощет создати храм во имя Пресвятыя Богородицы». И виде, якобы подаде ему хлеб един. Возбнув же от сна и страхом многим объят бысть о видении том. И востав, преиде оттуду в пределы Двинския страны, в весь, нарицаемую Вонгу. Вопроси же жителей места того о горе той. Они же поведаша ему и, гору указующи, сказаша ему, яко десять поприщ до нея, и яко и крест уже поставлен есть на ней.

Оттуду же прииде в преждепомянутую весь Юролу, идеже живяше иерей Мирон, и прииде в церковь, сущую ту, и слушав божественнаго пения. И по отпетии седшу ему в притворе церковнем. Прииде же к нему иерей Мирон и глагола ему: «Откуду, отче, грядеши?» Он же отвещав, рече к нему: «Веси, отче, каковы беды постигоша нас, грех ради наших, от злаго царя законопреступника на правоверныя. Повсюду бо изгоними есми, скитающеся по странам имене ради Божия». Потом же сказует ему старец о явлениих, бывших ему на пути. И тако оба вкупе похвалиста Бога. По мале же времени прииде к ним прежереченный игумен Варлам, у негоже бысть преже святая та Богородична икона, патриаршеских оброков имати. Они же поведаша ему о чюдеси от иконы Святыя Богородицы и о видении все поряду. Он же похвалив Бога и рече: «Благословен Бог, глаголю бо вам, яко не имать Богородица оставити святаго места сего». Се же им беседующим к себе.

В то же время человек некто благочестив именем Евфимий слышав беседу их. Нача же и той поведати им, глаголя, яко: «Аз, отцы, не пред много лет сих во святую и великую 40-цу в четверток Великаго канона[4478] идущу ми ко утреннему славословию из веси моея, нарицаемая Малетино. И возрех[4479] на правую страну Пенеги реки к Черной горе. И видех на оном высоком холме, иже верху горы тоя, столп огнен стоящ от земли и до небеси. От столпа же того, яко пожар страшен светящ. Мне же зело ужаснувшуся о необычном видении том. Приидох ко утреннему славословию и не дерзнух никомуже поведати того и до сего дни. Ныне же слышав беседу вашу о святом месте том, и се поведаю вам».

Ин же некто муж именем Григорий, и той такоже глаголя: «Аз убо, отцы честнии и святии, пред малом сего времени стоящу ми на молитве в дому моем. И прииде же сон на очи мои, и возлег на одре моем почити и видех во сне, яко обретшу ми ся во оной Черной горе. И видех на том же превысоком холме стоящу икону, образ Пречистыя Владычицы нашея Богородицы и Приснодевы Марии, честнаго ея Умиления, иже Владимирьская наричется. Пред нею же множество свещь светящеся, и священницы стояху во священных одеждах, молебная совершающе, и множество народа окрест предстояще. Абие же возбнух от сна и никомуже не поведах до сего дни».

Человек же некий Иван именем, прозванием Носков, и той такоже поведаше, глаголя: «Видех, — рече, — в видении нощнем сию великую гору, неизреченным светом облистаему, светящуся чисту зело. Верху же ея на высоком оном холме видех благовернаго царя и великаго князя Феодора Ивановича всеа Росии,[4480] ходяща по месту и указующа на не. И возбнув же от сна, и страхом обьятъ быв, размышляя о видении том».

Сице же им беседующим к себе, начаша приходити к ним и инии жителие мест тех, поведающе им, яко: «Ходящим по пустыни той и ловы деющим дивиих зверей, не во едино время, но и по многи дни слышахом звон велик на горе той». Поведаху же им и малии отроцы, глаголющи, яко: «Пасущим нам, — рече, — овцы в горе той, иногдаже хождахом на собрание плодов земных, такоже слышахом звон, яко к пению церковному. Идохом же до места, и не обретохом ничтоже». И инии же поведаху, яко: «Из далних весей слышахом звон той». Они же слышавше сия, дивишася и прославиша Бога. По беседе же той прежереченный игумен Варлам увеща иерея Мирона иночествовати, и постриже его, и нарече имя ему Макарий. Тако совет положивше между себе, и посылают старца того Макарию к Москве бити челом царю и великому князю Василию Ивановичю всеа Росии[4481] о начале места того, дабы воздвигнути храм на горе той. И тако Макарий пути емлется[4482], Иона же оста ту.

Егда же преиде зима, и прииде вешнее время, иде же старец Иона на место то, идеже крест поставлен и икона Пресвятыя Богородицы. Узрев же старец честную икону ту и абие помолися на мног час. Таже призва неких боголюбивых муж, и нача разчищати место то, и лесы чистити, идеже церкви быти, и приготовляти на церковное строение лес. И кущу[4483] водрузи близ честнаго креста, таже и келию поставиша на упокоение себе, нача же и землю возделывати. Пребывающу же старцу Ионе на месте том с прочими тружающимися ту. И во един от дний седяшу ему со единым человеком от тружающихся ту, именем Василием, и размышляющим им, како начати основание церковное. И внезапу звон бысть посреди чищеннаго места, яко во един колокол, потом же в два, и во многи. Изшедшим же им ис келии на место то и не обрегоша ничтоже. Вопросиша же и прочих труждающихся на месте том о слышании необычнаго звона того. Они же реша, яко: «Ничтоже слышахом». Мы же дивихомся о чюдеси том.

И в неколице времени идоша в началную весь места того, иже прозыванием зовется Волок Пенежской,[4484] и призывает иерея места того священноинока Митрофана. Тойже шед с прочими священники, яже о нем, вземше честныя кресты, и с чюдными иконами идоша на место то. И тако совершают чин основанию церкви, именовавше ю во имя Пресвятыя Владычицы нашея Богородицы и Приснодевы Марии, честныя ея Похвалы. И тако разыдошася, хваляще Бога.

По основании же церковнем печаль бысть старцу Ионе, яко не сущу у них мастеру на создание церковное. Бысть же чюдо преславно, подобно древлебывшему во граде Киеве, якоже и Патерик Печерский поведает, егда Пресвятая Владычица наша Богородица и Приснодевая Мария наят хитрейших[4485] мастеров во Цареграде и злато давши им на создание церкви своея Печерския.[4486] Такоже и зде содея подобно тому, сице.

Чюдо 2. Человек некто именем Ияков живяше в Корельстей земли. Приключися ему болезнь велика зело, яко внутренним его терзатися люте, горлу же и всему телу его обтекшу люте, яко уже и скончатися хотяше. Бывшу же ему в недузе том немало время и ожидающи смерти. Абие же является ему жена светлообразна, имущи в руце своей губу морскую, и тою отираше ему гортань, и глагола ему: «Иди в пределы Двинския области, в Черную гору, и тамо бо есть образ Пречистыя Богородицы, и тамо совершенное исцеление обрящеши». И абие возбнув от видения того, обрете гортань свою здраву, и прослави Бога, и пути касается. И прииде на место Черныя горы к Пречестному образу Пречистыя Богородицы, и тако совершенное здравие получи. Бе же той Ияков ремеством древодель и искусен здати святых церквей. Таже нача делати церковь ту Пресвятыя Богородицы, и того лета создаша даже и до верха церковнаго. Потом же прииде с Москвы старец Макарий с повелением от царя и великаго князя Василия Ивановича всеа Росии, яко да созиждется храм, и устроится манастырь на месте том благодатию Христовою.[4487] Призимев же ту Макарий и паки поиде в Великий Новград, ко иже тогда правящему престол Премудрости Божияго слова преосвященному Исидору, митрополиту Новгородскому и Великолуцкому,[4488] церковных ради потреб, и антимиса[4489] на освящение церкви, и о благословении священноиночества себе. И поведает же святителю о месте горы и о чюдесех, бывающих от иконы Пресвятыя Богородицы. Митрополит же Исидор, яко услыша сия от старца, подивися и прослави Бога и Пречистую Богородицу. Таже совершает инока того Макария во священноиночество и поставляет его игуменом, глаголя, яко: «Не возможно в таковем святем месте быти без игумена. Еще же слышах от неких, яко несть у вас на Пенеги близ иного монастыря». Таже и посох дав ему, и настолную грамоту, яко да общее братство умножи о Христе устроится ту. И ины церковныя вещи даде ему, и антимис, и прочая потребы церковныя, и отпусти его с миром.

Прииде же Макарий игумен от Великаго Новаграда в осенное время. Старец же Иона с прочими уже совершиша церковь без него. Игумен же Макария совещася з братнею, и тако совершивше священство, и собравше окрест ту сущих весей со святыми иконами и честными кресты. И тако соборне освящают храм той во имя Пресвятыя Богородицы честныя ея Похвалы в лето от создания мира 7116 (1608) в славу Богу и Пречистей его Богоматере. Прежепомянутый же он древодель Ияков, емуже явися Святая Богородица в Корельстей земли, по совершении тоя церкви прият иноческий образ, пострижеся в томже монастыре, и наречен бысть Иоаким, и бысть инок искусен. Такоже и прежереченнии они христолюбивии мужи, иже видения поведавшей на святем месте том, мнози постригошася от них в монастыри том и быша искусни иноцы. И тако собрася братство о Господе.

От иконы же Пресвятыя Богородицы начаша бывати многая и неисчетная чюдеса и исцеления с верою приходящим, ихже поряду и списати не мощно есть множества ради. От нихже мало нечто повем любви вашей.

Чюдо третие. Некая жена именем Ирина от веси, нарицаемыя Цымола, бысть же ей явление некое божественно. Прииде убо она ко иерею церкви чюдотворца Николы Волока Пенежскаго именем Григорию, поведа ему, яко да идет с честными кресты, и со святыми иконами, и с народом в монастырь Пречистыя Богородицы к чюдотворному ея образу и молебная совершит. Иерей же Григорий не внят словесем ея, и нивочтоже вменив о глаголех ея, и не восхоте ити. В то же время абие внезапу сотворися воздух неблаготворен, и бысть мраз на все плодие, и позябе все сеянное на нивах. Того же иерея Григория Божия некая сила верже о помост церковный[4490], и бысть яко мертв. И по мале едва некако в чювство прииде. И взем честныя кресты, и со множеством народа идоста в монастырь Пресвятыя Богородицы, и тамо молебная совершивше, и отъидоша в домы своя. И абие в той час милостивый Господь наш Исус Христос молением Пречистыя Матере своея Пресвятыя Владычицы нашея Богородицы и Приснодевы Марии паки дарова теплоту солнечную, и дождь благопотребен, и воздух благотворен ко умножению плодов земных. Вси же людие видевше чюдо сие и прославиша Бога и Пречистую Богородицу. Доздеже о сем.

Чюдо 4. Ино чюдо поведаю вам. Человек некто именем Михаил, прозванием Ворга, живый во единой от окрестных ту сущих весей, иже Сояла наричется, близ тоя великия горы. Нача же Михаил той поносити глаголы хулныя на место сие святое и на мнозе не преста от обычая того. Бысть же сице. Случися ему некоея ради крамолы яту быти от епарха страны тоя, и всажену быти в темницу, и мучен бысть крепко, потом же и на смерть осудиша его. Прииде же ему во ум, и воспомяну грех свой о поношении святаго места сего, воздохнув из глубины сердца своего, моляся Богородицы и глаголя: «О Пресвятая Госпоже моя, Владычице Богородице! Прости мя грешнаго о поношении моем на место святое твое, отселе уже никакоже не дерзну рещи ничтоже, токмо избави мя от напасти сея и от горкия смерти. Имам же и приношение приносити в дом твой до дне смерти своея». И тако милостию Пречистыя Богородицы избавлен бысть от осуждения того и горкия смерти тоя. Нача же и приношение приносити по обещанию своему на всяко лето по мере жита. Се же нам сам поведа.

Чюдо 5-е. Ниже се молчанию предати достойно есть. Бысть убо в Двинской области, иже Колмогоры наричются, в началном месте тоя Двинския области воевода именем Иван Милюков,[4491] прислан с Москвы от царя и великаго князя Василия Ивановича всеа Росии правления ради страны тоя. Егда же, грех ради наших, бысть тогда великое нестроение в царьствующем граде Москве и, яко овцы не имуще пастыря, везде бо бяше велие смятение, от началствующих даже и до последних, везде бо и повсюду мятежи велики бяху и междоусобие. Такоже и в сей Двинстей области на началствующих крамолы воздвигоша тогда, на епарха и на архиграфоса.[4492] И всадиша их в темницу, и стражи к ним приставиша. По мале же архиграфоса того именем Илию Уварова осудивше на смерть и в воду утопиша.[4493] Такоже и епарха того Ивана Милюкова хотяху осудити на смерть, глаголюще, яко: «Неправедно судиши». И ина зла многа износяще нань, яко уже и скончати хотяху, яже о нем. Вельми же ужасеся он о сем, неведый что сотворити, не имея бо ни от кого помощи себе, понеже бо вси уклонишася вкупе, и непотребни быша, и не бысть творящаго благо ему. Сице же ему ожидающю смерти, и прииде к нему отец его духовный, иерей именем Феодор, имея веру в монастырь Пресвятыя Богородицы, в Черную гору. Поведает же воеводе тому о чюдесех, бывающих от честныя иконы Пресвятыя Богородицы, иже тамо. Глагола ему: «Аще начнеши веру имети к Пресвятей Богородицы в Черную гору, веде, яко избавити тя имать Бог от напасти сея». Он же с радостию обещася неотложно веру имети ко святому месту тому. И абие на утрий день многомятежный он народ в тихость преложися милостию и молитвами Пречистыя Богородицы; иже прежде яко львы рыкающе, ныне же кротцы яко овцы приидоша, моляще его, глаголюще, яко да идет по обычаю своему в судилище и да управляет их, якоже и преже. Видев же воевода он скорое пременение народа и Пречистыя Богородицы быстрое заступление, абие прослави Бога и Пречистую Богородицу и многия слезы от радости испущаше о избавлении своем. Таже вопрошает, аще есть кто от инок честныя обители тоя ту. Обрете же ся на Колмогорах прежереченный старец Иона. Он же призвав его к себе и поведа ему милость и заступление Пречистыя Богородицы, бывшую к нему. И посылает со старцем тем потребная монастырю тому книги, и воск, и паволоки же, и сребро на строение церьковное. Обеща же ся и до смерти своея имети веру монастырю Пресвятыя Богородицы в Черную гору.

Прочести благослови, отче.

Обычай убо человеческому естеству, не точию простым, но и светло- стию рода почтенным и над делы царьскими учиненым, не токмо самех царствующих почитати, но и образы тех подобия честно имети, не яко вещию от прочих разно суще, но яко подобием тех почтени суть. Колми же паче достоит множае зело не точию почитати, но и поклонятися божественным вещем, еще и не одушевлени суть, иже божественныя именем и воображением почтени суть. Покланяем же ся не вещи и зданию тех, но почитаем, иже своим воображением освятивших сия, и о обретении тех весело торжествуем. Тако бо и божественный Давыд святыни киот, возвращаем от пленения, видев, радостию скакаше, играя. Кольми же паче иже нам, образом збытие видящим, подобает веселитися духовне о божественнем сем празднице Богоматере, о пришествии честнаго ея образа в гору святую сию.[4494] «Прииде бо днесь, — по реченному, — гора Божия в гору чювственную». «Прииде гора Божия, гора усыренная Духом Святым», о нейже Давыд изрече.[4495] Прииде гора, от неяже камень отсечеся без руку и соблазны вся потреби. Прииде гора, юже древле Аввакум провозглашаше, глаголя: «Бог от юга приидет, и святый из горы присенныя часты».[4496] Прииде в гору, о нейже Исайя прорече, глаголя: «Будут в последняя дни яве гора Господня и дом Божий верху ея».[4497] Днесь бо збыстся пророчество блаженнаго Давыда, глаголющее: «Велий Господь и хвален зело во граде Бога нашего, в горе святей его, благокоренным радованием всея земли».[4498] Сия бо воистинну зде радость всея земли, прославися бо сия, якоже Синайская. Тамо бо, егда глаголаше Бог с Моисеом, куряшеся огнем и мраком.[4499] Ныне же сия посещением Божия Матере паче светится и украшается место святое и Богом просвященное. Днесь бо видим дом Божия Матере верху ея и, духовне веселящеся, поклоняемся в горе сей святей иконе ея, исцеления приемлюще душам и телесем. Аще бо и прообразование тоя видев Моисей, купину во пламени горящу огнем и неопаляему,[4500] и толикия святости сподоблен бысть, яко и место, на немже таковая быша, свято показася. «Изуй бо, — рече, — сапог ногу твоею, место бо, на немже ты стоиши, свято есть».[4501] Колико паче ныне, не по прообразованию, но самый образ Богоматере, иже от далних стран изволением ея доиде, воистину сугубыя благодати сподобися и освятися место сие. Прекратим же слово о сем, возвратимся на предлежащее нам слово.

ПРИШЕСТВИЕ ОБРАЗА БОГОМАТЕРЕ

Есть же убо о сем страна убо некая, прилежащая к пределом Перския земли, иже Иверская и Грузинская нарицается, иже от древних лет, исперва по воплощении Господа Бога и Спаса нашего Иисуса Христа и во спасенней страсти его в лето 343 (835), при велицем цари Констянтине благочестивом, прияша святое крещение, якоже и писание поведает сице: Во дни тыя жена некая, благоговейна грекини, пленена бывши во Иверскую землю ту и пребываше тамо в посте и молитве. Исцели же молитвою отроча болное и потом царицу царя земли той, болну же сущу, положи на убозей своей постели и молитвою здраву же сотвори. И сего ради царица моляше царя, да церковь пленнице оной сотворит. Царю же, не покаряющуся о сем, слепотою объят бысть. И потом научи его послати ко благочестивому царю Констянтину Великому, яко да пошлет к ним иерея. Слышав же сия Великий Констянтин, яко желают, и послав к ним иерея благоговейна. Он же абие пришед и крести всю землю ту.[4502] И оттоле даже и доднес держаху истинную православную веру християнскую и предания святых апостол и Святых отец. Мнози же убо суть в той стране святыя Божия церкви, и честнии монастыри, и многия святыни быша. И царие правовернии предержаще страну ту[4503], якоже и о Динаре, царице бывшей страны тоя, повесть поведает, како победи Перскаго царя помощию и заступлением Богоматери.[4504] Бысть же, егда прогневаша Бога и святыя заповеди не сохраниша, и предаст их Бог в руце Перскаго царя, не в конечную погибель, но в наказание на неколико время. И паки смирившеся пред Богом и восприимаху благочестивое свое отечество, еже и доныне держаще, славящее Троицы единаго Бога.

Бысть же в лето 7130-е (1622) Богу попустившу за грехи людей. И прииде на Иверскую землю, иже тогда предначальствуяй в Персех, злочестивый царь Аббас шах. И поплени страну ту, и грады их прият, и святыя Божия церкви оскверни, и честныя монастыри разори, и святыя иконы попра, и множество благочестивых огню и мечю предани быша. И всю землю ту пусту положи. Сей же злочестивый царь Аббас шах, аще и злочестив бяше, но неколико благоразумен бысть. Изыскуя святыни, сущия в земли той, и уведев от неких, яко есть в земли той, и уведев про многоцелебную Ризу великаго Господа Бога и Спаса нашего Иисуса Христа, юже обрете у иже ту сущаго митрополита. Иже по возвращении от победы своея посла ю иже тогда царствуюшему в Велицей Росии ко благочестивому царю государю и великому князю Михаилу Феодоровичю всеа Росии самодержцу и ко отцу его великому господину и государю Филарету Никитичю, патриарху Московскому и всеа Росии вместо великаго дара на похвалу царству их, Велицей Росии, иже о ней повесть во своем ея слове пространно скажет.[4505] Мы же на предлежащую нам повесть возвратимся.

В то убо время, егда персяне поплениша Грузинскую землю, и многи честныя иконы взяша, и отнесоша во страну свою, не ради благочестия, но яко да препродают тех, понеже мнози рустии купцы в Персиде бяху, куплю деюще. Ведяху бо их персяне, яко благочестиви суть и честно держат поклонение святых икон. И сего ради принесоша иконы те во страну свою в корысти место[4506], яко да искупят у них рустии они купцы. Бе же некто един от прилучившихся ту купцев именем Стефан, нарицаемый Лазарев, приставник[4507] имению некоего гостя от града Ярославля, иже на Волзе, Георгия, прозванием Лыткина. К тому же Стефану в то время в Персиде персин некий принесе икону — образ Пречистыя Владычицы нашея Богородицы и Приснодевы Марии, честного ея Одигитрия, иже есть Радостная заступница. Бе же икона та обложена сребром и златом. Глаголя ему, яко да искупит от него святую икону ту. Видев же благочестивый той муж Стефан честную икону ту и абие помысли, непросту быти делу тому, но яко Богом послану к нему сущу, опачеже и за се, да послет ю к господину своему Георьгию, ведяше бо его мужа благочестива суща. И тако искупи честную икону ту в Персиде. Тогда бысть Божие некое явление во сне господину его Георгию во граде Ярославле, глаголя, яко: «Приставник имения твоего Стефан, сый в Персиде, купи тебе безценный бисер. Егда же принесет к тебе, ты же пошли его в Двинскую область, в Черную гору». Возбнув же благочестивый той муж Георьгий от сна того и размышляйте в себе, что есть бесценный он бисер. По времени же поведает видение свое первосвятителю кир Филарету, патриарху Московскому и всея Росии. Первосвятитель же удивлься о сем и рече ему: «Аще что Господь восхощет, то и сотворит».[4508] По времени же некоем прииде ис Персиды прежепомянутый приставник имения его Стефан и принесе к нему чюдную ту икону Пречистыя Богоматере, еяже бе искупил в Персиде. Он же абие со многою радостию и со слезами сию приемлет, воспоминает виденное ему, яко се есть воистинну бесценный он бисер, икона Богоматери.

По времени же некоем, не яко во сне, но яко яве повеленное ему исполняя, пути емлется, еже донести ту честную икону Богоматере до места, повеленнаго ему. И тако приходит до места, в монастырь тоя превеликия Черныя горы, и приносит ту честную икону Пресвятыя Богородицы Одигитрие, иже Грузинская нарицатися обыче по имени страны тоя, отнюдуже прииде. И тако поставляет ея во церкви той честныя ея Похвалы и праздньство сотворяет. Во время же утренняго славословия и чюдо створися от честныя тоя иконы Богородичны.

Бе бо в той же обители инок некто, именем Питирим. Бяше же слеп очима, и глух ушима, и никакоже видяще света сего. Во время же того утренняго пения изыде той инок Питирим в сени пред келию свою помолитися. И егда молящуся ему, внезапу свет велик осия его. Старец же ужасеся о великом свете том, понеже от мног лет не виде света сего, и возложи на себе крестное знамение, и сотворив молитву, глаголя: «Господи Иисусе Христе Сыне Божий, помилуй мя грешнаго». И возвед очи свои на великую гору, и видит на ней, яко луч солнечный светозарен сияющ, светящся паче илектра.[4509] Потом же нача очима видети и ушима слышати. Збысться бо на нем пророческое слово, глаголющее: «Тогда отверзутся очи слепых, и уши глухих услышат».[4510] По утреннем же славословии прииде на собор, поведая бывшее на нем исцеление, славя Бога и Пречистую его Матерь. Видев же чюдо сие благочестивый муж той Георьгий и паче нача веру имети ко святому монастырю тому, иже последи и церковь прекрасну воздвигнути повеле в славу Богоматери, и украсив ю, якоже лепо бе, и обе чюдотворныя Богородицины иконы в ней постави, и якоже некий виноград прекрасен, книгородных древес пажитми светло насади, предав убо ту многоразличныя и премудрыя книги числом яко 147 книг.

Принесена же бысть та честная Богородичная икона Одигитрия в лето от сотворения мира 7137-го (1629) августа в 22 день при благоверном государе царе и великом князе Михаиле Феодоровиче всеа Росии самодержце,[4511] и при сыне благоверном царевиче князе Алексее Михайловиче[4512] всеа Росии, и при великом господине и государе святейшей кир Филарете патриархе Московском и всеа Росии,[4513] и при Киприяне митрополите Новгородском и Великолуцком,[4514] и при Макарии игумене святого места сего Черногорского монастыря[4515] в славу и хвалу Христу Богу нашему и Причистей его Богоматере во веки веком. Амин.

Чюдо 2 от иконы Пресвятыя Богородицы Одигитрия. Бяше некая жена именем Неонила от веси, нарицаемыя Явзоры. Случися сий в раслаблении слежати неколико время. Слышавши же о чюдесех, бывающих от иконы Пресвятыя Богородицы, и прииде ей во ум, еже постигнути тамо. И тако повелевает своим ея довести себе тамо. Принесена же бысть пред чюдотворную ту икону и, молебная совершив, ту абие здравие получи. Отъиде в дом свой, славя Бога и Пречистую Богородицу.

Чюдо 3. Ина жена именем Феодотия от веси, Трифановы горы именуемо. Бысть же ей болети очима нестерпимою тою болезнию. Прииде же во обитель Пресвятыя Богородицы, и молебная совершив пред честным образом ея, и исцеление получи. Отъиде, славя Бога и Пречистую Богородицу.

Чюдо 4. Человек некто именем Феодор от Колмогорскаго посада, бывшу же ему в разслаблении годищное время и никакоже могущу двигнутися со одра своего[4516]. Слышивши же о чюдесех, бывающих от иконы Пресвятыя Богородицы, и повеле своим ему довести себе тамо. Егда же принесоша его и молебная совершивше, и ту абие здрав бысть. Отъиде в дом свой, славя Бога.

Чюдо 5. Жена некая от того же Колмогорскаго посаду страждущи зубною болезнию яко годищное время и пол. «И много издавши имения врачем, и никоея же ползы обретши, но паче в горшая пришедши».[4517] И слышавши же о чюдесех, бывающих от иконы Пресвятыя Богородицы, и иде тамо, и молебная совершив, в той час здравие получи, отъиде, радуяся.

Чюдо 6. Ниже се молчанию предати потребно. Человек некто именем Полиект от великия реки Двины, веси, нарицаемая Ровдина Гора, мучим быше от нечистаго духа. Родители же его приведоша его в монастырь Пресвятыя Богородицы и певше молебная. И бысть ему в той час облегчение от болезни тоя, и потом совершенное исцеление получи милостию Пречистыя Богородицы, отъиде в дом свой, славя Бога.

Чюдо 7. «Тайну убо цареву хранити добро есть, дела же Божия таити не полезно есть».[4518] Человек убо некто именем Кондрат рождение имея от предел Мезенския страны, от веси Сундоры, с Башки. Бысть же ему мучиму быти от духов нечистых, и в дому не живяше, но по пустыням и по улицам мучим от бесов. В некоеже время изыде от них безвестно в вешнее время, и не ведущим о нем родителем его. И десять недель ходя по пустыни, ни ядый, ни пия, якоже поведаша родители его, Бога свидетеля поставляюще о чрезестественном неядении его. По днех же тех узре отец его близ реки, ползающа по земли, и позна, и не возмнев его человека суща, но привидение бесовское, яко уже и четыредесятницу сотвориша о нем.[4519] Отложив же страх и прииде к нему. Сын же позна, яко отец его есть, и нача молити отца своего, чтобы его не оставил, яко уже на последнем издыхании сушу ему, токмо едва дух его в нем. Взем же его отец его, и приведе в дом свой, и сказа матери его и всем домашним, чтобы не ужасалися его. И начаша помалу кормити его, и бысть ему облегчение от болезни тоя. И начат поведати, яко от множества бесов влачим бяше, и явися ему икона Святыя Богородицы Грузинския и путь показа ему, глаголя: «Идя ко отцу своему и прииди в Красную гору помолитися, и исцелееши». И потом не видех бесов. Пришед же в монастырь Пресвятыя Богородицы, и повеле молебная совершити, и многи слезы пролия, лежа на земли на долг час. И тако совершенное исцеление получи, славя Бога.

Чюдо 8. Ин человек именем Ияков с Кулойского посаду не видя очима неколико время. И прииде ко Святей Богородицы, и молебная совершив, и здравие получи. Отъиде в дом свой, славя Бога, радуяся.

Чюдо 9. Человек некий именем Филимон бе немощен очима. Прилучи же ся ему итти мимо Черную гору. Прииде же ему во ум итти в монастырь Пресвятыя Богородицы и помолитися тамо. Прииде же, и молебная совершив, и исцеление получив, и отъиде, славя Бога.

Чюдо 10. Жена некая именем Зиновия веси Чаколы. Приключися ей болезнь очная. И прииде в дом Пречистыя Богородицы, и молебная совершив, и свету сподоблена бысть, и отъиде, славя Бога.

Чюдо 11. Некий человек именем Павел от тоя же веси боляше очима. Видев же исцеление, бывшее на жене Зиновии. Прииде же и той в монастырь ко Пресвятей Богородицы, и молебная совершив у честныя иконы ея, и здравие получи, отъиде в дом свой, славя Бога и Пречистую Богоматерь.

Чюдо 12. Человек некий именем Тимофей от веси, нарицаемыя Немнюги. И бывшу ему в Кевроле, и прииде болезнь на очи его, и пребысть болезнуя яко седмиц шесть. И прииде же ис Кевролы в монастырь ко Пречистей Богородицы, и молебная совершив, и здравие получи, отъиде в дом свой, славя Бога и Пречистую Богоматерь.

Чюдо 13. Ин человек именем Иван от страны Мезенския с Килцы. Прилучися убо тому негде на езере рыбы ловити, и абие нача утопати. Бяше бо с ним и других пять человек. Много же тружающуся ему во езере том, яко уже и погрязнути хотяше. Прииде же ему во ум, и нача молитися Пречистей Богородицы, иже в Красной горе образу Грузинския. И обещася молебная совершити и милостыню подати по силе своей. И в той час избавися от потопления того. По времени же прииде в монастырь к Пресвятей Богородицы, и с подруги своими, и молебная совершивше. Сие же сами сказаша, славяще Бога.

Чюдо 14. Человек некий именем Павел от моря окияна с Зимной стране, от веси Мудьюги прииде же в монастырь ко Пресвятей Богородицы, поведая, яко: «Болевшу ми, — рече, — годищное время». И явися ему во сне икона Святыя Богородицы и со Превечным Младенцем Господем нашим Иисусом Христом и глагола ему: «Учил ли ся еси псалмом?» Аз же рече к ней: «Мало, Госпоже, учихся, токмо вечерню начах до псалма „Гласом моим ко Господу возвах”».[4520] И глагола ему: «И ты начни говорити, аз тя научу». И абие воспрянув от сна, и в том часе облегчися болезнь моя, и бысть здрав. И пришел в монастырь ко Пресвятей Богородицы, славяще и хваляще Бога и Пречистую Богоматерь.

Чюдо 15. В лето 7152-е (1643) месяца декабря в 5 день бысть чудо преславно и удивлению достойно. Прииде убо в монастырь Пречистыя Богородицы и жена некая именем Домника от Мезенских предел, нарицаемыя Дорогия Горы, веси Монастыршина. С нею же прииде отрок некий именем Тимофей, поведающи сице, яко: «Пред сими денми, — рече, — обещахомся итти в монастырь ко Пресвятей Богородицы в Красную гору помолитися чюдотворному образу ея. И уже к путному шествию начахом готовитися, и прежереченному же отроку Тимофею готовящуся, делающу ему одеяние на руце свои зимнаго ради времени. В день же неделный[4521] творящу ему то. Абие прииде яко вихор на очи его, и паде ниц от болезни тоя. Лежащу ему два дни ни ядый, ни пия, ни видящу ему ничтоже, понеже лице все опухло бяше. Родители же его многих врачев приводяще к нему, яко до трижды, и никоеяже ползы обретши от них. В третию же нощь едва некако в сон тонок сведен бысть от зелныя болезни тоя. И явися ему отрок в беле ризе юнным возрастом и рече ему, что: „Ты хоте итти в Красную гору помолитися ко Пресвятей Богородицы”. Он же рече кнему: „Како ми итти, Господь убо у мене зрение отъят”. Той же рече: „Аще во утрии неотложно поидеши ко Пресвятей Богородицы, и совершенное здравие обрящеши. Возми убо сребряницу и шед, купи свещу, и донеси ю тамо, и постави пред чюдотворною Богородичною иконою, и тако исцелееши заутра”. Аз же вопросих его: „Ты кто еси? И что ти есть имя?” Он же рече ми: „Имене моего невозможно ти есть ведети ради человеческаго лукавствия”. И паки глагола ему: „Еще послушавши мене и сотвориши обещанное тобою, паки мя узриши”. И абие возбнув от сна, и видех светь, и страхом обият бысть. И уразумех, яко здрав бысть, и поведа матери своей. И тако приидох во обитель Пресвятей Богородицы, и се поведаю вам». Мы же слышахом сия от отрока того, и прославихом Бога и Пречистую Богородицу о бывшем от нея чюдеси.

Ибо яко от источника текут реки, и умножается вода, тако и от веры приходит дар, и умножается всяка добродетель. Ничтоже больши честныя веры, ни твердейши большаго упования. Веруяй бо право и уповаяй несуменно, таковый дерзновение имать к Богу и вся обретает: елика просит, то невозбранно от Господа приемлет. Якоже и болящий сей верою получи желаемое здравие, о немже нам ныне повесть предлежит.

Чюдо 16. Бысть убо некто человекь именем Иван Андреев сын, жилище имый близ самого дышущаго моря великаго окияна, от веси, нарицаемыя Мудьюги. Случися ему болезнь велика и нестерпима зело, яко всем внутренним терзатися от тоя болезни великия. И всем телом оцепенел бяше, яко ничтоже ему слышати от своего телеснаго естества. Сицевою же нестерпимою болезнию страждущу яко десять ссдмиц. Прииде же ему во ум, еже помолитися образу Пресвятыя Владычицы нашея Богородицы и Приснодевы Марии, иже Иверская нарицается, в Черногорском монастыри. И абие во уме своем несумненною верою начат молитися на одре в дому своем. И тако молящуся ему. Оле несумненныя веры сила! Яко в таковом дальнем разстоянии в мале часе услышан бысть. И абие внезапу лежа на одре своем, слышит, якобы некая рука отторже от сердца его лютую ту болезнь с великим троскотанием. И бысть здрав, яко николиже болев. И разумев скорое свое исцеление и прослави Бога и Пречистую Богородицу. И прииде в монастырь той, и пад пред чюдотворным образом Пречистыя Богородицы, поведая всем скорое свое исцеление. Совершив же молебная и отъиде в дом свой, славя Бога.

Чюдо 17. Якоже бо небо украшено звездами, и земля различными благовонными цветы, тако и церковь, яко другое разумное небо, украшается различными Богоматерними чюдесы, имеюще в себе светлость нелестных звезд — преславных и неисчетных Богоматерних различных чюдес, якоже доброплодная земля на кииждо год износящи добровонная и различная цветы, неисчетная Богоматерни чюдеса, от нихже едино ныне повем, бывшее в настоящее лето сие от бытия мира 7157-е (1649) месяца февраля в 12 день.

Бысть убо некий человек именем Июда Петров сын тоя же Двинския страны, от веси, нарицаемыя Щипичинка. Бысть же ему от младенства, якоже сам поведа, обдержиму быти болезнию безвестно нападающаго нечистаго духа. Тою болезнию устрашая всех сущих в дому его, страшен являяся и развращенне оцеимый пременяя вид свой. Сам же отнюд великия тоя немощи не помняше. Егда же бо от нея на время свобождашеся, тогда свои ему поведаху. Он же зело о сем скорбяше. Пребывающу же ему в таковей болезни той 15 лет, вельми же скорбяху сродницы его о нем, зряще его такою лютою болезнию одержима суща. Имея же и приснаго си брата. Слышаху же о чюдесех, бывающих от иконы Пресвятыя Владычицы нашея Богородицы и Приснодевы Марии, яже Иверьская нарицается, в Черногорском монастыре. Помыслиша послати его тамо потрудитися с прочими тружающимися в монастыри том, да негли милостию Пречистыя Богородицы исцеление получит. И еже помыслиша, то и сотвориша, и послаша его тамо. Брат же его присный обрете на Холмогорах старца обители тоя, именем Макария, пребывающа ту монастырьских ради потреб. И поведа ему о сем, и моля его о нем. Такоже по силе и от имения своего подаде милостыню в монастырь той. Егда же прииде бесноватый в той манастырь Пресвятыя Богородицы, тогда недуг той паче начат належати ему. Пребывшу же ему ту три недели, тружаяся с прочими работники монастырьскими на братию с послушанием. Видевше клеврети его таковое его послушание, жаляще о нем. Нецыи же от них имуще злый обычай, и наузы волшебныя[4522] навязываху ему, да негли сим отгонят от него беса, но обачс погрешиша, не может бо по Господню словеси: «Како может сатана сатану изгонити».[4523] Таже начат легчае быти ему от болезни тоя. Они же чаяху, яко от них наузов легчае ему бываеть от недуга. Посем же явися ему во сне икона Пресвятыя Богородицы, Иверская наричема, и глас от иконы к нему глаголя: «Июдо, не спи, но молися, да свободишися от недуга твоего». Он же возбнув, и никомуже видения не поведа, но молит строителя и братию, да поволят ему от службы ко церковному пению и ко образу Пречистыя Богородицы ходити невозбранно во дни и в нощи. Паки же в другую нощ виде во сне мучащаго его нечистаго беса во образе девицы, аки понужающаго с собою на скверное смешение, и паки же в перьвую нощ явлейся ему человек, тойже возбнув его, повелевая ему молитися. Возбнув же он от сна и возбуди сущаго с ним в келии человека именем Харитона, помышляя, яко он его возбуждает на молитву. Изшед же вон из келии ко церкви Святыя Богородицы и молися на монастыре яко два часа. И паки вниде в келию свою, явления же своего не поведа тогда. Паки же в третию нощ, свитающи среде, виде видение во сне, аки старец келарь того же честнаго монастыря именем Кирил пришед к нему во свете велице, глаголя: «Июдо, востани, се Богородица прииде посетити тебе, иже избави от мучащаго тя нечистаго беса». Бе же той предпомянутый инок Кирил уже многолетен сый, яко девятидесяти лет, иже и по се настоящее время еще жив сый, во святей обители сей богоугодно живый. Возбнув же Иуда от сна своего, и свет единаче видя в келии чювственныма очима. Абие же утро шед во церковь, и пад пред чюдотворным образом Пречистыя Богородицы, со слезами моляшеся. Братия же начаша вопрошати его. Он же не смеяше поведати видения того и исцеления своего. Обачеже[4524] поведа пред всеми со многими слезами, и вси прославиша Бога и Пречистую Богородицу о бывшем от нея чюдеси. Человек же той оттоле здрав бысть от великаго недуга того, благодаря и славя Христа Бога и Пречистую Богородицу.

Чюдо 18 о старце Ионе того же монастыря Черногорскаго. Понеже убо предивно чюдо содеяся в последнем роде нашем милостивным посещенном и благоволением Творца всему Господа нашего Исуса Христа и рождьшия его Пресвятыя и Преблагословенныя Владычицы нашея Богородицы и Приснодевы Марии пред чюдною и чюдотворною ея иконою, честнаго и славнаго ея Одигитрия, еже есть крепкая помощнице, яже наричется Грузинская, в Двинстей области близ Студеного моря, на реце Пенеге, во обители ея на Черной горе. Содея же ся сие преславное чюдо сице.

Бысть некий чернец именем Иона, сожитие имея преже во обители Пресвятыя Богородицы, иже есть на Черной горе. Поведа вещь предивну, яко: «Пришедшу ми во обитель Пречистыя Владычицы нашея Богородицы и Приснодевы Марии на Черную гору, иже на Пенеги реце, и жившу ту неколико время во обители той. И по неколицех времени от насилия небоящихся Бога ту живущих человек отъиде от обители тоя, не могий стерьпети. И пришедшу ми во обитель Живоначалныя Троицы, иже есть наричется Сиский.[4525] И препроводившу ми ту некое время. И по благословению обители тоя игумена и братии послан бысть на ловитву рыбную на море великое окиян, в весь, нарицаемую Варзугу. И пребывающу ми на ловитве той в веси предиреченной, и внезапу разболеся недугом тяжким, и разслабишася вси состави тела моего, яко не мощи ми ни с места двигнутися никаможе. Сущии же со мною работницы едва посаждаху мя, и держаху, и даваху ми ясти. Аз же едва и пищу приимах усты моими, и не сведах себе жива или мертва. И пребывах тако, стража в болезни той люте, томим яко три месяцы. И во уме своем воспомянух преславныя и несказанныя чюдеса, бывающия от иконы Пречистыя Богоматере, честнаго ея Одигитрия, иже на Черной горе, и первое свое обещание, еже жити во обители тоя, и исхождение от обители ея. И возопих умилно в лютой той болезни со слезами сице: „О всемилостивая Владычице Пресвятая Богородице! Помилуй мя окаяннаго и прости мя грешнаго от лютыя болезни, яко да шед паки во обитель твою, отнюдуже неразумием своим изыдох, и да плачюся греха своего, еже согреших к тебе, Владычице!” И внезапу от болезни тоя успе, и неколико время сном обият быв. Бяше же ту в дому том живяше некая жена, овдовевши от мужу своего. У нея же дщи в мале возрасте во младенчестве сущи. И слышал ея, глаголющи к матери своей сице, яко прииде Святая Богородица ис Черной горы, и исцелила старца Иону, и простила его. Аз же почивах, и недоумехся, и к Богородице умилно моляхся. И внезапу востах пред всеми, и седе, и нача в том часе ходити, яко николиже имея в себе болезни. И прославиша вси Бога и Пречистую его Богоматерь о исцелении болезни моея. И скончав порученное ми дело по благословению Живоначалныя Троицы игумена и братии обители тоя, и изыдох оттуду, и приидох во обитель Пречистей Богородицы в Черную гору, и молебное совершив, и благодарение о своем исцелении воздах Христу Богу нашему и Пречистей его Богоматере, поведая всей братии обители тоя все, случившееся мне. И пребывах прочее во обители ея никакоже исходно, бояся оного страшнаго за грехи своя прещения[4526]». Содея же ся сие преславное чюдо в лето 7147-е (1639) в славу Христу Богу нашему и Пречистей Богородицы.

Чюдо 19 о некоем юноши Василии, како даровася прозрение очию от иконы Богоматере. Но како возмогу недостоин сый, недостойне имея устне, поведати таковая, но обаче надеяся на неизреченныя щедроты Сына Божия и того рождьшия молитвы, и милость, и заступление о бывающих предивных чюдесех Богоматере, от честныя ея и чюдотворныя иконы.

Некий чернец тоя же Черногорския обители именем Дионисий поведа сице, яко еше житие имуще в мире з женою своею и с чады, и домовная строявшу, якоже обычай человеком в селех тружатися земледелия, и прочая домашняя потребы, иже суть в суете мира сего. И имея у себе сына именем Василия. Сему отроку случися болезнь люта на очи его, и не виде света сего за два лета никакоже. Житие же свое имяше предреченный старец близ обители тоя, яко пять поприщ, в веси, нарицаемой Валдокурьи. И обещахся с верою ко образу чюдотворному Пресвятей Богородицы, честнаго и славнаго ея Одигитрия, и поведох его во обитель сию. «И бывшим нам близ обители тоя, внезапу узре отрок яко мало света. И егда достигши обители тоя и ко Пресвятей Богородицы молебная совершивши, и абие совершенно прозре, яко николиже имея в себе болезни. Видев же аз, отец его, сие преславное чюдо, и слышах и иныя безчисленныя чюдеса, бывающия от иконы Пречистыя Богоматере, и оставив мир, и пострижеся в том монастыре». Такоже и исцеленный сын его пребысть со отцем своим во обители той, тружаяся на братию, славяще Бога вкупе и Пречистую Бгоматерь о исцелении своем. Содея же ся сие преславное чюдо в лето 7144-е (1636).

Чюдо 20 о исцелении больнаго. Понеже убо Божия Матере повсюду преславныя восияша чюдеса от Пречистыя и многоцелебныя иконы Богородичны, честнаго ея Одигитрия. И яко великий светь, и яко солнце пресветлое сияющи и нигдеже утаитися могущу. Понеже бо везде Пренебесная Царица, не точию в ближних странах, но и в далних, милостивно назирающи, якоже бо сице содеяся преславное чюдо.

Человек некий именем Василий Феодотов сын тое же Двинския области сожитие имея по реце велицей Двине, на острову, пореклом Марилов. Сему Василию случися люта болезнь зело, иже наричется шепота. И от тоя болезни опухло лице его и все тело. И от очию его зрак отъятся, и ниоткуду надейся помощи. И продолжися болезнь его яко на два месяцы. И поведаша ему нецыи тоя веси соседи его о бывающих преславных чюдесех Пречистыя Владычицы нашея Богородицы, от чюдотворныя иконы ея Одигитрия, иже наричется Грузинская, на Пенеге в Черной горе. И егда приспе Светлый день Благовещения ея марта в 25 день в лето 7154-е (1646), о дивное чюдо и преславное! Егда он больный изрече со слезами ко Пресвятей Богородицы: «О Пресвятая Мати Божия, помилуй мя и исцели мя от лютыя сея болезни на пресветлый свой праздник честнаго Благовещения, яко да шед ко иконе Пречистаго образа твоего, честнаго Одигитрия, якоже поведаша мне, в Черной горе, и обещание свое елико по силе исполню!» И в том часе абие едином оком прозре. И нача паки велми из глубины сердца своего со слезами вопити, да подаст ему Пренепорочная Владычица совершенное исцеление. И внезапу бысть здрав, яко николиже в себе болезни имый. И по исцелении своем никакоже умедли, но вскоре пришед во обитель Пречистыя Богородицы на Черную гору и поведая всей братии совершенное свое здравие от чюдотворныя иконы Богородичны. И молебная совершив, и отъиде в дом свой, славя Бога и Пречистую его Богоматерь.

Чюдо 21 о исцелении болнаго. Некий человек Илия житие имея по реце Пенеге в веси, нарицаемей Заозерие, растояние имея от обители Пречистыя Богородицы яко седмь поприщ вниз по реце Пенеге. Сему же случися болезнь зубная велми люта, и зрак лица развратися, и око его затворися. И абие обещася во уме своем ко Пресвятой Богородицы, честнаго ея Одигитрия, Грузинский поставити свещу. И не возможе доити болезни ради тоя во обитель и посла свещу свою тое же обители Пресвятей Богородицы со иноком Макарием, бывшу же ему в то время у него посещения ради. И егда пред Пречистый образ постави прежереченный инок Макарий свещу ту, и в том часе видит человека того, грядуща здрава во обитель ко Пресвятей Богородицы и поведая свое исцеление. И совершив молебная, отъиде в дом свой, славя Бога и Пречистую Богоматерь.

Чюдо 22 о священноиереи Андреи. По сих же убо временех прослыша повсюду Богоматере, от чюдотворнаго образа ея предивная исцеления с верою приходящим. Священник некий именем Андрей Гаврилов из веси, нарицаемыя Малыя Немнюжки, поведа сице вещь преславну, како даровася ему исцеление Богоматере от чюдотворныя ея иконы Одигитрия, иже наричится Грузинская, в Черной горе. «Случися ми, — рече, — болезнь люта зело, и не виде света сего очима моима четыре месяцы. И внезапу в недоумении быв мнозе, ниоткуду чая помощи. И слышах о бывающих чюдесех от чюдотворныя иконы, образа Пречистыя Богоматере. И обещахся ити во обитель, и молебен совершив, и абие прозре, яко николиже болех, и бысть здрав. И отъиде в дом свой, славя Бога и Пречистую Богоматерь». Содея же ся сие преславное чюдо в лето 7148-е (1640).

Чюдо о жене, иже вне ума бысть, 23. Не мню убо праведно и сие молчанию предати, еже содеяся в лето 7150-е (1642) во святый Великий пост. Прииде некая жена именем Феодора, родом Двинския области от веси, нарицаемыя Мудьюги, близ Студенаго моря за три поприща и поведа сице: «Случися убо мне вне ума быти многое время. И слышах бывающая преславная чюдеса от иконы Пречистыя Богоматере, иже в Черной горе, и обещася ити во обитель ея и молебная совершити. Бяше бо разстояние веси тоя от обители тоя яко 100 и пять поприщ, но и вящши[4527]. И егда доидох обители тоя, и совершив же молебная ко Пресвятей Божии Матери, и в том часе от великия тоя немощи здрава бысть, яко ни весма видех привидения дияволя. И отъиде в дом свой, славя Бога и Пречистую его Богоматерь».

Чюдо 24 о жене разслабленей. Паки убо не подобает и сего молчанию предати, еже содеяся в нынешнее время последнее в лето 7157-е (1649). Некая жена тоя же Двинския области Сояльского стану, веси, нарицаемыя Заозерие, лежаше в разслаблении лета доволна. И слышав бывающая предивная чюдеса от чюдотворныя иконы Богоматере, честнаго и славнаго ея Одигитрия, иже наричется Грузинская, во обители на Черной горе. И повеле нести себе во обитель прежереченную на Черную гору. И сродницы ея едва донесоша до малыя ладиицы на одре болну сущу, и живота своего отчаявся, и никакоже ногама могущи двигнутися. И егда привезоша ея близ монастыря к селу, нарицаемое пореклом Плещево, и внезапу болная та ставши со одра своего, и поиде на гору сама о себе. И видевше сущии ту людие, и радости наполнившеся, и воздаша хвалу Богу и Пречистей его Богоматери. Жена же иде, и молебная ко Пресвятей Богородицы совершив, отъиде в дом свой, радуяся, проповедая великое и неизреченное милосердие Христа Бога нашего и Пречистей его Богоматери.

ЧЮДО преславно Пресвятыя Владычицы нашея Богородицы и Приснодевы Марии, содеяся от чюдотворныя иконы ея, честнаго и славнаго Одигитрия, иже наричется Грузинская. Чюдо 25. «Тайну цареву добро есть таити, а дела Божия проповедати преславно есть». Не хранити бо тайны царя — зело беду души наносит. Сице убо и преславныя дела Божия молчанию предати — наипаче пагубнейши души бывает, якоже бе и ныне содеяся напоследок в последнем нашем роде на утвержение истинныя православныя християнския веры и на посрамление неверным, не хотящим поклонятися и почитати Пречистаго вочеловечения образа Христа Бога нашего и рождьшия его Богоматере, Пресвятыя Владычицы нашея Богородицы и Приснодевы Марии. О них же написа блаженный Иоанн Дамаскин сице: «Прокляты да будут непоклоняющиися, ни чтущии Пречистаго образа Пресвятыя Владычицы Богоматере с Превечным Младенцем Господем нашим Исусом Христом, имже кончина будет, вечная погибель». Мы же убо, правовернии, вси целуем любезно и почитаем образ Пречистыя и Приснодевы Марии и с Превечным ея Младенцем — Господем нашим Иисусом Христом, яко на самую истинную Матерь нашу Богородицу Владычицу во уме своем зряще, и яко Пренебесней Царице страхом и любовию припадающе. Страхом убо греха ради, любовию же спасения ради. Понеже убо достойно, аще и недостойным, коснутися к поведанию чюдному Богоматери безсмертия источнику, к великому и славному чюдотворению. Понеже бо случися вещь предивна, и милость превелика Богоматере от чюдотворнаго ея от образа. Якоже некий едемский источник безчисленныя безсмертия сладкия воды источая, понеже бо праведным Божиим великим милосердием и изволением Ея, Пренебесныя Царицы, како возлюби и изволи, яко жива, и восхоте уселити жилище себе с Превечным Младенцем во убозем таковем месте, уселитися и пребыти, яко во Святей горе Синайстей. О великое твое заступление печалным, и бедным нам помощница, и спасение миру, и утвержение, милости пучина, Божия мудрость, источник мирови, Одигитрие! Воспоем, вернии, славным ея заступлением хвалящеся неизреченно, еяже изволением наипаче восхоте прославити последнее сие место в последнее время и честный своим осенением осенити, и прославити, и просветии. И излия богатно от чюдотворнаго своего образа великую свою неизсказанную чюдотворную исцеления благодать. Бысть же сице в нынешнее настоящее время в лето 7158-е (1649) октября в 25 день при державе благочестиваго и христолюбиваго царя и великаго князя Алексея Михайловича всеа Русии, и при сыне его благоверном и благородном царевиче князе Димитреи Алексеевиче[4528] всеа Росии, и при богомолце отце их, великом господине святейшем Иосифе патриархе Московском и всеа Русии,[4529] и при митрополите Никоне великаго Новаграда и Великих Лук,[4530] и при строители святаго места сего, Черногорския пустыни, старце Сергии, яже о Христе з братиею, содеяся чюдо преславно от иконы Пресвятыя Владычицы нашея Богородицы, честнаго и славнаго ея Одигитрия, иже наричема Грузинская.

Приидоша убо некия две жены во святую ту обитель Пречистыя Богородицы, честныя и славныя ея Похвалы, в Черную Гору от веси, нарицаемыя Марьины Горы, растояние имущи от обители яко 100 поприщ и вяще. Имя единой Евфимия, друзей же Феодосия. Евфимия же убо поведа сие преславное чюдо, случившееся ей: «Бывшу ми, — рече, — в болезни 9 месяц и болевшу ми тяжкою немощию, яже наричется щепота. И от немощи тоя разслабишася вси составы тела моего, и никакоже с места своего востати не могущи отнюд. И сице лежащу ми в болезни той лютой долгое время сие. И слухоме слышах бывающая чюдеса преславныя от иконы Пречистыя Богоматере, честнаго ея Одигитрия, иже во обители на Черной Горе. И во уме своем помолившися, лютою болезнью одержима, и обещася ити во обитель Пречистыя Богородицы пеша. О великое и неизследимое милосердие Богоматере! В том часе бысть здрава, якоже никогда болезни имеющи». И слышавше сие преславное чюдо окрест веси тоя живущии людие, и хвалу воздаша Всещедрому Богу и Пречистей его Богоматере.

И возвестиша сие чудо в веси, отстоящей от тоя яко пять поприщ, пореклом наричется Пукшенга, прежереченной жене Феодосии. Сущи ей тогда в недузе своем лежати 14 лет и никакоже со одра своего в та лета воставающи. Слышавши же сие преславное чюдо, возопивши велми во стонании сердца своего умилне: «О Всемилостивая Владычице, помози окаянней страннице в сей тяжкой болезни, избави мя от долголетнаго сего недуга!» И многая моления со слезами изрече. И обещася, рече: «Аще исцелиши мя, Владычице, да иду пеша до честнаго образа твоего». О дивное и несказанное и недоведомое человеческу уму содеяся преславное чюдо! Како от толикия долготныя болезни во едином часе пременися и бысть здрава, якоже николи болезни имевши. О великое милосердия Богоматере и неистекаемы пучины щедроть! Кто может исповедати или изследити, наипачеже в нынешнее конечнее время и в последней роде содеяся таковое великое и неизреченное милосердие Богоматери! И в том часе воставши со одра своего здрава и слезы теплы от радости испущая. И забывшу скорбь, яже преже 14 лет на одре лежащи и никаможе поступающи. Любовию распаляющися, поведающи всем сущим в веси той преславное милосердие Богоматери. И во уме своем помышляше: «Аще бы толик путь единем часом минути». И сия слышавше веси тоя людие, и ужасошася, и радости исполнишася, похвалныя песни Богородицы воздающе, не токмо старии, но и малии младенцы радости исполнившася о сем великом милосердии Божия Матери. И шед к прежереченней жене Евфимии в другую весь, ейже преже бысть исцеление от Пренепорочныя Матери Божия, от чюдотворныя ея иконы, и поведавшие ей свою немощь, еже бысть в четыренадесяти летех, и како исцеление получи помощию Пресвятыя Богородицы. И согласистася, поидоша пеши к доброй исцелительницы во обитель Пресвятыя Богоматере, к чюдотворней ея иконе. Егда достигоша радостию обители тоя и возвестиша преславное сие чюдо строителю святаго места того и братии, каяждо свое исцеление. И молебное совершивше, и любезно целовавши радостию, и со слезами обливающеся, благодарение воздающи Всещедрому в Троице славимому Богу и Пречистей его Богоматери. И отъидоша в домы своя, поведающе преславное свое исцеление во всякой веси. Сия убо мы видевше, недостойнии, своима очима и слышахом от уст тех жен истинное их исцеление и велию веру ко Пречистей Божии Матери. И со слезами умилне зряще на Пречистыя ея лица зрак, вопиюще: «О Пренебесная Царица, Богородице Марие, светоприемнице божественнаго света, вместилище и престол Божияго слова, пророческое зерцало, апостольская проповедь, мучеником страдания, венче святителем, похвала преподобным, светлое песнословие, и помощнице праведным, и всем святым ликование, вселенских церквей чюдная похвало, царем православным держава непобедимая, архиереем светлый венче, и всего православнаго християнства божественный покрове и помощнице, всяческих зол избавление, и грехом разрешение, и вечному животу наставнице и божественный ходатай! Даруй убо, о Владычице Богомати, заступление и помощь светло и радостне почитающим твоя неизреченная и дивная проповедати чюдеса честныя твоея Богородичны иконы на спасение и заступление последним родом, и алчющая сердца наша напитай небесною пищею, и веселия духовнаго исполни, и смирение даруй в мыслех наших, и страх Божий всади в сердца наша, и любовь нелицемерну утверди в душах наших, и на всяк путь божественных заповедей настави, еже ходити по заповедем Сына твоего, Господа нашего Иисуса Христа, емуже слава всегда, ныне и присно и во веки веков! Аминь.

Чуюдо преславно Пресвятыя Владычицы нашей Богородицы и Приснодевы Марии, содеяся от подобия тоя чюдотворныя иконы, ея честнаго и славнаго Одигитрия, иже наричется Грузинская. Како исцели отроча болное в царствующем граде Москве, Государевы сребряные полаты сребреника именем Гавриила. «Тайну цареву добро есть таити, а дела Божия проповедати преславно есть». Не хранити бо тайны царя — зело беду души наносит. Сице убо и преславная дела Божия молчанию предати — наипаче пагубнейший души бывает, якоже бо и ныне содеяся напоследок в последнем нашем роде на утвержение истинныя православныя христианския веры и на посрамление неверным, не хотящим поклонятися и почитати вочеловечения образу Христа Бога нашего и рождьшия его Богоматере Пресвятыя Владычицы нашея Богородицы и Приснодевы Марии. О них же написа блаженный Иоанн Дамаскин сице: «Прокляти да будут непоклоняющиися, ни чтущии Пречистаго образа Пресвятыя Богоматере с Превечным Младенцем, Господем нашим Иисусом Христом, имже кончина будет, вечная погибель». Мы же убо, правовернии, вси целуем любезно и почитаем образ Пречистыя и Приснодевы Марии с Превечным ея Младенцем, Господем нашим Иисусом Христом, и яко на самую истинную Матерь нашу, Богородицу Владычицу во уме своем зряще, и яко и Пречистей Царице страхом и любовию припадающе. Страхом убо греха ради, любовию же спасения ради. Понеже убо достойно, аще и недостойным, коснутися к покаянию чюдному Богоматери безсмертия источнику, к великому и славному чюдотворению ея. Понеже бо случися вещ предивна и милость превелика Богоматере от подобия чюдотворнаго образа ея. Якоже бо некий источник едемский безчисленныя безсмертия сладкия воды источая, и якоже Сын тоя и Бог всякой твари Господь наш Иисус Христос и прежде показа своея милости благодать на человечестем роде, како посла своего лица зрак, воображение, на убрусе во Едеский град иже ко Авгарю во исцеление,[4531] тако и сия Пренебесная Царица и Бога нашего Мати показа лучи своея благодати, тоя чюдотворныя иконы подобие, и удиви народи царствующаго града. От нихже мало нечто хощу поведати вашей любви, и да не забвением глубиною и сие покрыто будеть.

Бысть же сице в нынешнее настоящее время, в лето 7162-го (1654), 1 недели святаго и Великаго поста, при державе благочестиваго и христолюбиваго царя и великаго князя Алексея Михайловича всея великия и малыя и белыя Росии самодержца, и при сыне его, благоверном и благородном царе- виче князе Алексее Алексеевиче[4532] и при богомолце святейшем Никоне патриархе Московском и всея Росии, и при митрополите Макарии Великаго Новаграда и Великих Лук.[4533]

Сребряник некто именем Гаврило Евдокимов слышав, в Двинском уезде на Пенеги реце, что на Красной горе, во обители от тое чюдотворныя иконы Пречистыя Владычицы нашея Богородицы и Приснодевы Марии, честнаго и славнаго ея Одигитрия, иже нарицается Грузинская, что Бог творит преславная чудеса. И в Троицы славимый Господь Бог Вседержитель восхоте прославити тою чюдотворною иконою имя Матери своея в царствующем граде Москве. И милостию своею вложи ему Бог и Пречистая Богородица желание в сердце его, чтобы ему, Гаврилу, видети было своима очима того чюдотворнаго образа подобие и внести освящения ради в дом свой. И посылает по тое икону ученика своего в дом гостя Богдана Семенова ко священноиноку Макарию, посещения ради и благословения дому своего, понеже тому священноиноку Макарию тое же Черногорския обители прилучися тогда быти за тою чюдотворнаго образа подобием на Москве некоего ради орудия монастырьского. И не презре Бог желания сердца его и сподоби его, Гаврила, видети тое икону и внести в дом свой, радуяся, славя Бога. И певше молебная пред тем образом о исцелении отрочате своего от тяжкия и смертныя болезни. И обещася написати образ подобия тоя чюдотворныя иконы Одигитрия Грузинския и поставити в дому своем. Оле чюдо! И по вере его дарова ему Бог и Пречистая Богородица, от тоя иконы отрочате его от тоя тяжкия болезни и лютыя скорое исцеление. Якоже рече Господь: «Верующему вся возможна суть»[4534] и «По вере, ваю, буди вама».[4535]

И той человек, славя Бога и Пречистую Богородицу о исцелении отрочате, и той нача поведати, и немногим сие чюдо исповедав. И слыша от нею некто человек, Прокопий имянем, таковое милосердие Божие на роде человечестем и мнев, яко лжа есть, а не истина. И Всемилостивый Христос Бог наш не остави его в таковом неверии погружатися, ища нашего спасения, восхоте видением истинну уверити, яко видение слуха вернейша да бывает. Итого же году месяца майя в 11 день ин некий человек именем Иван Василиев сын Филатова да Прокопей Борисов, прослутием же Семой Шешенин, от великия реки Двины с Колмогорского посаду. И придоша паки в дом того же гостя Богдана Щепоткина, понеже и тема случилося тогда тамо же сущим быти. И поведаша про товарища своего живуща на Колмогорах же Ивана Минина, что он в конечной немощи болен во иступлении ума, и в концы своего живота мучим от нечистаго духа, и божеству стужает, и святым иконам не кланяется. И чтобы тое богородичну икону внести к тому болящему Ивану в дом гостинные сотни Михаила Кошелева. И преждепомянутый он священноинок Макарий вручает им по прошению их тоя чюдныя иконы подобие, Одигитрия Грузинския, и посылает к болевшему и беснующеимуся. Той же болящий увидев в дому своем тое богородичну икону и, перекрестив лице свое, поцеловав икону, и в той час облегчися болезнь его. И оне колмогорцы, видяще того таковое преславное чюдо, и паки приходят к тому же черному попу Макарию и молят его, да идет к болящему, и поет молебная, и святит воду. И той священноинок Макарий к болящему приходит, молебная совершает и воду святит с приходцким Троицким священником с Савою Никитиным и с прочими церковными причетники, и тою освященною водою болящаго окропляет, и пити ему повелевает. И не презре Бог прошения раб своих, видя мучима человеческаго естества от нечистаго духа. И помилова раба своего, и дарова ему Бог милость свою молитвами Матери своея Пречистыя Владычицы нашея Богородицы и Приснодевы Марии, уверяя нас святым образом честнаго и славнаго ея Одигитрия и всех святых молитвами в царствующем граде Москве. От тоя иконы Бог даровал тому болящему в той час совершенное исцеление, и почал смысленно и в целоумии глаголати, и Богу со слезами молитися, и Пречистую Богородицу на помощ призывати, и Псалтырь говорити, и людей познавати, и ходити. А слежал в том недузе у того же Михаила Кошелева на подвории 10-ть недель. И в той же час видяще тоя преславныя чюдеса, от таковыя тяжкия и смертныя болезни скорое пременение во един час и в разуме исправление, и воспомянув прежереченный Прокопей прежнее свое мнение и неверие о первом чудеси от тоя иконы подобия чюдотворнаго образа о исцелении отрочате, обличая себе в поношении на чернаго попа Макарию, и в том поставляет свидетеля Бога и Пречистую Богородицу предо многими послухи, что одержим быхь прежде неверием и до сего преславнаго чюдеси. И воспомянув Божественное Писание, якоже рече Господь: «Верующим вся возможна суть от Бога». И милосердова о нем, и не остави его Бог и Пречистая Богородица погружатися в таковом неверии, желая нашего спасения, уверяя его преславными чюдесы. И сподоби его тое икону внести к тому болящему и беснующемуся, и поцеловати приложил своими рукама. И видяще тое преславное чюдо, и скорое в разуме пременение, и от болезни исцеление своима очима, и отложив неверие, и моля Бога со слезами, и прося прощения о первом своем согрешении и поношении. И обещася веру имети в дом Пречистыя Богородицы и до смерти своея. Да и мы, братие, веруем яко есть истина. Аще кто не верует истинны, да посещает Бог милостию в наказание за неверие наше и кривины ради душ наших, да и мы чаем и веруем правосудия Божия.

Ин некто человек Сояльского стану с Маркова Березника именем Феодор, пореклом Бетюков, от тоя же великия горы за два поприща, за рекою Пенегой, у негоже некто сын именем Аверкий от шести лет имея возраста своего. И случися убо отроку тому скорбь нека огнена, и слежащу ему в том недузе летнее время, и никакоже сходяща со одра своего, зелныя ради болезни той. И тако сему пребывающу. И абие отрок той сведен бысть в сон тонок и видящу ему в дому своем, якобы прииде некто муж в беле одежи и глагола ему: «Вели убо вести себя в Красную гору ко Пресвятей Богородицы Одигитрия, и принеси 2 свещи, и помолися, и исцелееши». И абие возбнув от сна того и нача сказовати домашним. Они же слышаще таковая, и приидоша во обитель, и болящаго принесоша, и обе свещи тии, и молебная совершивше месяца сентяврия в 8 день на праздник честнаго и славнаго ея Рождества, и совершенное исцеление получиша. И отъидоша в дом свой, воздающе славу Христу Богу нашему и Пречистей его Богоматере. Сие же чюдо нам тии сами поведаша.

Ино чюдо Пресвятей Богородицы. Ниже убо сие молчанию предати достойно, понеже бо праведным Божиим великим милосердием и изволением ея, Преподобныя Царицы, како возлюби и изволи, яко жива, и восхоте уселити жилище себе с Превечьным Младенцем, во убозем таковом месте уселитися, и пребыти яко во Святей горе Синайстей. О великое твое заступление печалным, и бедным нам помощница, и спасение миру, и утвержение, милости пучина, Божия мудрость, источник мирови Одигитрие![4536] Воспоем, вернии, славным ея заступлением хвалящеся неизреченно, еяже изволением наипаче восхоте прославити последнее сие место в последнее время, и честным своим осенением осенити, и прославити, и просветити. И излия богатно от чюдотворнаго своего образа великую свою и несказанную чюдотворную исцеления благодать.

Бысть же сице в лето 7163 (1655) марта в 21 день при строители святаго места Черногорския пустыни старце Сергии, яже о Христе з братиею, и при настоятеле священноиноке Герасиме. Приидоша убо некая жена во святую ту обитель честныя и славныя ея Похвалы в Гору Черную от веси, нарицаемыя с Тимощельи, Мезенския области, именем Пелагия Панфилова дочь. И поведа убо вещь сию случившуюся ей: «Случися убо мне болезнь очная, з два годы не видя очима нимало света». И от тоя тяжкия болезни не знаяше она, что есть, день или нощь. И бывшу ей тако в скорби, и в тузе немале, и от зелныя тоя болезни в сон сведена бысть. И прииде к ней аки глас жены некия, глаголющ: «Иди убо ты, о жено, на Красную Гору во обитель ко Пресвятей Богородицы. И обещайся помолитися, тоя убо возможно есть такия болезни исцеляти». И абие возбнух от сна, и в той час прозрех своима очима, и видех свет, и яко николиже болех, и бысть здрава и слезы теплы от радости испущая, и неизреченное милосердие Богоматере во уме своем имуще. И по мале времени прииде в монастырь, сие чюдо поведаша, и молебная соверши, и любезно целовавши радостию, и со слезами благодарение воздающе Всещедрому в Троице славимому Богу и Пречистей его Богоматере. И отъидоша в дом свой, поведающе преславное свое исцеление. И таковая убо мы видевше, недостойнии, своима очима, и слышавше от уст тех людей истинное их исцеление и велию веру ко Пречистей Божии Матери, и со слезами умилне зрящи.

О Пренебесная Царице Богородице Марие, светоприемнице божественаго света, вместилище и престол Божияго Словеси, пророческое зерцало, апостольская проповеди, мучеником страдания венче, святителем похвало, преподобным светлое песнословие, и помощница праведным, и всем святым ликование! О вселенских церквей чюдная похвало, царем православный держава непобедимая, архиереом светлый венче, и всего православнаго християнства божественный покрове, и помощнице всяческих, и зол избавление, и вечному животу наставнице и божественный ходатай! Даруй убо, о Владычице Богомати, заступление и помощ светло и радостне почитающим твоя неизреченная и дивная проповедати чюдеса честныя твоея Богородичны иконы на спасение и заступление последним родом, и алчущая сердца наша напитай небеснаго пищею, и веселия духовнаго исполни, и смирение даруй в мыслех наших, и страх Божий всади в сердца наша, и любовь нелицемерну утверди в душах наших, и на всяк путь божественных заповедей настави, еже ходити по заповедем Сына твоего, Господа нашего Иисуса Христа, емуже слава во веки! Аминь.

Ино чюдо Пресвятей Богордицы о жене, болящей очима. Понеже ни сему умолчатися могущу. Некая убо жена Калинина, пореклом Половинина, именем Мария, от веси Валдокурьи. И случися ей болезнь очная за два годы, уже и зрак отъяся от нея, яко не видети ей света сего. И ниоткуду себе помощи надеяся. И слыша от многих преславных чюдес от иконы Пречистыя Богородицы, иже наричется Грузинская, и веру держа во уме своем, и обещася молебное совершити. И не по многих днех прииде во обитель Пресвятыя Богородицы на Красную Гору, и певше молебная, и бысть ей облегчениеот тоя болезни. И не по мнозе явися жене той прежереченней Марии явление некое Божие во сне о иконе Пресвятыя Владычицы нашея Богородицы, честнаго и славнаго ея Умиления, еже есть Владимирския, о неюже прежде поведано бысть, иже прииде от Кеврольския области в Гору Черную. И глаголя ей: «Жено, почто презрела еси моея иконе помолитися и призвати на помощь, иже прежняя нарицается!» И абие же возбнув от сна того, и воставше со одра, и ужаса исполнися. И размышляя в себе о чюдном видении том. И паки второе прииде во обитель и молебное совершивше прежней чюдотворней иконе Богородичны Умилению на празник честныя и славныя ея Похвалы в славу Христу Богу нашему и того рождьшей Владычицы нашей Богородицы и Приснодевы Марии. И милости прося, и прощения со страхом и радостию, умилне, со многими слезами. И совершенное исцеление получи и прощение, и яко николиже таковой болезни имеющи во очесех своих. И видяще свет и сие же преславное чюдо нам поведа. И отъиде в дом свой, славяще Святую Троицу: Отца, и Сына, и Святаго Духа, ныне и присно и во веки веков. Аминь.

Ино чюдо Пресвятей Богородицы. Поведа нам некий человек мирянин, града Москвы житель. Помышляющу ему, яко оставити дом свой и изыти из града ради посещения Божия смертоносныя язвы. Бе бо в то время во граде Москве бысть великий мор на всенародное множество православныхе христиан. И на молитве став, Бога моляще, да управит путь его. И зря ко иконе, глаголание: «Пресвятая Богородице Владычице, помилуй и спаси, занеже на путь хощу итти!» И в ту нощь во сне явися ему образ Пречистыя Владычицы нашея Богородицы и Приснодевы Марии, на руку имущ Превечнаго Младенца Христа Бога нашего, глаголя: «Молися Богородицы Грузинской». Он же явление то в суете забы, и минувшу тому явлению с неделю. И паки помышляя, совещастася с товарищи бежати из града с женами и з детьми, да убежим от смерти. И паки августа в двадесятый день явися ему во вторый во сне Пречистая Богородица, глаголя такоже: «Молися Богородицы Грузинской!» И образ свой Пречистый показа. И той час став к заутрени, и молився во своей келии, и отпев полунощное правило, дожидался своего ходу, церковнаго благовесту к заутрени. И мало уснув в тонце сне. И паки явися той же образ Пречистыя Богородицы, глаголя: «Молися Богородицы Грузинской, что не на Глинне у мелниц, да сохранен будеши!» И сего ради явления Владычицы нашея Богородицы и Приснодевы Марии не исшед из дому своего. Нам исповедаша согрешения своя и благодаря Бога, попустившаго на нас такую казнь, да души наши не погибнут.

Сие явление видех и написал своею рукою торговой человек Мина Степанов сын, седит на Москве в Шелковом ряду.[4537]