Библиотека литературы Древней Руси. Том 16 (XVII век)

Иже прежде всех сый и всякая за всех[4345], подобает истинному человеку ведати, — Бог Отец безначален и неисписан[4346], вся уединяя и содержая, ни рожден, ни создан, безконечен, и безсмертен, превечен, Творец небу и земли, видимым же всем и невидимый. Сын же Единородный, Слово Божие, Исус Христос, от Отца прежде век, свет от света, Бог истинен от Бога истинна, прежде всех век, безначален и безлетен[4347], нас ради и нашего ради спасения сошедшаго с небес, и воплотися от Духа Святаго, от Отца исходящаго присно в Деву Марию. Родися без семени и на земли со человеки поживе, волею страсть прият, и смерть вкусив, и во гробе положися, и в третий день воскресе. И рукописание грех наших растерзав, и на небеса вознесеся. И седе одесную Бога Отца. Дух же Святый, Утешителю Благий и Животворящий, иже от Отца исходяй и на Сыне почиваяй. Един Богь во трех составех неразделен: Отец, и Сын, и Святый Дух, во свете пребываяй неприступней. Едино Божество, и едина сила, и едино существо — Троице Святая, поклоняемая и славимая.

Иже сотворивый небо и землю, и море, и свет, солнце и луну, и звезды, и древа полская[4348], и траву сенную[4349], и всяку душу живу: зверие, и скоти, и птицы небесныя, и рыбы морския, и гады пресмыкающиися по земли. И всяку тварь видимую и невидимую от небытия в бытие приведе.[4350] Якоже Давыд глаголет: «Словесем Господним небеса утвердишася, и духом уст его вся сила их».[4351] И сотвори аггелы и архаггелы, херувими и серафими, и вся воя небесная. И паки той же Давыд глаголет: «Творяй аггелы своя духи, и слуги своя огнь палящь».[4352] И постави же десятому чину воеводу Сатанаила. Сей же своею гордостию превознесеся и рече во уме своем: «Взыду на небо, и поставлю престол свой на облацех, и буду подобен Вышнему». И того ради свержен бысть с небес и со всеми вои чина его и наречен Сатана. И бысть тме началник и со отступными его бесы.[4353] Исайя бо рече: «Како спаде деньница заутра восиявающия, и виде Господь Сатану, спавша с небес яко молнию».[4354]

И сотвори Господь человека по образу своему и по подобию, и жену ему сотвори, и в Рай введе. И заповедь даст им от древа не ясти, еже разумети добро и лукаво[4355]. И ненавидяй добра роду человечю завистливый диявол прелсти их, еже преступити данную им заповедь. Того ради изгна их Господь из Рая, и сотвори им ризы кожаны, заповеда, рек: «Тружаяся, делая землю в поте лица твоего и яси от нея[4356]».[4357] Адам же изыде из Рая, и начат труд творити — землю делати, по словеси Господню, и питатися от нея, и славити Бога.

Темже[4358] и мы, братие, не будем сопротивны[4359] и равны Богу, по словеси Господню труды своя полагаем, якоже апостол Павел глаголет: «Подобает убо делателю преже от плода вкусити».[4360] И паки рече: «Иже не делает, да не яст».[4361] Добро есть и полезно, еже славити Бога без престани и покланятися в Троицы славимому Господу нашему Исусу Христу, еже показа нам светилника сего, праведнаго и непорочнаго чюдотворца Артемия. Воистину убо богоблаженнаго сего достойно прославити и пети усердно, образу его молитися, творящаго многа и преславная чюдеса и исцеления болным, и разслабленный, и слепым, и хромым, и всякими недуги различными здравие подающаго неотложно и неизменно[4362] благодатию Божиею, и помощию, и молитвами, и молением Пречистыя его Матере и угодника его святаго, великаго святителя и чюдотворца Николы, и святаго праведнаго, и новоявленнаго, и страстотерпца Христова богоблаженнаго Артемия. Но остану много глаголати, да не в забвение[4363] внидем, но проповедаем его житие и подвизание к Богу, еже бысть страдание его.

В лето 7040-го (1532) лета от создания миру в Двинском уезде по реку, глаголемую Пинегу, от Кевролы вверх, в веси, нарицаемой Веркола, родися сей богомудрый праведный Артемий от християну благочестиву родителю — отца его именем Козмы, рекомаго Малаго, и матери Полинарии. И воспитан бысть родителема своима. Бе же отроча[4364] пяти лет, и начат лишатися детскаго обычая, и возненавидев игры детския, возлюби Бога. И начат труд творити, земное дело[4365], и питатися от нея по Господню словеси, еже глаголано Адаму: «В поте лица своего яси от плоду земнаго». Уподобися труды своими древним праотцем Адаму, и Ною, и Аврааму, и Исааку, и прочим по глаголющему Павлу апостолу: «Подобает убо прежде делателю от плода вкусити, а иже не делает, да не яст». Сей праведный Артемий работая отцу своему и послушая его во всем неотложно, якоже Соломон рече в Притчах: «Сыне, послушай отца своего и не отрини наказания матере своея», «Сын премудр веселит отца»,[4366] и «Память праведнаго с похвалами бывает».[4367] И сам Господь рече: «Почитай отца своего и матерь свою и люби ближняго своего, яко сам себе».[4368] И паки рече: «Возлюбиши Господа Бога своего от всего сердца своего, и от всего помышления своего, и от всея душа своея, и от всея крепости своея».[4369] Праведный же отрок почитая отца своего и матерь свою, и любя Господа Бога, и моления творя многа, и милости от него прося.

Егда же достиже двою на десяти лет[4370], и бе же на поле, тружаяся землю орания, еже боронити[4371], и моляся Господу Богу. В то же время воста ветр велий Божиим изволением, и дыханию ветреному многу бывшу. Якоже Давыд глаголет: «Яко той рече, и быша; той повеле, и создашася»,[4372] «Хвалите Господа от земля, змиеве и вся бездны: огнь, град, снег, голоть, дух бурен, творящая слово его».[4373] И бысть облак темен с небеси аки нощь, изо облака же дождю многу, и гром велий, и молния неизреченная страшна. Якоже Давыд глаголет во Псаломстей книги: «Собираяй яко мех воды морския, полагаяй во сокровищих бездны. Да убоит же ся Господа вся земля, от негоже подвижатся вси живущей по вселенней».[4374] «Темна вода во облацех воздушных. От облистания пред ним облацы проидоша, град и углие огнено. И возгреме с небесе Господь, и Вышний даст глас свой. Пусти стрелы и разгна я, и молния умножи, и смути их. И явишася источницы воднии, и открышася основания вселенныя от запрещения твоего, Господи, от дохновения духа гнева твоего».[4375] Бывшу же многу гласу тройному. И абие[4376] над праведный Артемием зелнейша[4377] и крепчайша, с прещением велиим[4378] гром возшуме. Блаженный же ужасеся, и от того великаго ужаса и грому испусти дух, и предасть душу свою в руце Господеви. Якоже сам рече Господь: «Бежите от гнева Господня».[4379] И паки рече: «Аще гнев Божий, или молния и гром поразит человека, и аз сам сужду рабу моему».

Положено же бысть тело сего богоблаженнаго Артемия на пусте месте в лесе, еже нарицается Сосония, верх земли не погребено, одаль церкви.[4380] Господь же рече: «Прославляющаго мя прославлю именем моим».[4381] «Не может град укрытися верху горы стоя».[4382]

Бысть же некто клирик, еже есть дияк церкви Святаго Николы,[4383] именем Агафоник. В лето 7085-го (1577) той Агафоник ходя по тому месту лесом, идеже лежит тело святаго праведнаго Артемия. И возсия свет от места того — Господь Бог прославляет святых своих. Прииде же той Агафоник и обрете тело святаго цело, ничимь не врежено. И поведа християном веси тоя живущим[4384], что мощи блаженнаго обретошася целы плотию. Християне же неразумием взяша просто тело святаго Артемия, и привезоша к церкви, и положиша его тело в паперти святаго Николы. Господь же Богь Милосердый, не хотяй зла созданию своему, роду человечю, от диявола мучиму, хотяй угодника своего святаго богоблаженнаго, и богомудраго, и праведнаго Артемия прославити во страны тоя Кеврольския, и показует нам такова светилника, творящаго дивная и преславная чюдеса.

В то же лето бысть попущением Божиим, грех ради наших, християном належа[4385] велика и тяжка болезнь в людех, ту живущих, еже речется трясавицею болети.[4386] И от тое великие болезни мнози к смерти приближающеся, иные же и смертию скончашася, жены и дети. Владыка Господь наказует нас скорбьми и болезньми многими, дабы обратилися и покаялися от грех своих. Мы же, не престая, согрешаем и Бога прогневляем своими злыми делы. В то же время бе человек тоя веси именем Калинник. И лучися[4387] сыну его быть в том недуги, трясавицею болети зело. Человек же той моляшеся Господу Богу, и Пречистой его Богоматери, и святому чюдотворцу Николе, чтобы отроча его Господь избавил от тоя болезни. И шед к мощем святаго Артемия, и приложися ко гробу его, и взем покрова, еже есть береста, со гроба святаго Артемия. И прииде в дом свой и положи сыну своему на персех его на гойтян,[4388] и бысть здрав сын его от того часа. Возрадовася человек той радостию великою о сыну своем, благодарение воздаст Господу Богу и угоднику его святому Артемию и поведа всем християном чюдо бывшее. Християне же с радостию притекоша к церкви святаго Николы и начата молебная пения совершати и память творити богоблаженному Артемию. И умилосердися Господь о рабех своих, молитвами святаго Николы чюдотворца и святаго праведнаго Артемия преста болезнь в людех от того часа. Чюдеса же святаго богомудраго Артемия начат умножатися, исцеления многа бывати больным: слепым зрение, хромым хожение, глухим слышание и всякими недуги одержимыми здравия многа.

Кто убо сего страстотерпца не похвалит, творящаго таковая чюдеса! Лепо убо подобает по достоянию похвалити, но недоумею твоему достоинству[4389]. Темже убо с Давыдом речем: «В память вечную будет праведник»,[4390] и в память вечную память твоя. Честна пред Господем смерть преподобнаго сего.[4391] «Возвеселится праведник о Господе и уповает на нь».[4392] Якоже премудрый Соломой речет: «Память праведнаго с похвалами бывает, и благословение Господне на главе его».[4393] «Праведник, аще постигнет скончатися, в покои будет».[4394] «Похваляему праведнику радость людей»,[4395] безсмертие бо есть память его, яко от Господа познавается и от человек, и угодна Господеви душа его. Еже память праведнаго нас радостны и веселы творит, егоже поминаем днесь, не яко, да нашими похвалами лучше сподобится, но яко, да, воспоминаем, мы по возможному подобни будем[4396] Вси праведнии единаго естества быша. Не в той же ли воздух зряху, не ту же ли землю населяху! Но по величеством желания к Божии любве себе издаша, вся возмогоша, чюдеса творяху. Зрим убо сего добраго подвижника, творящаго велия чюдеса. О богомудре Артемие! Не забуди ны, но молися Христу Богу о нас грешных, яко да твоими молитвами благодать Божия осенит душа наша, и просветит нас светом разума истины, и наставит на правый путь, вводяще в Царьство Небесное, безконечное и блаженное!

Молитва. Владыко человеколюбче, Царю Небесный, Господи Исусе Христе Боже наш! Нас ради и нашего ради спасения на земли явися и со человеки поживе. Молим тя, Господи Вседержителю, Долготерпеливе и Многомилостиве, подаждь нам славити тя бодрено во вся дни живота нашего до последняго часа. Ели хощеши и можеши, велико ти есть, и неизреченно твое милосердие. Како молчит язык, таковое нам радости и веселия духовнаго исполни нас! Како убо возможем, или кими[4397] песньми возвеличити твое милосердие, или кими усты воспоем благодать твою неизреченную, еже показа нам такова праведника днесь! О Владыко Господи Исусе Христе Боже наш! Услыши нас грешных, молящихся тебе, и помилуй, и даруй нам сего праведнаго угодника твоего Артемия славити, и на помощь призывати, и образу его святому поклоняйся, и ко гробу припадати с верою молящимся подающему неизреченная чюдеса и исцеления многа! О предивный в чюдесех, святый и праведный Артемие! Молися Христу Богу о нас грешных и помилуй вся приходящая к тебе с верою, и молящаяся тебе, и поклоняющаяся образу твоему, и призывающая тя во скорбех на помощь! И буди им помощник и исцелитель скор и даруй им здравие неоскудно и помощь неослабну, молящимся тебе! И буди заступник сиротам и вдовицам, и всем подаждь, яже ко спасению прошение, и сохрани, и соблюди от всех зол, и болезней, и навет вражиих, ты бо предстоя Престолу Владычню! Молися неотложно о нас, грешных, Христу Богу нашему, яко тому подобает всяка слава, честь, и поклоняние, и велелепие, Отцу, и Сыну, и Святому Духу ныне, и присно, и во веки веков!

ЧЮДЕСА СВЯТАГО ПРАВЕДНАГО АРТЕМИЯ ЧЮДОТВОРЦА

Добро есть нам и полезно дела Божия проповедати и преславно творящая чюдеса святым и праведным сим угодником Христовым новый чюдотворцем Артемием, иже просия в чюдесех своих. Якоже Давыд глаголет: «Дивен Богь во святых своих, Бог Израилев, творяй чюдеса, Бог, прославляем восветлостех святых своих».[4398] Воистину убо сей чюдотворец неложная чюдеса творит и исцеления многа с верою к нему приходящим, иже бо повествуем дивная его чюдеса.

Чюдо первое. В лето 7092-го (1584) бысть чюдо дивно и преславно. Бе некто человек именем Павел. Бе же ему: обратися лице его назадь, еже и очи ему затворишася, и не видя ничтоже. Человек той пребысть тако, молящеся Богу и святому чюдотворцу Николе и воспоминая святаго Артемия. Скорый же на помощь святый Артемий дарует ему здравие. И бысть в той час: отвратися лице его, и отворишася очи его, и бысть здрав, яко николиже скорбя. Возрадовася человек той и прослави Господа Бога, и Пречистую его Богоматерь, и святаго чюдотворца Николу, и святаго праведнаго Артемия. И поведа человек той християном чюдо бывшее. Християне же похвалиша Бога и угодника его святаго Артемия, сотворшаго таковое чюдо. И сотвориша придел о себе близ церкви святаго Николы и, приступльше с верою, взяша мощи его, и внесоша во предел, и положиша в новый гроб, и прославиша Бога.

Чюдо 2. Ино чюдо хощу вам поведати, братие. В то же время, егда пренесоша мощи святаго Артемия во предел, прииде жена некая, принесе своего младенца, рукою разслаблена[4399]. И молебная сотвори Господу Богу и святому Николе, и приложи отроча ко гробу святаго Артемия, и бысть отроча здраво рукою. Жена же прослави Бога и святаго Артемия.

Чюдо 3. В то же время бе некая жена именем Ирина. Едино же у нея око велми болно бысть. И молебная соверши Господу Богу и святому Николе, и приложися ко гробу праведнаго Артемия. И бысть око ея здраво, яко николиже боле. И прослави та жена Бога и угодника его святаго Артемия и отъиде в дом свой, радуяся.

Чюдо 4. В та же времена бе некто человек именем Андрей. Бысть очима болен велми. И помолися Господу Богу и святому Артемию, и абие здрав бысть очима человек той. Прослави Бога и угодника его святаго Артемия.

Чюдо 5. Потребно есть ни сего забвению предати глубине[4400], но на свещник сердец наших воставляти.[4401] Бысть жена некая именем Мария утробною болезнию болна велми четыре на десят[4402] лет. И умираше часа на два и на три, и по вся времена тою болезнию одержаше. И слышав чюдеса, бывающая святым Артемием. И начат молитися Господу Богу, и святому Николе, и угоднику Христову святому Артемию: «О святый чюдотворче Христов Артемие! Избави мя от болезни сея и даруй ми здравие!» Святый же Артемий избавляет жену ту от болезни тоя, бысть здрава жена молитвами святаго. Жена же прослави Бога и святаго Артемия.

Чюдо 6. Ино чюдо хощу вам поведати, якоже Писание рече: «Тайны царевы добро есть хранити, а дела Божия проповедати преславно есть».[4403] Человек некий именем Аврам одержим зубною болезнию лет десять. Жена же его именем Евдокия бе одержима злою болезнию, еже речется трясавицею. И слышавши о чюдесех святаго Артемия. И моляшеся человек той и жена его святому Артемию, чтобы молитвами его Господь избавил от болезней их. И быша здрави молитвами святых и прославиша Бога и святых его, святаго Николу и Артемия.

Чюдо 7. Но и сие поведано будет. Некто человек именем Роман разслаблен лядвиями[4404]. И помолися святому Артемию, и бысть здрав молитвами святаго. Человек же той благодаря Бога и святаго Артемия.

Чюдо 8. Ниже убо и сие умолчано будет. Человек некий бысть именем Нифонт, бе отягчен утробною болезнию лет пять. И слышав святаго чюдеса, и помолися с верою святому Артемию, и святаго молитвами здравие получи. Он же воздав хвалу Богу и святому Артемию.

Чюдо 9. Иже и сие да не покрыется молчанием чюдо святаго. Бе человек именем Иван, кровоточив бе гортанию осми на десять[4405] лет. Уже ему близ смерти сущу. И помолися Господу Богу и святому Артемию с верою велиею, и здрав бысть человек той от болезни, славя Бога и угодника его Артемия.

Чюдо 10. Бе убо некая жена именем Мария, имея у себя отроча, болезнию одержима некоею: ничего не ядя, ни млека вкушая два месяца. И помолися жена та с верою святому Артемию о отрочате своем, и молитвами святаго Артемия избави Господь отроча от болезни тоя. Жена же благодарение воздав Богу и святому Артемию.

Чюдо 11. Человек некий именем Ермолай одержим нечистый духом. И помолися Господу Богу, и святому Николе, и угоднику его праведному Артемию. И бысть здрав от нечистаго духа молитвами святых. И славя Бога и святых его человек той, радуяся.

Чюдо 12. Ин человек именем Сергий бе одержим недугом — зеленою болезнию,[4406] бысть аки трава зелен и не можаше ясти хлеба. И слышав велия чюдеса, творимая святым Артемием, и притече ко святому, и молися с верою. И здрав бысть человек той молитвами святаго Артемия, хвалу воздав Богу, и отъиде в дом свой, радуяся.

Чюдо 13. Иже и сие несть праведно умолчати бывшее чюдо, сотворшееся святым и праведный Артемием. Бысть убо черноризец с Вятки, из града Хлынова именем Трифон, строитель монастыря святаго чюдотворца Николы Можайскаго,[4407] рукою разслаблен. И лучися ему быти у святаго Николы в Верколе. И слышав чюдеса святаго Артемия и приложися ко гробу блаженнаго Артемия. И бысть рука его здрава, яко николиже боле. Он же, благодарения пения воздав Богу и угоднику его, святому Артемию, отъиде, радуяся.

Чюдо 14. Человек же бе некий именем Артемий. Ему же бе случися беснующуся от лукаваго духа, не бысть ума у него годищное время. И приведоша его ко гробу святаго, и приложися к мощем святаго Артемия, и бысть здрав в целоумии, и, благодаря Бога и святаго Артемия, отъиде, радуяся.

Чюдо 15. Ин же человек некто именем Климент бе одержим трясавицею годищное время. И помолися Господу Богу и святому Артемию с верою велиею, и призывая на помошь святаго Артемия начасте[4408]. И молением здравие получи от святаго Артемия.

Чюдо 16. Иное чюдо святаго бе тому же подобно. Некто человек, емуже имя Евдоким, бывшу ему трясавицею страждущу лето и месяц шесть. И поведаше ему о чюдесех святаго Артемия. Он же начат молитися святому Артемию и на помощь призывати. И здрав бысть от болезни тоя Божиею благода- тию и молитвами святаго, дивнаго в чюдесех Артемия.

Чюдо 17. Не возноситеся, ни гордитеся, братие, но разумейте, како убо Господь прославляет святых своих. Фарисеово убо слово Бога прогнева, а мытарево стонание Бога умилостиви.[4409] Разбойник убо словом погибе, а другий словом в рай вселися.[4410] Рече Господь: «Возносяйся смирится, а смиряяй же себе вознесется»,[4411] якоже сие чюдо повествуем.

Бысть некий человек именем Иван, безумием же своим посмеяся чюдесем святаго Артемия, мнев[4412], яко неистинна есть. И абие слеп быв, не видя ничтоже. И возопив горце: «О святый праведный угодниче Христов, дивный в чюдесех Артемие! Согреших убо пред тобою, яко глаголах на тя неподобно слово. Не даждь ми погибнути, ныне убо разумех, яко не мечтанием и не ложная чюдеса твориши!» И много ему молящуся о том, якоже Соломон рече: «Иже хранит уста своя и язык, соблюдет от печали душу свою».[4413] Скорый же на помощь святый Артемий, услыша моление его, дарует ему здравие. И прозрев человек той очима своима, и бысть здрав, славя Бога и святаго Артемия, творящаго неложная чюдеса.

Чюдо 18. Бе некая жена именем Ирина болна ногою два лета. И молящеся много Богу, и призывая святого Артемия на исцеление. Темже молением исцеление получи, благодарив Бога и святаго праведнаго Артемия.

Чюдо 19. «Духовная убо духовный подобает прилагати»,[4414] — Писание рече. Святых чюдеса проповедати подобает. Чюдеса же святаго Артемия умножахуся. Бе же убо священницы, единому имя Иван, другому же Фома. Повелеша на дцках старыя гробницы прежней писати образы святаго праведнаго чюдотворца Артемия. И остася святаго гробницы стружек. Свяшенник же Иван собрав те стружки святаго гробницы, и в сохранение положи. И взимающи убо с верою стружки, якоже персть[4415], и от того исцеление получаху.

Бысть убо человек именем Панкрат, преехав с Пинеги на Великий Устюгь в лето 7109-го (1601) и привез с собою образ святаго Артемия гробницы. Егда и от того образа многа исцеления быша. Бе убо некия две жены, единой имя Анна, другия же Улита: одержими бе трясавицею пять лет. Той же священник Иван взем стружек гробницы святаго и положи женам ко кресту на гойтяны, и в том часе здравы быша месяца апреля в 11 день. И благодарите Бога и святаго Артемия.

Чюдо 20. Всегда же бывайте обычным человеколюбием Божиим, молитв ради праведнаго Артемия различная исцеления бывают недужным, овогда от гроба святаго, иногда же от образа его, овогда же стружек святаго гробницы емлюще, иногда тайно, иногда яве, иногда же покрова, еже речется береста, з гробницы святаго взимающе, исцеление получаху.

В лето 7109-го (1601) месяца апреля в 20 день бысть чюдо святаго Артемия. Бе некий человек, живяше во граде Великаго Устюга, сын боярской именем Иван Захарьин сын. Бе одержим трясавицею. И вземши у некоего человека береста святаго гробницы, и ношаше у себя на гойтяне. И от тое болезни здрав бысть молитвами святаго Артемия и воздав хвалу Богу и святому Артемию.

Чюдо 21. Ниже убо и сие посещение, бывающее святым, неудобно молчанию предати, но проповедаем преславное чюдо. В лето 7113-го (1604) декабря в 6 день, на память святаго Николы чюдотворца, прииде в Верколу некто человек именем Ларион Артемиев сын. Рожением вологжанин, житие имея на Колмогорах, рекомое Глинки. Поведа священником и всем християном: «Бывшу убо ми в недузе, очима болен, и бе не видя ничтоже от Покрова Святей Богородицы до недели Цветоносныя, еже речется Вербная.[4416] Бе же убо не вниде брашно во уста моя дней девять. И от тое великие болезни хотех удавитися и смерти себе предати, но не даша мне людие, вожаше мя, за руку держа. И явися ми святый праведный Артемий в видении, аз же в той час прозрех очима и видех святаго Артемия: ризы на нем белы, в левой руце имея посошек невелик, а в правой держа крест.[4417] И огради мя крестом и рече ми: „Человече, что стражеши, но востани, исцеляет тя Христос мною, рабомь своим Артемием. И поиди в Верколу, приложися ко гробу моему и исповеждь священнику и християном”. И взем руку мою, и крещаше мя рукою моею, и невидим бысть. Аз же воспрянув и здрав бысть, яко николиже боле. И от многия радости слезы испущая и благодарение воздая Богу и святому Артемию, дивному в чюдесех, и приидох дозде». Людие же слышавше и прославиша Бога и святаго Артемия о бывшей чюдеси.

Чюдо 22. В то же время, на память святаго Николы, человек некто именем Иев Иванов сын, пинеженин из веси, рекомыя Летопалы, поведа нам: «Бывшу мне в недузе разслаблен месяц пять, не могий двигнутися. И нача молитися святому Артемию. И явися ми святый в видении, рече ми: „Иди ко гробу моему, помолися, и исцелееши” Аз же возбнув[4418], в той час здрав бысть и, хвалу воздав Богу и святому Артемию, прииде дозде днесь».

Чюдо 23. Месяца декабря в 16 день поведа нам человек некто именем Иван Яковлев, рекомый Дежнев, тоя же веси Верколские. Бе дщи его именем Анна, бысть не виде очима ничтоже два лета, белмо бе на очесех ея. И помолися святому Артемию, и приложися ко гробу его, и бысть здрава очима. И отъиде в дом свой, радуяся и хваля Бога и святаго Артемия.

Чюдо 24. В то же лето месяца генваря в 23 день некий человек именем Харитон Семенов, кевролец, исповеда. Бысть на мори на Новой земли, рекомое на Вайгаче.[4419] И одержим бысть болезнию, завратися рука его ко плечю и бысть так все лето, не могий двигнути. «И явися ми святый Артемий во сне и рече ми: „Иди в Верколу, и помолися у гроба моего, и сотвори канон, и молебная пой, и исцелееши”. Аз же пришел, и сотвори по глаголу святаго, и приложился ко гробу его, и здрав бысть рукою моею молитвами святаго Артемия».

Чюдо 25. В та же времена бысть некая жена именем Акилина, Еремея Ушакова жена. Бе в недузе, не владея ничем в разслаблении. И помолися святому Артемию с верою, и явися ей святый Артемий и дарова ей здравие. Она же, радуяся, хваля Бога и святаго праведнаго Артемия.

Чюдо 26. Во времена же та бысть некий человек именем Алексей Павлов сын, рекомый Шестаков, кевролец. Лежа в недузе в щипоте[4420] четыре недели. Имея у себя сына именем Антония, от нечистаго духа лежа без ума и без памяти месец шесть. И врачев призываше и ничтоже успеша.[4421] И воспомянуша чюдеса святаго Артемия, и начат молитися с верою, и обеты положивше молебная пети. И быша здравы, благодарение воздая Богу и угоднику его святому Артемию.

Чюдо 27. Бе убо некая жена именем Фотиния дщи Назарова, а жена Сергия рекомаго с Выи, очима не видя ничтоже. И с верою помолися святому Артемию и бысть здрава очима. И радости исполнися, хвалу воздав праведному Артемию.

Чюдо 28. Ина жена именем Марина с Ваймуши, жена Елисея, рекомаго Матфеева, немогии[4422] утробною болезнию два лета. И помолися с верою Господу Богу и святому Артемию, и бысть здрава от того часа от болезни тоя, благодаря Бога и святаго Артемия.

Чюдо 29. Иное чюдо хощу поведати. В лето 7114-го (1606) бе человек Аверкий, рекомый Мамантов, живяше на Выи. Бысть же у него правая нога разслаблена, и не можаше ей двигнути. И помолися с верою святому Артемию, и от того часа здрав бысть ногою. И славя Бога и святаго Артемия с радостию.

Чюдо 30. И сие убо проповедано будет чюдо святаго. Бысть убо того же лета человек некто именем Вавила Васильев, живяше в Шардонемы. Болен бе, очима не видя. И обет положи ко святому. И пришед, приложися ко гробу святаго, и отъиде восвояси, радуяся, здрав бысть.

Чюдо 31. И сие убо не покрыется молчанием чюдо святаго. В лето 7115-го (1607) некий человек двинянин Еуфимий, глаголемый Игнатьев, имея же у собя сына именем Исайю. Сему же беснующуся от нечистаго духа. И явися племнику[4423] его во сне святый Артемий и рече: «Ведита его в Верколу ко гробу святаго Артемия». И возбнув от сна, и вземше, ведоша его в Верколу. И певше молебная, и приложиша ко гробу святаго Артемия. И отъиде от него бес, и бысть здрав человек той. И отъиде восвояси, радуяся и благодаря Бога и святаго Артемия.

Чюдо 32. В та же времена жена некая именем Евдокия Малахиева дщи, вдова с Веегоры, не владея бе ногама своима, от злых человек испорчена. А иная жена именем Дария, Федотова дщи, а Филипова жена, бе в недузе утробною болезнию одержима. И иная жена именем Екатерина, Михайлова дщи, Савельева жена, с Выи, в великой болезни не владея собою. И они помолишася святому Артемию с верою, и быша здравы от болезней сих, и славяще Бога и святаго Артемия.

Чюдо 33. В то же лето бысть некто человек именем Макария Гаврилов, живый в Нижной Шетогорки, лежаше болезнию одержим. И помолися святым чюдотворцем Николе и Артемию, и здрав бысть человек той молитвами святых Николы и Артемия. Прииде в Верколу и молебная отпев, отъиде, радуяся.

Чюдо 34. Во время же то бе жена именем Татияна, вдова с Выи, бысть болна велми хребтом и ногама, не можаше ходити. И помолися святому Артемию с верою и молением от святаго исцеление получи. Она же благодарения пения воздав святому Артемию и отъиде, радуяся.

Чюдо 35. Бысть человек в та же лета именем Герасим Игнатиев с Перемского. Прииде в Верколу, поведа: «Бывшу мне на мори, и небрежением шеймою[4424] руку вредил, и не можаше рукою своею ни двигнути на много время. И помолися с верою святому Артемию и здрав бысть рукою». Мы же слышавше сие чюдо и писанию предаше.

Чюдо 36. Бысть некто человек Макария именем, рекомый Молчанов, и бе у него дщи, не видя очима своима. И моляшеся святому Артемию и тем молением от святаго исцеление получи. И пришел, приложися ко гробу святаго, и бысть здрава очми, и отъиде, радуяся и славя Бога и святаго Артемия.

Чюдо 37. Ино чюдо поведано будет, бысть в то же время. Бе некая жена именем Еуфимия, Верколской волости, одержима утробною болезнию. Ины жены именем Пелагия, а другая именем Марфа Еуфимиева дщи одержимы болезнию холодною еже дрожание.[4425] И помолишася те жены святому Артемию с верою и здравие получиша от святаго. И жены же благодарение воздаше Богу и святому Артемию.

Чюдо 38. Бысть убо некий человек Калинник да Матрона Ивановы дети, рекомые Захаровы. У Калинника же бе болезнь утробная, а у девицы болеша очи. А ина жена именем Улита очми же болна велми от бури. И моляшеся святым чюдотворцем Николе и Артемию Верколским и многим молением здравие получиша от святых.

Чюдо 39. Бе некая жена именем Дария, не можаше чад родити. Иобет положи ко святому Артемию молитися, и от святаго исцеление получаше.

Чюдо 40. В лето 7116-го (1608). Бысть некая жена именем Анна Харлампиева дщи, рекомаго Ширяева, житие имеяше в Черевкове, мужа, Соловья рекомаго. Бысть же она в недузе, не бысть у ней ума и памяти два лета. И обет положите святым Николе и Артемию в Верколу молебен пети. Бысть здрава во уме молитвами святых и хвалу воздав Богу и святым его.

Чюдо 41. Многа убо чюдеса бываема и исцеления преславна святым и праведный Артемием. Их же множества ради несть лзе вместити, и в забвении ума невозможно есть по ряду писати. Мы же от многа нечто мало возвестим.

Бысть убо человецы, от многих стран приходяще ко гробу святаго Артемия, одержимы очною болезнию и исцеление получаху. Некий человек именем Иван Евстафиев с Вашки, глаголемо с Кривого, очима болен девять лет. Другий человек именем Максим с Выи очми болен два лета. Ин отрок именем Василий Лукоянов ис Кевролы не виде очима шесть лет. Ин человек именем Максим Матфеев с Пукшенги бе очима болен шесть недель. Ин человек именем Тимофей Семенов с Мезени очима болен месец. И жена некая именем Феврония Сидорова, вдова, болезнию очною одержима три лета. Ина жена именем Ирина Кирилова дщи, мужа именем Семена Ситкова, с Мезени очима болна пять недель. И девица некая именем Евдокия дщи Яковлева ис Кушкопалы в болезни очной не виде осмь дней. Ина девица Мария дщи Иванова ис Чаколы очною болезнию одержима лето и месяц шесть.

Сия же вси мужи, и жены, и девицы моляшеся святому Артемию чюдотворцу, и обеты своя полагаше ко святому молебная пети и ко гробу его молитися, и исцелеваше очною болезнию, здравы бываху. Слепии прозрение приимаху и славя Христа Бога и угодника его святаго Артемия, творящаго таковая чюдеса, приходя ко гробу его, обеты своя исполняюще.

Чюдо 42. Бе некто человек именем Алимпей Дмитриев, верхотоемец, и рукоделие сребряное имея. И случися ему в болезнь пасти, ногама своима не можаше ходити шесть недель. И помолися с верою святому Артемию. И бысть здрав человек той, благодаря Бога и святаго Артемия.

Чюдо 43. Девица некая бе именем Домникия дщи Иосифова с Малой Пинешки болна зело, рукою своею не владея четыре лета. И моляшеся Господу Богу и святому Артемию на много время. И молением здравие получи от святаго Артемия чюдотворца.

Чюдо 44. Человек некий именем Иосиф, рекомый Максимов, с Выи болезнию утробною одержим три лета. И помолися с верою святому Артемию чюдотворцу Веркольскому, и бысть здрав от болезни тоя, и хваля Бога и святаго Артемия.

Чюдо 45. Ин человек бысть именем Емельян Гуриев з Двины, некоей веси, рекомое Ступино, лежаше, болезнию одержим велми. И помолися святому Артемию и востав здрав человек той, хожаше, радуяся и славя Бога и святаго Артемия.

Чюдо 46. В лето 7118-го (1609) месяца декабря в 6 день, на память иже во святых отца нашего Николы Мир Ликийских чюдотворца, собрашася народи мнози, и приимше с верою и молением мощи святаго праведнаго Артемия, пренесоша от предела во церковь святаго Николы, и положиша честно во церкви.

В то же время человек некий именем Иван, рекомый Ростегай, тое же Верколские веси очима болен, не видя ничтоже два лета и шесть месец. И прииде во церковь, помолися святому чюдотворцу Николе и приложися ко гробу с верою праведнаго Артемия. И абие прозре и бысть здрав человек той, отъиде, радуяся и славя Бога и святых чюдотворцев Николу и Артемия.

Чюдо 47. Божия убо благодеяния воспоминати достойно нам, творимая святым и праведным Артемием. Егда же напасти и болезни на нас бывают, мы же убо тогда Бога молим, и призываем святых его на помощь, и обеты воскладаем на ся. Егда же исцеление и помощь получим, тогда же забываем и обеты, и моления своя исполняти, и паки в тяжкия напасти впадаем. Якоже повествуем сие бывшее чюдо, сотворшеся святым и праведным Артемием, той бо язык наш влечет к похвалению.

Бысть человек некто именем Патрикей Игнатьев Устюжскаго уезда, веси, рекомыя Кивокурския. Бе же одержим велми болезнию из детска, грыжею. И слышав человек той чюдеса святаго Артемия. В лето 7110-го (1602) человек той помолися с верою святому Артемию и обет положи итти ко святому и приложитися ко гробу его. И услыша святый моление его и здравие ему дарова. Человек же той пребыв много время и в забытие положи обет свой, еже обета ко святому. И во 118-ж (1610) лете о Рождестве Иоанна Предтечи[4426] нападе на человека того та же болезнь грыжа велми тяжко болии перваго. Человек же той начат молитися ко святому Артемию и воспоминати обеты своя, еже обеща ко святому: «О святче Божий, помози ми, избави мя от болезни сея, уже бо ти ныне не солжу, еже обеща к тебе, исполню обет свой». Услышав же святый Артемий моление его и избави его от болезни тоя. И бысть здрав человек той и мало-помалу живяше, во благоденствии пребывая. И паки забыв обет свой, еже обеща ко святому Артемию, и пребыв много время без печали. Бысть же убо во 121-ж (1612) лете о Покрове Святей Богородицы, нападе на очи человека того темень, и не видеев ничтоже пред собою человек той. И воспомянув обет свой, еже обеща ко святому Артемию, со слезами и возопи горце: «О святче Божий, великий Артемий! Согреших пред тобою аз окаянный, прости мя, отдай же ми грех, еже обещася к тебе и не исправих обета своего лености ради, ныне же за то стражду. Избави мя, святче Божий, от напасти сия и даждь ми прозрение очию моею, уже бо никакоже не солжу, еже обещах». Скорый же на помощь святый Артемие услышах моление и слезы человека того и дарова ему исцеление. И бысть здрав человек той. И с радостию прииде в Верколу ко святому Артемию месяца марта в 20 день, и молебная совершив, и облобызав честно гроб святаго с верою и со слезами многими, и исповеда сие преславное чюдо и свое неверствие. И отъиде в дом свой, радуяся и благодаря Бога и святаго угодника его чюдотворца Артемия.

Чюдо 48. В лето 7125-го (1617) некто бысть человек, емуже имя Сава, сын бе Карпов, Кевролского стану веси, рекомыя Лохоцкие, ногою боля велми три лета и не можаше владети ею. И помолися с верою святому Артемию и здрав бысть, хваля Бога и святаго Артемия.

Чюдо 49. Иныя человецы быша одержими очною болезнию. Человек бе именем Сергий, рекомый Щербинин, из Лавелы очима не видя полтретья лета[4427]. Ин человек именем Иван Евстафиев с Башки очми боляше девять лет. Ин человек именем Исакие Григорьев с Выи, бе же ему боляше очи два лета. Ин человек именем Емельян Гуриев з Двины, со Ступина, очима болен бе месяц. И жена некая именем Феврония дщи Гаврилова с Пукшенги не видя очима ничтоже шесть лет. И сии молящеся с верою святому Артемию, приходяще ко гробу святаго и исцеление и прозрение получаху, отхожаху благодарение воздая Богу и святому Артемию с радостию.

Чюдо 50. Бысть некто человек именем Иосиф, рекомый Шипунов с Подвинья, з Борку. Бе же у него болезнь на руце, и не можаше ею двигнути. И помолися святому Артемию, и абие здрав бысть, и славя Бога и святаго Артемия чюдотворца.

Чюдо 51. Некто человек, емуже имя Емельян, с Суры, веси, рекомые Явзорские, прииде в Верколу и поведа: «Бывшу ми в разслаблении, лежа седмь месяц, и помолися святому Артемию с верою, и бысть здрав». Прииде семо[4428], и отпев молебен, и отъиде, радуяся, восвояси.

Чюдо 52. Ин человек бысть некто именем Филимон, рекомый Худяков, рожение имея в Ракуле на Двине, а живяше в Кевроле. И бе у него недуг, на лице язвы опухше с кровию, и неможаше велми. И моляся с верою святому Артемию. Святый же избави его от болезни тоя, и бысть лице его, якоже и преже. И хвалу воздав Богу и святому Артемию.

Чюдо 53. В лето 7120-го (1612) бе некая жена именем Александра, мужа имея Матфея, рекомаго Фролова, тоеже веси Веркольския. Лучися ей быти от диявола лукаваго мучимой, и не бе у нее ума, хотя удти на лес. И блюдяше я велми. Она же начат много глаголати неподобная. И вязаше ю, и приведоша ея во церковь святаго Николы, и певше молебная. И приведоша ю ко гробу святаго Артемия, и приложиша к мощем святаго. И отбежа от нея лукавый враг диявол, и бысть здрава жена и благодарение воздая Богу и угоднику его святому Артемию, творящему таковая дивная чюдеса.

НОВЫЕ ЧЮДЕСА СВЯТАГО ПРАВЕДНАГО АРТЕМИЯ ВЕРКОЛСКАГО ЧЮДОТВОРЦА

Но и сие убо проповедано будет чюдо святаго Артемия. В лето 7143-го (1635) марта в 23 день по Указу великого государя царя и великого князя Михаила Феодоровича всея Русии ехал в Кевролу и на Мезень некий воевода именем Афонасий, зовомый Пашков,[4429] и быв он в Верколской волости и поехал. А у святаго праведнаго Артемия чюдотворца, у раки мощей его не был и молебного благодарения не пел. И егда он приехал в Кевролу, и не по мнозе времени нападе на сына его, отрока именем Еремея, велика и тяжка болезнь, еже речется трясавица. И духовному отцу священнику исповедался, и потом не бысть у него гласа ни послушания[4430], уже ему близ смерти бывшу. И воспомянув он Афонасий то, что проехал святаго чюдотворца Артемия, и у мощей раки его не был, и молебнаго пения не сотворил. И обещался ему, святому праведному Артемию, ехать помолитися. И поведает сыну своему Еремею по обещанию к чюдотворцу Артемию путь свой. Сын же его Еремий абие востал о себе и, держася за оконцо, учал отца своего Афонасия спрашивати, коим путем к чюдотворцу Артемию ехати. Отец же его в радости дивяся, видя таково преславное чюдо, что сыну его внезапу облегчало, от такова великаго труда и болезни о себе востал и спрашивает у него пути к чюдотворцу Артемию. Он же Афонасий величия Божия проповедаше и святаго праведнаго чюдотворца Артемия призывая со слезами на помощь. И потом повелевает сына своего Еремея нести к судну. Сын же его бысть весел и устнама своима осклаблятися. Отец же его Афонасий сугубо обещатися нача, видя сына своего весела и склабящася и яко никогдаже его такова в той скорби и в тяжцей болезни виде.

И месяца майя поиде Афанасей и с сыном своим к святому чюдотворцу Артемию. И егда они будут в веси Верколе, в церкви святаго Николы чюдотворца, где лежат чюдотворныя мощи святаго Артемия, и после утренняго славословия сотвориша молебное пение. И егда на молебне нача священник чести Евангелие, и той сын его Еремей учал быть безгласен, яко мертв. И по молебном пении приложиша его к святому Евангелию и святаго чюдотворца Артемия, ко образу его и к покрову раки мощей его. И взяша береста от раки его, в котором бересте обретены мощи чюдотворца Артемия, и даша сыну его, и повелешаему у себе носити на гойтяне. И совершено здрав бысть сын его от тоя болезни молитвами святаго Артемия, и благодарение воздая Господу Богу и угоднику его святому чюдотворцу Артемию. И поиде в путь свой по цареву велению в Кевролу, радуяся, и с ним вкупе сын его, яко николиже боле.

Видев же Афонасий безчисленое Божие человеколюбие, и милость, и преславная чюдеса, бывающая от мощей святаго праведнаго и богоблаженнаго чюдотворца Артемия, к симже наипаче и с сыном своим веру з доброжеланием показаше. И приложиша к прежнему своему обещанию, в той Верколские веси создаша церковь Божию прекрасну во имя святаго великомученика Артемия и обещанию святому праведному Артемию Верколскому чюдотворцу на том месте, идеже обретены быша честныя и чюдотворныя его мощи, и окрест церкви ограду и врата учиниша, еже есть и доныне.

О ПОГОРЕНИИ МИРСКИХ ХРАМОВ

В лето 7147-го (1639) месяца июня в 24 день бысть попущением Божиим, грех ради наших, в Верколской волости згореша два храма. Един храм святаго великомученика и страстотерпца Христова Георгия,[4431] а другий храм святаго Николы чюдотворца. И мощи святаго праведнаго Артемия Верколскаго чюдотворца поплели[4432]. Священник же тоя Верколския веси именем Лаврентей и християне скорбяще зело, и сетующе, и плачюще о нашествии внезапу таковаго ужаснаго труса. Над мощми же святаго праведнаго Артемия чюдотворца сотвориша часовню и новою ракою и покровом покрывают. И сия убо тако.

Чюдо 1. И того же месяца июня в 30 день человек некий именем Харитон Иванов сын, кевролец, поведа нам сице. Бысть он одержим утробною болезнию неколико время, и уже к смерти ему приближающуся. Прииде же ему во ум, и начат молитися святому праведному Артемию Верколскому чюдотворцу. И тем молением от святаго получи облегчение. И пришед в Верколу, и отпев молебная, и приложися ко гробу блаженнаго Артемия, и бысть совершенно здрав от тоя болезни. И отъиде восвояси, радуяся и славя Бога и его угодника святаго Артемия.

Чюдо 2. Месяца августа в 25 день некто человек именем Семен, зовомый Молчанов, с Малой Пинешки прииде в Верколу, поведа. Бысть он в недузе, не имея у себе ума цела месяц пять. И обет положи ко святым чюдотворцем Николе и Артемию в Верколу молебен петь. И бысть здрав во уме молитвами святых, и хвалу воздав Богу и святым его.

Чюдо 3. Той же прежереченный человек Семен с товарыщи своими в то же время, егда пловяху они от Верколы в Кевролу по реке Пинеги в дву лотках с рожью. И в нощное время внезапу нанесло их на ез,[4433] и абие начаша утопати. Они же помолишася с верою Господу Богу и святому чюдотворцу Артемию и молитвами святаго в той час избавишася от потопления того. Мы же слышавше сие чюдо и писанию предавше.

Чюдо 4. В лето 7148-го (1639) месяца октября в 5 день поведа нам человек некто именем Козма Иванов сын с Малой Пинежки. Бе одержим трясавицею месяц шесть, и помолися Господу Богу и святому Артемию с верою велиею, и молением здравие получи от святаго Артемия чюдотворца.

Чюдо 5. Бысть некая жена именем Мария, бе в недузе одержима чревною болезнию месяца три. И помолися с верою святому Артемию чюдотворцу Верколскому. И абие здрава бысть от тоя болезни и благодаря Бога и святаго праведнаго Артемия.

Чюдо 6. Месяца ноября в 16 день человек некий именем Кир Иосифов сын поведа. Бысть он огневою болезнию одержим велми. И помолися с верою Господу Богу и святому Артемию чюдотворцу. И молитвами святаго от тоя болезни здрав бысть и хваля Бога и святаго Артемия.

Чюдо 7. Ин человек именем Семен, прозванием же Козаринов с Карповы Горы прииде же в Верколу месяца декабря в 10 день, поведа сице. Во 147-м (1639) году после Ильина дни[4434] осенью идущим им со иными людми, с подруги своими из Монгазеи[4435] на судне морем. Бысть же в мори от бури ветреныя велие волнение. Они же о напрасней беде ужасшеся отчаянно. Много же тружающимся им на мори, и друг со другом прощалися, яко уже и погрязнути хотящим. Прииде же им во ум, и начаша молитися Господу Богу и святаго праведнаго Артемия Верколскаго чюдотворца со слезами на помощь призывати. И обещашася молебная совершити и милостыню подати по силе своей. И Божиим изволением, молитв ради святаго Артемия, в той час преста в мори буря. И лютыя тоя беды и от потопныя смерти избавишася, и море преидоша здраво. И благодарение воздающе Всемилостивому Господу Богу и его угоднику святому чюдотворцу Артемию.

Чюдо 8. Человек же бе некий именем Иван, веси, нарицаемые Сурские, поведа нам. Грех ради его огнем ожегл руку свою болно. И помолися Господу Богу и угоднику его святому Артемию. И абие от тоя болезни здрав бысть, благодарив Бога и святаго Артемия.

Чюдо 9. Ин человек бе именем Андрей Федосеев сьн с Кучкаса. Бе одержим огневою болезнию многое время. И помолися с верою святому чюдотворцу Артемию. Святый же Артемий избавляет человека того от болезни тоя. Человек же той благодарение воздав Богу и святому Артемию.

Чюдо 10. В то же время жена некая именем Евдокия Пинежского волока, веси, нарицаемые Валдокурские. Бысть же она болна велми утробною болезнию лета три. И врачев призываше, и никоеяже пользы обретши, но паче в горшее пришедши. И уже ей близ смерти сущи, и воспомянуша ей чюдеса святаго Артемия Верколскаго чюдотворца. Она же начат молитися с верою святому Артемию и обет положи молебная совершити. И повеле своим ея довести себе тамо. Егда же приведоша ея в Верколу, и молебная совершивше, и приложиша ко гробу блаженнаго Артемия. И в той час та жена здрава бысть от тоя болезни Божиею благодатию и молитвами святаго, дивнаго в чюдесех, Артемия.

Чюдо 11. В та же времена человек некий именем Ларион Иванов сын, кевролец, бысть одержим в великой болезни, не владея собою многое время. И жена некая именем Анастасия ис Кевролы, у неяже болеша уши. А иная жена именем Парасковия из Шардонемы бе в недузе, не владея ничем, в разслаблении лежа многое время. И сии моляшеся с верою святому Артемию и быша здравы от болезней своих. И приходят ко гробу его, обеты своя исполняюще, и благодарение воздая Христу Богу и святому Артемию, отхожаше с радостию.

Чюдо 12. Того же лета генваря в 22 день приезжал в Верколу некоего воеводы именем Стефана, зовомаго Чирикова,[4436] человек его именем Никита Чадуев, а с ним некая девица именем Парасковия, Азова города полонянка новокрещеная. Бысть же она болна велми черною болезнию[4437] некое время. И повеле молебная совершити, и моляшеся та девица святому Артемию с верою. И приложися ко гробу его, и ту абие здрава бысть от тоя болезни, и отъиде, радуяся и благодаря Бога и святаго Артемия чюдотворца.

Чюдо 13. В то же время бе некая жена именем Мамелфа дщи Кондратьева немогии утробною болезнию многое время. И помолися с верою Господу Богу и святому Артемию. И бысть жена та здрава от того часа от болезни тоя, благодаря Бога и святаго Артемия.

Чюдо 14. Месяца марта в 2 день поведа нам человек некто именем Архип, рекомый Хрыпунов, кевролец. Бе дщи его именем Ксения, младенец пяти лет, бысть болна велми, не виде очима ничтоже неколико время. И ко врачем ходяше и ничтоже успеша. Прииде же в Верколу той человек, и помолися с верою святому Артемию о своем младенце, и молебная совершив, и приложися ко гробу святаго. И бысть дщи его здрава очима от того часа. И отъиде в дом свой, радуяся и славя Бога и святаго Артемия.

Чюдо 15. Ин человек некто именем Карп, Сурские веси, прилучи же ся ему болезнь велика зело, яко внутренним его терзатися люте, и бе тело его отягче. Бывшу же ему в том недузе многое время и ожидающу смерти. Мати же его моляшеся с верою святому Артемию Верколскому чюдотворцу и обет положи ко святому молебная сотворити. И в той час проглагола сын ея, аки от сна воспрянув, облегчися болезнь его, и бысть здрав, яко николиже боле. Прииде же в Верколу человек той, и молебная совершив, славя Христа Бога и угодника его святаго Артемия, и отъиде восвояси, радуяся.

Чюдо 16. В та же времена бе некая жена именем Анна, Кирилова жена, ис Чаколы, имея у себе младенца, болезнию огневою велми одержима, яко уже младенцу скончатися хотящу. И помолися жена та с верою святому Артемию о своем младенце. Святый же Артемий избавляет младенца от тоя болезни. Жена же благодарение воздав Богу и святому Артемию.

Чюдо 17. Ина жена именем Евдокия дщи Якимова с Ваймуши, бысть же она в недузе, опухло бяше лице ея, и не виде очми ничтоже, и не владея собою. И начат молитися Господу Богу и святому Артемию чюдотворцу. Егда же прииде в Верколу, и по совершении молебнаго пения приложися ко гробу святаго праведнаго Артемия. И бысть та жена здрава от болезни своея, славя Бога и святаго Артемия, и отъиде восвояси, радуяся.

Чюдо 18. Человек бе некий именем Дионисий ис Чаколы, у негоже болеша очи, и не виде ничтоже недель десять. И слышав велия чюдеса, творимая святым Артемием, и притече ко святому, и помолися с верою. И здрав бысть человек той молитвами святаго Артемия и благодарение воздая Богу и угоднику его святому Артемию, творящему таковая дивная и преславная чюдеса.

ПРЕНЕСЕНИЕ МОЩЕЙ СВЯТАГО ПРАВЕДНАГО АРТЕМИЯ ВЕРКОЛСКАГО ЧЮДОТВОРЦА ИС ЧАСОВНИ В НОВОПОСТРОЕНУЮ ЦЕРКОВЬ, ИДЕЖЕ УЧИНЕН МОНАСТЫРЬ

Лета седм тысящ сто пятьдесят шестаго (1648) месяца марта в З день в государеве Цареве и великого князя Алексея Михайловича всеа Русии грамоте из Болшаго дворца за приписию дьяка Давыда Дерябина[4438] писано в Кевролу к воеводе Григорью Михайловичю Аничкову.[4439] А велено в Верколской волости святаго праведнаго чюдотворца Артемия мощи собрати в раку и положити по-прежнему. А ис часовни пренести в церковь святаго великомученика Артемия, где монастырь построен. И во 157-м (1648) году месяца ноября в 17 день той же воевода Григорий поезжает ис Кевролы в Верколу и повелевает с собою ехати церковным служителем, священником патриарши десятины, поповскому старосте Никольскому священнику Якиму, да Кевролского стану Воскресенскому священнику Марку, и диякону Доментияну, да Карпогорские волости Воскресенскому священнику Дмитрию. И приехали в Верколскую волость и тое же волости черной священник Иона да белой священник Софоний. Священницы же в церкви Божий соборне молебное пение сотворяют славимому в Троицы Господу Богу нашему Исусу Христу, и Пречистей его Богоматери, и святителю Христову великому чюдотворцу Николе, и святому великомученику Артемию, и святому праведному Артемию, новому чюдотворцу, вкупе же и освящение воде сотворяют. И по совершении молебного пения приходят священницы в часовню и ту у честныя раки святаго чюдотворца Артемия доволно молитвуют. И открывают раку, и священною водою окропляют, и честныя и чюдотворныя его мощи со благоговеинством собирают, и полагают в новую раку, и покровом покрывают. И приимше раку с верою, и молением, и с песньми духовными и пренесоша ис часовни в церковь святаго великомученика Артемия в новую ограду, где монастырь построен. И положиша честно в церкви одесную страну в десятое лето по згорении оные церкви. И тако кождо разыдошася в домы своя, славяще и благодаряще Христа Бога и угодника его святаго праведнаго Артемия Верколскаго чюдотворца.

Чюдо 19. Многа убо чюдеса бываше и исцеления преславна святым и праведный Артемием и по пренесении мощей, ихже множества ради несть лзе писати и в забытии ума невозможно вместити. Мы же от многа нечто мало возвестим. Бысть убо некогда приехал з Двины из Сетренского монастыря[4440] в Верколу старец Игнатей, а сказал: лежал, де, он в монастыре в тяжкой болезни четыре недели, и языка у него не было, говорити не могл. И прииде к нему в видении святый праведный чюдотворец Артемий и рукою своею погладил его лежащаго по голове. И у него, де, в то время язык объявился, и нача глаголати он старец. И призвал отца духовнаго, и исповедался, и вскоре быв здрав. И приехав дозде помолитися святому праведному Артемию Верколскому чюдотворцу. И отпев молебная, поехав в Сетренской монастырь, хваля Бога и святаго чюдотворца Артемия.

Чюдо 20. Человек некий именем Афонасий с Вятки, из града Хлынова, прииде в Верколу и поведа. Бывшу ему в Мунгазеи нужды ради некия. И одержимь бысть болезнию велми тяжко два лета, и в то же время и очима не виде ничтоже. И поведаша ему людие о чюдесех святаго Артемия. И человек той начат молитися святому Артемию со слезами, и обет положи молебная совершити и приложитися ко гробу его. И в той час человек здрав бысть от тоя болезни и очима прозре. И по своему обещанию молебная совершив, и к раце мощей святаго приложися с верою и со слезами многими, и отъиде восвояси, радуйся и славя Бога и святаго Артемия.

Чюдо 21. О явлении святаго. Ниже убо и сие праведно умолчати, и явление святаго бес писания быти, понеже убо, слышавше неложныя глаголы от истинных свидетелей, достойно писанию предати. Бысть убо в том Верколском монастыре священноинок именем Иона, иже бысть первый священник и житель в монастыре том, поведаше сице, глаголя. Егда бысть построен Верколский монастырь и церковь, и приказано строителей быть именем Иродиону, иже по пострижении бысть Рафаил.[4441] И ту пребыша они вкупе немалое время едини. И возненавидеша их Верколские веси жителие, и начата их из монастыря высылати, и от церкви отказывати. Тогда мощи святаго Артемия быша у мирской церкви после пожару в часовне. И оне, преждепомянутые строитель и священник, быша в велицей скорби, и в сетовании днии своя провождаше, видя к себе множество сверепых людей, на изгнание устремишася, и со слезами Богу моляшеся, и на помощь призываше чюдотворца Артемия. И во 155-м (1647) году некогда случися им уснути в нощь в тонце сне, он священник в келии, а строитель пред келиею в чюланце. И абие в нощи слышит он священник пред кельею дву человеков глаголющих. И очютися, и бысть, яко вьяве слыша. И помысли во уме своем одному по гласу бысть строителю, а другому гласу тонку сущу, аки младенческу. И положи во уме своемь бысть сыну своему[4442], пришедшу из Верколские веси, Герасиму именем, тогда ему не в возрасте бывшу. А что они глаголют, того ему знать невозможно. И о том на мног час бывшу ему в размышлении. Многажды сий глас слышаше и помышляше, како и чего деля[4443] сын его в ноще прииде к строителю, а к нему в келию не вниде. И егда приспе утро, и оне воставше, и строитель вниде в келию. И нача он священник вопрошати его, глаголя: «Чесо ради сын мой в нощи сей к тебе приходил, и что с ним глаголали, и како в келию не вниде?» Он же молчаше, и бысть слезен, и едва во слезах проглагола: «Сына, де, твоего не видех и ничего с ним не глаголах». Но той священник паки нача вопрошати неотложно с потвержением. И абие поведа ему бывшее видение свое, глаголя сице: «Бысть некто от чесных людей со многими людми, приехав к нам в монастырь, и в то время бывшу ми в часовне у чюдотворныя раки святаго Артемия. И некия люди начаша с чюдотворныя раки покровы сымати, и мне того не хотевшу, и покровов сымать не велел. И вто время внезапу предста святый праведный Артемий, и близ мене седе, и глагола ми: „Сии покровы сымают того ради, на столы слать вместо скатертей, и о сем не крамолися”. И сие от него слышах, и с ним аки во сне глаголах. И абие очютися, и вскоре от сна востав, и походив, и паки ко сну вдашеся, понеже тягостно ми бысть. И абие второе явися ми святый, аки яве седя близ мене и глагола ми о том же милостиво. Аз же к нему отвещеваше. И почити ему ту хотевшу со мною до утра. И паки очютився, и бысть, ако яве. И о сем велми ужасшуся и от того ужаса и радости весь слезен бых. И от сна востав и пребыв до утра тако, якоже ми видиши». И священник такоже поведаше ему, еже слыша речение их, и о сем видении бывшу им в великом раз- мышлении.

Людие же зело на изгнание устремишася и неподобная глаголяще. Намже к ним никако смеющим отвещати и вопреки глаголати, но паки во слезах пребывающе, понеже приказано бысть ту словом бывшаго в Кевроле воеводою Афонасья Пашкова, а указу никакова нам не дано. И о сем Богу моляшеся, и милости ожидающе, и сие видение во уме и на сердце своем держаще. И пребыша в том монастыре едини полгодищное время. И по сем прииде с Москвы кевролец Семен, зовомый Роднин, и принесе к намь писание от Афонасья Пашкова о возвещении государского жалованья, что будет прислано в монастырь.[4444] И о томь поведа, что есть послана государева грамота в Кевролу к воеводе, велено чюдотворныя мощи праведнаго Артемия собрать в раку по-прежнему и пренести ис часовни в церковь, идеже построен монастырь. И о сем зело возрадовашеся и по тое ведомости пренесение мощей учинишася вскоре. А по пренесении во второе лето прислано государева жалованья к чюдотворцу Артемию с крестовым дьяком Игнатьем Яковлевым и з десятию человеки опазчики[4445]: Божия милосердия иконы на окладе, и книги, и колокола, и ризы, и сосуды служебные сребряные и иная церковная утварь. И о сем паки велми возрадовашеся и воспоминавше явление и речение святаго, иже поведано бысть.

И начаша людие из окресных стран и ближние жители приходити к чюдотворцу по-прежнему и по своему обещанию молебствовати многое множество, всякими недуги одержимыя. И молитвами святаго изцеление получаху и вси здрави бываше. И сие видяще преждепомянутыи свирепии людие, и сами обратишася, и начаша к чюдотворцу приходити, якоже и прочий людие, и на изгнание нас не устремляхуся, но быша кротцы. А инии людие начаша приходити, и тружатися, и вклады чюдотворцу в казну дающе, и единожители учинишася. И с того времяни монастырь святаго праведнаго Артемия Верколского чюдотворца именовася и молитвами его распространяшеся.

Чюдо 22. В лета 7201-го (1692) в декабре месяце прииде в Верколув монастырь святаго праведнаго Артемия кевролец из веси Шардонемы, юноша именем Евсей Семенов, зовомый Теплухин. И поведа нам сие. Бывшу ему в Пустоозерском остроге, и лучися быти ему в зимное время за Губой[4446] на промыслу с товарыщем. И поиде он через Губу в Пустоозерской острог для хлебных запасов. И в то время нападе туман, и с прямого пути совратися и нача блудити, ходя по Губы в тумане. И в велицей печали блудиша три дни, и свету мало видя, и нача изнемогати зело, и падая, и лежа, и с великим трудом воставая, шествие творя безпамятно. И отчаявся живота своего, и чая себе от глада и мраза умрети. И прииде ему во ум чюдеса святаго праведнаго Артемия, бываемая в людех. И нача со слезами молитися Богу, и на помощь призываше чюдотворца Артемия, дабы не погинуть ему безвестно. И обещание положи быти у чюдотворца в Верколе и молебен пети. И в то время внезапу тумана не бысть, и свет возсия, и земля объявися, яко облак. И место позна, пойде к людем, радуяся, и не можаше ити, падаше. И увидеша людие Волока Пенежского,[4447] и доведоша его к себе, видяще зело изнемогша. И по времени начаша вопрошати его. Он же поведаше им все по ряду сие преславное чюдо, и вси прославиша Бога и святаго Артемия, избавльшаго от напрасныя смерти. И той человек обещание свое исполнив: молебная пев, и к мощем приложися, и отъиде в дом, радуяся.

Чюдо 23. Того же году в генваре месяце приехав в Верколу с Колмогор Приказной полаты подьячей Федор Семенов сын, зовомый Блезнин. И поведа нам чюдо бывшее. Егда бысть он послан с Колмогор в Колу на хлебных лодьях морем с товарыщи, и случися им от бури страх велий. И уже видеша себе кончину, и срачицы свои премениша, и живота своего отчаяшася. И в тое скорби начаша Богу молитися все усердне со слезами, и на помощь призывание святаго праведнаго Арьтемия, и молебны обещались служить в Верколе, и на свечи собрали. И в той час от потопления свободишася, и внезапу сташе в тихом пристанищи, и быша в велицей радости, якоже неначаемая получиша. И буря утолися. И не по мнозе времени дал Бог ветр пособный, и бес трудов преплывше морскую пучину в целосте. И быша в Коле, и о сем преславном чюдеси прославиша Бога и угодника его святаго Артемия. И той Феодор обещание исполнив: молебная совершив, и отъиде восвояси.

О ПОГОРЕНИИ ЦЕРКВИ В ОГРАДЫ

В лето 7203-го (1695) месяца апреля в 8 день, на третей недели по Пасце, в понеделник, с полудни паки прииде гнев Божий, грех ради наших, велма же убо наказующу нас Богу за премногия грехи наша, яже бываема по вся дни от нас. Бысть убо в той день во церкве служил молебны иеромонах Герман[4448] с Максимом Поясницыным, а пономарь был Насон Ставров. И по отпетии молебнов вскоре некак загореся в церкви от свещи или иным каким небрежением. И узревшу в церкви уже пламени велику и окнами вон дышуще. И прибегше людие мнозии, и нудящеся всячески внити во церковь, и не возмогоша зельнаго ради огненнаго возгорения. И не могоша вынести Божия милосердая икон, и чюдотворныя раки, и иные церковные утвари. И что было прислано государева жалованья, то совсем згореша. И о сем чернцы того монастыря, и белцы, и веси тоя Верколския жители вси стекошася, видяще такое внезапное и ужасное великое пожарное разорение. И быша в велицей скорби, и сетующе, я плачюще вси, взираюше на церковное здание, и помышляюще, колико было много и премного за молитв святаго и праведнаго Артемия прислано государева жалованья церковные утвари, и то все кроме колоколов згорело. И тщашеся со усердием о другие церкви и прочего здания монастырского, дабы Господь сохранил. И вскоре та церковь обвалися и згореша вся, а иное здание молитвами святаго Бог сохранил.

И видяще, в пожаре на церковной месте, идеже была чюдотворная рака, насыпалось земли с потолока великою кучею паче прочих мест. И о семь возвестиша преосвященному Афонасию архиепископу Холмогорскому и Важескому,[4449] и по ево архиерейскому указу велено Кевролские Воскресеньские церкви десяцкому священнику Петру ехать в тот Верколской монастырь, и купно со иеромонахи того монастыря ту сверху падшую землю велено розгресть до преждебывшей персти, которая была в раке купно с мощми чюдотворца Артемия собрана по первом пожаре. И ту искать останков ево чюдотворцовых мощей или костей, и что сыщетца ево останков и персти, и то велено полагать на чистую доску, и пренести в другую церковь. И по молебнем славословии и водоосвящении покласть в ящик, выкрашен краски, и поставить на столе, на южной стороне, до ево архиерейского указу.

Июня в 7 день по тому вышеписанному указу священник Петр з дияконом и с ними вкупе кевролской воевода князь Семен зовомый Солнцов Засекин во многонародстве приехав в тот Верколской монастырь и учиниша всенощное бдение и литоргию. И внидоша с образы на то пожарное место, и розгребше сверху падшую землю. И волею Божиею останков чюдотворца Артемия, мощей ево, костей собрано многочисленное множество, и покладено со благоговением против архиерейского указу чинно, и о том к нему преосвященному архиепископу писано. И по его благословению велено строить церковь нову во имя святаго великомученика Артемия. И помощию Всещедраго Бога и молитвами святаго праведнаго Артемия та церковь построена холодная и святыми иконами украшена. И останки чюдотворца Артемия, мощей его, ис теплой церкви пренесены в раке священническими руками с подобающею честию в ту новопостроенную холодную церковь во всенародном великом собрании июля в 14 день, в вечер, ко всенощному бдению на освящение тоя церкви, и поставлена та чюдотворная рака по преждебывшему, на южной стране, во углу, подле южную олтарную дверь. И паки начаша людие мнозии приходити изо окресных весей и из далних стран по своему обещанию к чюдотворцу Артемию и молебная совершающе, иже бывшия в недузех, и исцеления получиша, ихже поряду множества ради невозможно исписати, яже видим и слышим всеусердное их моление к Богу со слезами, и припадающе к чюдотворной раки.

Чюдо 24. В то же время прииде в Верколу Сурские веси человек именем Зотик, зовомый Заборских, в самое пренесение мощей с пожару в теплую церковь. Служив молебен, и к мощем чюдотворца Артемия приложился, и поведал нам. Быв он в походе к морю и доплыл до Кулогоры. И ту нападе на очи его темень, и ничтоже видя, и от товарыщев отстал. И в тое скорби и во слезах пребыв три дни. И прииде во ум ему чюдеса святаго Артемия, и нача человек той Бога молити со слезами, и на помощь призывати святаго Артемия, и обещание положи с того пути возвратитце, и в Верьколе чюдотворцу служить молебен. И в той час дарова Богь ему прозрение, и свет увиде, и бысть рад. И прииде в Верколу, обещание свое исполни. Мы же слышавши сие, и вси вкупе прославиша Бога и угодника его святаго Артемия. Человек же той отъиде в дом свой, радуяся.

Чюдо 25. Июля в 6 день бысть убо чюдо дивно и преславно, иже сотворшеся святым и праведный Артемием. Некий человек именем Мартын Емельянов, зовомый Ступин Покшенские веси прииде в Верколу з женою своею именем Наталия. Бе бо одержима очною болезнию многое время и не виде ничтоже. И приведе ея ради пострижения, уже в скорби тоя зелныя сама обегцалася. И по вечеру от белого священника Георгия повеле она себе вести в часовню, и пришед, нача молитися Господу Богу со слезами, и на помощь призываше святаго Артемия. И взяв персти, помаза по веждома[4450] своима, и пеленою потре очи свои, и повеле себе вести к Пинеги реки, и мывся водою с перстию. И в то время дарова Бог молитвами святаго Артемия очима зрение, и увиде свет, и паки повеле себе вести к священнику. Никомуже поведа, пребыв до утра в радости. А заутра воставши, поиде с человеком в монастырь к чюдотворцу, и прииде, паки помолися с верою о прозрении своем. И по молении том поиде из монастыря сама, никимже водима. И прииде к священнику в дом, и поведа сие дивное и преславное чюдо, иже сотворшеся святым Артемием, и свое прозрение мужу своему, и всем объяви. И вси вкупе прославиша Бога и угодника его чюдотворца Артемия и поидоша в дом свой, радуяся.

Чюдо 26. В то же время бысть жена некая именем Дария Марьегорския веси, прозванием Чюркиных, поведа сице. Бе у них сын Борис осми лет да дщи Татияна, бысть в велице недузе и не могии ногами ходити и руками двигнути многое время. И о семь бывшу в велицей скорби, и видя их ту скорбь, и бысть в печали велицей. Богу моляшеся о здравии детей своих, и обет положиша ити им в Верколу пешим и чюдотворцу Артемию служить молебен. И вскоре дарова Бог молитвами святаго здравие, и начаша ходити. И приидоша в Верколу, обещание свое исполниша, и прославиша Бога и угодника его Артемия, и поидоша восвояси, радуяся.

Чюдо 27. В лета 7204-го (1696) февраля в 14 день приехав в Верколу в монастырь кевролец, Киглохоцкой веси житель, Софрон Никифоров, зовомый Ветреников, з женою своею и с сыном своим, малчиком. И поведа дивное и преславное чюдо, яже сотворшеся ныне святым, и праведным, и богомудрым Артемием. Бывшу убо сыну его именем Иван в малых летех, и сверсники своими игры деюще[4451]. И не сказався, поидоша кататися з горы, рекомыя гледеня[4452], и начаша прямо на ту гору попадати. И велми круто учинишася от снега перевал великой. И внезапу той снег зинуся[4453] и под гору покатися, и сего детища тем снегом засыпало, и не бысть ни гласа и ни послушания. И товарыщи ево, сверстницы, бывше в великом страсе, и побеги в дом к отцу его, и поведаше ему со слезами. Он же, услышав сие, быв слезен и побеже тамо с нимиже вскоре. А ростояние до места того близ полупоприща.[4454] И прибегши, начаша искати, и виде ту велию громаду снегу окатившуся, начаша розгребати. И братия ево вскоре ту же приспевши, и трудившимся многое время, и ничтоже успеша. И помышляюще в себе, что бысть у него обещанно с сим детищем бысть в Верколе у чюдотворца Артемия, и в том замедлившу ему. И паки нача со слезами Бога молити и святаго Артемия на помощь призывати, дабы сыскать сына своего. И начата по снегу ходити и шестами искати. И уведев под шестом, и розгребше, видевше мертва. И в то время приложи к слезам слезы и к воплю вопль. И положи обещание паки к чюдотворцу быть безо всякие мешкоты и молебная исправить, аще будет жив сын его. И Божиею милостию и молитвами святаго Артемия в той час детищь нача дрожати, и по дрожании возре. И увидеша оне, яко жив есть, и зело возрадовашеся о преславном и неначаемом чюдеси, понеже бо вси видеша его мертва, и внезапу оживе. И прославиша Бога и угодника его праведнаго Артемия. Тойже человек обещание свое исправи вскоре. Мы же слышав- ше сие и писанию предаша.

Чюдо 28. Иже и сие несть умолчати. Бысть убо Кеврольские Воскресенские церкви священника Петра Игнатьева, жена его, именем Феврония одержима очною болезнию два месяца и не виде очима ничтоже. И много врачевания искаше, а ползы не обрете, но паче в горшее пришедши. И от тое зелныя скорби уже чая лишитися очнаго зрения. И бысть убо некогда донесено к ней из Верколы бересца, иже сыскано по пожаре во срубце, идеже обретены были исперва чюдотворца Артемия мощи. Она же вземши того бересца с верою, и в самую нощь положи на уголие, и дым испусти, и сама надклонися. И помолися святому Артемию со усердием и со слезами, и успе[4455]. И поутру восташе, и бысть у нея правое око здраво, потом же и левое, и возревше ясно. И от того здрава бысть, яко николиже боле. И возрадовашеся радостию великою и благодарение воздаша Господу Богу и угоднику его святому Артемию. Быв в Верколе, и молебная совершив, и нам сие поведа, и отъиде в дом свой, радуяся.

Чюдо 29. В та же времена приидоша в Верколу с Выи именем Стефан, рекомый Синаевых, з женою своею и с сыном и поведа нам чюдо святаго Артемия. Бысть убо он ногою болен 15 недель, и не могий ея двигнути, и скорчися. И от тое великие скорби молитвами святаго чюдотворца Артемия вскоре здрав бысть ногою. А жена его именем Наталия, а сын Евтихей, бысть они очми болны четыре седмицы и свету не видеша. И той же Стефан, видев к себе милость, и получив исцеление, такожде им чюдотворцу молитися повеле с верою. Они же начаша молитися со слезами и обещание положиша быти к чюдотворцу в Верколу и молебная совершити. И в той час свет увидеша, и здравы быша у них очи по-прежнему. И о семь зело возрадовашеся, и хвалу воздаше Господу Богу и угоднику его святому и праведному Артемию Верколскому чюдотворцу, и обещание свое исполниша вскоре.

Чюдо 30. Ин человек тое же веси Выйские именем Андрей Осипов бысть одержим недугом огневым люте зело, четыре седмицы не могий двигнутися и ничтоже вкушающе. И в тое скорби молися с верою Господу Богу о здравии своем и святому праведному Артемию обещание положи быти в Верколе и молебная совершити. И тем молением здравие получи вскоре, и прииде в Верколу, и обещание свое исправи, и прослави Бога и святаго чюдотворца Артемия. И нам чюдо сие поведа и паки поиде восвояси, радуяся.

Чюдо 31. Двести осмаго (1700) году марта в 14 день приехав в Верколу в монастырь чюдотворца Артемия Выйской волости, веси, зовомые Хорнемы, крестьянин Илья Синаев, поведа чюдо бывшее святаго Артемия чюдотворца. В прошлой в 207-м (1699) году бысть очная болезнь у сына ево, младенца, зовомого Маркияна, и пребысть в тое скорби недель дватцать и болши. И бысть во слезах без утешения, види сию скорбь велию, и света Божия не видя. И бысть у него бельмо на обех очесех, и уже отчаялись ево зрения вконец. И о сем начаша Бога молити о здравии сего младенца и о зрении очес его, со слезами на помощь призывая святаго и праведнаго Артемия Верколскаго чюдотворца, и обещались служить молебен. И по сем начаша людие приносить былие[4456] на исцеление очес, и от сего получиша не исцеление, но горшую скорбь и рыдание. И по сем положиша обещание Богу, и ко святому Артемию чюдотворцу паки обещались ехать в Верколу и служить молебен. И все усердно милости о здравии просили, а былие всякое отложили, чтобы впредь от того исцеления не искать. И скорый на помошь святый праведный Артемий! В том часе внезапу бысть чюдо преславное на видение многим людем: сий младенец очми прозре и от скорби бысть здрав вскоре. И приехав в монастырь, сие обещание свое исправив, молебная пев, и у раки чюдотворцовы быв, и приложився. И нам сие чюдо поведа, и о сем вкупе вси прославиша Бога и святаго чюдотворца Артемия, и писанию предаша.

Чюдо 32. Но и сие убо не удобно молчанию предати, но проповедаем преславное чюдо святаго и праведнаго Артемия. Бысть убо лета Господня 1700-го декабря в 6 день в Верколском монастыре с Усть-Онеги реки, Кресного монастыря вотчины, Авонгуцкой волости священник Василей Васильев. Поведа на себе бывшую очную скорбь полтора лета, и в тое скорби искал многих врачев, а помощи себе от того не обрете. И некогда ему вознеистовяся на сердце, и зблевал, и после того уснул. И во сне ему случися велия и нестерпимая скорбь в зубы и в губы, глаголемая жаба. И не бысть покоя десять дней, и хлеба не вкусил, и изо уст его начаше изходити смрад велий, и начаша людие гнушатися. И в тое великой скорби во сне явися ему человек, аки яве, и велел молитися святому и праведному Артемию Верколскому чюдотворцу. И по тому видению начаша Богу молитися и на помощь призывая праведнаго Артемия о облегчении тоя неутишимыя скорби. И обещание положи быть в Верколе и у раки его служить молебен. И в том часе бысть здрав, от тое великие скорби свободися молитвами святаго чюдотворца Артемия. И видевше вси домашнии ево скорое исцеление, и вси вкупе прославиша Бога и чюдотворца Артемия. Мы же сие слышавше и повелеша ему сие писанию предати. Он же написа со усердием и радостными слезами, виде преждебывшие чюдеса святаго. И книгу чюдотворца Артемия — службу и житие и чюдеса — купив и обещание свое исполнив. И отъиде восвояси с радостию, славя Бога и святаго чюдотворца Артемия.