La morto de Ivan Iljiĉ

IX

La edzino revenis malfrue nokte. Sxi eniris piedpinte, sed li ekauxdis sxin, malfermis la okulojn kaj haste refermis. Sxi volis forsendi Gerasimon kaj mem sidi kun li. Li malfermis la okulojn kaj diris: " Ne. Iru.

Li konsentis kaj glutis. Sxi foriris.

Gxis cxirkaux la tria horo li estis en turmenta sinforgeso. Al li sxajnis, ke oni lin kun la doloro sxovas ien en stretan nigran sakon, profundan kaj sxovas plu kaj plu kaj ne povas trasxovi. Kaj tiu terura por li afero okazas kun sufero. Li kaj timas, kaj volas trafali tien, kaj luktas, kaj helpas. Kaj jen subite li desxirigxis kaj falis, kaj rekonsciigxis. Cxiam sama Gerasim sidas piedflanke sur la lito, dormetas trankvile, pacience. Kaj li kusxas, levinte sur liajn sxultrojn la magrigxintajn krurojn en sxtrumpoj; jen la sama kandelo kun klosxo, kaj la sama sencxesa doloro. " Foriru, Gerasim, " li flustris. " Ne gravas, sinjoro, mi sidos plu. " Ne, foriru.

Li forprenis la krurojn, kusxigxis per flanko sur brakon kaj ekkompatis sin. Li atendis nur tion, ke Gerasim eliru en najbaran cxambron, kaj ne povis sin bridi plu kaj ekploris kiel infano. Li ploris pri sia senpovo, pri sia terura soleco, pri krueleco de homoj, pri krueleco de la dio, pri malekzisto de la dio. Kial vi faris cxion cxi? Kial venigis min cxi tien? Pro kio, pro kio vi tiel terure turmentas min?..

Li ecx ne atendis respondon kaj ploris pro tio, ke ne estas kaj ne povas esti respondo. La doloro levigxis denove, sed li ne movigxis, ne vokis. Li diris al si: Nu ankoraux, nu batu! Sed pro kio? Kion mi faris al vi, pro kio?

Poste li kvietigxis, cxesis ne nur plori, cxesis ecx spiri, kaj la tuta igxis atento: kvazaux li auxskultus ne vocxon, parolantan per sonoj, sed la vocxon de animo, la movigxon de pensoj, levigxantan en li. " Kion vi bezonas? " estis la unua klara, esprimebla per vortoj nocio, kiun li ekauxdis. " Kion vi bezonas? Kion vi bezonas? " li ripetis al si. Kion? " Ne suferi. Vivi, " li respondis.

Kaj denove li tute absorbigxis en atento, tiom strecxa, ke ecx doloro ne distris gxin.