За здаровы лад жыцця

САНЭТ З ПРЫЧЭПАМ

Санэт ёсьць форма вершаваных твораў

Дакладна з чатырнаццаці радкоў:

Катрэнаў двух (казаў Міхась Лынькоў),

Тэрцэтаў двух (казаў Філіп Кіркораў).

Ня менш за форму тут істотны зьмест,

Звычайна філязофскі і глыбокі.

Спачатку ўсе ягоныя вытокі,

А потым вынік, і - let's have a rest.

У нас заўсёды гонар і дарога

Тым, у каго санэтаў вельмі многа,

Пішэце ж іх, чаго вам не стае?

Тых, у каго ніводнага санэта,

Ўсіх праглыне марудлівая Лета

Або, наадварот, яны - яе,

Што нават горш нашмат, няма размовы,

Бо чалавек жа не гумовы!