За здаровы лад жыцця

МУМІЯ

Нэннэка і яго сям’я

заўсёды сьнедалі ў вялікім пакоі

і заўсёды ў гэты час

да іх прыходзіла мумія

яна была вельмі прыгожая

забальзамаваная па найвышэйшай клясе

некаторыя нават думалі

што гэта ня мумія а жывы чалавек

яна разам з усімі сядала за стол

працягвала рукі да ежы

размаўляла і ўсьміхалася

ела піла і потым часова

зьнікала на заднім двары

але гэта была сапраўдная мумія

яе толькі дрэнна забінтавалі

яна ня ведала што і навошта яна робіць і кажа

да каго і куды прыходзіць

і што такое яна сама

дакладней ведала але гэта яе не цікавіла

Нэннэка і яго сям’я

таксама ведалі ўсю ейную падпазногціцу

і галоўнае што яна сапраўдная мумія

але нікому пра гэта не казалі