Библиотека литературы Древней Руси. Том 15 (XVII век)

Благослови, отче!

Понеже убо[464] мнози слышавше, нецыи же ведуще и зряще[465] о чюдотворномъ кресте Господне, иже из древних летъ и до дьнесь пребываетъ во области града Мурома, многа содевая[466] преславная чюдеса и исцеления, сего ради мнози от нихъ, воспалившеся желаниемъ и верою влекоми, ищут уведети[467], откуду и како обретеся[468] той бесценный бисеръ[469], и вопрошаху самехъ служителей того чюдотворнаго креста. Они же о сем ничтоже известно рекоша[470], зане убо многим летом претекшимъ, еще же и многа ради иноплеменныхъ нашествия на страну ону, паки же и частого ради татарского распленения древняя изгибоша писания, в кия лета и при коих содержателех[471] быша сия, но токмо на малей хартиице[472] просторечием, якоже поселяне[473] написано, держаху памяти ради.

Сице убо от многих лицъ о том бываху иереемъ темъ истязания[474] на многа времена. И тако тии служителие стуживше зазреша себе о семъ, абие припадают[475] ко архиерею града своего, просяще молитвы от него и благословения изыскати на дело сие, еже и бысть: да негли како обрящутъ мужа, могуща повесть сию о чюдотворнемъ кресте Господне благохитростне преписати[476], аки некую златотканную пленицу[477] словесне украсити, елико возможно, Богу ему поспешествующу.

И тако убо не вемъ, что ради симъ изволися оставити мнозехъ премудрейших на дело сие и достойнейших[478], якоже негде речеся, «оставльше источников, к суху потоку приидоша, и, оставльше главу, к ногам беседовати изволиша». Сице убо понуждают мое недостоинство, не ведуща ни десна, ниже шуя[479], но токмо греху присно[480] прилежаща, еще же и мирскими всячески суетами оплетшася, груба[481] суща и витийския беседы ничтоже сведуща. Мне убо, грешному, исперва много отрицающуся толикия дерзости делу сему прикоснутися, понеже убо выше силы и сана моего, еще же и за немощь и недостаточества ума моего. Сии же многорачителне не преслушати ми ся прилежаху[482] и честнаго креста оного самого силу в помощь на се быти ми предглаголаху. Аз же, окаянный, от обою содержимъ бехъ, страхом и радостию, понеже бо стърах за недостоинство претит ми глаголати, радость же и любы влечет мя вещати. Но обаче[483] возложих надежду на Бога, рекшаго: «Просите и приимите, толцыте и отверзется[484] вамъ»[485], всякъ бо, рече, — «просяй — приимет и ищай — обретает»[486][487] и паки рекъ, яко: «Не можете без мене творити ничесоже»[488]. И тако убо к сему со воздыханием припадая, рекох сице: «Милосердъ буди ми, Владыко, и прости мою дерзость о нихже хощу глаголати, недостойны устне имый и мысль непотребну». Рекох от сердца: «Ты убо, наставниче премудрости и смыслу давче, немудрым наказателю и нищим защитителю, утверди и вразуми сердце мое, Владыко! Ты даждь ми слово во отверзение устъ моих, иже Отчее единородное Слово, и содействуй ми силою креста твоего, якоже некогда немому повеле глаголати и глухому слышати»[489]. И тако прострох греходелную мою руку и яхся[490] по дело сие, о немже нам слово. Но убо небщую, аще и слово небытию покрывшу того славу, иже от летъ прием помощь, якоже преже рех, к неведению препущаше недобре и многие ползы отщетеваше ны[491]. Аще убо маргаритом от своих скал не производимом, кому техъ добра познаваетца?[492] И злату во своих флевахъ[493] лежащу, киим очесемъ того блистание будет? Тако и мы, изряднее ныне от глубины забвения и молчания восторгшеся, мало нечто о явлении чюдотвориваго того креста хощем побеседовати, елико возможно есть, а о летехъ и о временнех, якоже преди рекох, да не зазритъ ваша святыни, не обретшу ми, но едино се, иже суть ни от человекъ, ни человеки, но самем Темъ, изволившем распятися спасения ради человеческаго, послася сице.

Беша убо в прежняя времена две девы, сестре сущи, дщеря некоего мужа благочестива от дворянска рода; имя единой Марфа и имя вторей Мария. По времени же возраста ею даны беша на бракъ благоверным мужемъ от пресловущихъ[494] градов, еже есть Рязани и Мурома: Марфа убо мужу некоему от честна[495] рода рязанские земли, именем Иванну, но зело небогату; Мария же мужу от племяни нарочита[496] земли муромския, имянемъ Логвину, богатством же преизобилующу, аще и не зело велика суща рода. О отечествии же имян ею и прослытия роду[497] не поведано ми бысть.

Та же по некоемъ времени Иванну и Логьвину случися има снитися[498] к сродникам жену своею. Егда же приспе время вечери быти, бысть между има пря[499] о седении места:[500] Иванну убо хотящу первосидения честнаго ради отечествия своего, такожде и Логвину желающу богатства ради своего. И таковаго ради начинания и гордости своея — вина[501] бысть разлучитися има от себе, не помянуша бо реченнаго Господемъ: «Егда званъ будеши ким на бракъ и на вечерю, шед не сяди на преднемъ месте» и прочая, и паки: «Иже хотяй в вас болий быти, да будетъ последний»[502] и прочая. И апостолу глаголющу: «Иже высоко в человецех, мерзость есть пред Богомъ»[503]. И за сию убо вину не токмо сии едини разлучастася друг от друга, но и женама своима между себе до смерти своея изволиша ни писании[504] ссылатися.

По неколицех же летех, якоже последи рекоша, случися Божиим судом преставитися Иванну и Логвину во единъ день и во един часъ. Женама убо ею[505], Марфе не сведомо бысть про Логвинову смерть, Марии же про Иваннову смерть. Тогда же убо по лишании мужу своею встужившемася има сестра по сестре. И рече болшая сестра Марфа к себе сице: «Шедъ, посещу аз зятя своего Логвина и поклонюся ему и сестру свою да вижду. И, аще будетъ зять мой призритъ[506] на мое смирение, аз же потщуся в дому его и пребывати. Аще ли презритъ[507], аз же, токмо с сестрою си созревся[508] и прощения получивши, восвоя возвращуся». Такожде и меншая сестра Мария рече в себе: «Иду к зятю Иванну. Поклонившася ему, с сестрою ся узрю. И аще зять мой приятелствен ми явится, и аз от имения своего удоволю его, и он такоже, яко и муж мой, богат и славен будет по своему достоинству». И тако поидоста сестра к сестре.

И по Божию изволению снидостася на пути бълиз града Мурома и сташа каяждо к себе[509]. Тогда пославъ меншая сестра слугу своего известно испытати, кто есть ста ту: «Егда ли будет кая, рече, жена, и мы вкупе снидемъся. Аще ли будетъ мужескъ пол, и мы вдале отидем». И шедъ слуга ея и вопроси техъ: «Къто сим путемъ грядет?» И отвещаша ему: «Идет вдова к сестре своей». И, пришед, слуга возвести сия госпоже своей. И госпожа его рече: «Добре убо нама снитися вкупе!» И тако сошедьшеся и поклоншемася друга друзе, в лицехъ же своих не познастася, яко беша сестре.

И восхотевшима вопроситися има между себе о отечествии и сродстве своемъ. И рече болшая сестра к Марии: «Госпоже моя! Кто ты и откуду еси?» И отвещавъше Мария къ сестре своей Марфе: «Аз многогрешная, имя ми есть Мария. Еду к сестре своей Марфе». Сице же вопроси и Мария Марфы: «А ты, госпоже моя, кто и откуду еси и что ти есть имя?» И отвеща Марфа к Марии: «Аз же многогрешная Марфа. Еду к сестре своей Марии». И тако познастася во отечествии, яко сестре беша, такоже и о смерти мужу своею известистася. Тогда начаша сии между себе лобзанием любезным целоватися, якоже обычай им бе, и плакатися о мужу своею, занеже жиста не в совете между себе, по смерть свою ни съезжахуся, еще же ни писанием изволиша ссылатися. И елико бо по мужу своею плачющеся, сугубейши сего[510] ради себе за многовременное между себе незрение и безсоветие. И едва мало от плача преставше, порадовашася о Бозе и благодариста того, яко не лиши ею спребывания[511] на кончине века ею. И ту представити повелеста себе трапезу и ядше пиша[512] в славу Божию и веселистася. И по вечери сей успоша на месте том.

И въ тонце сне явися има ангелъ Господень, глаголя Марфе и Марии коейждо особь на имя: «Господь посла к тебе злато по вере твоей к нему», такоже и другой: «сребро». Злато же убо даде Марфе, сребро же Марии. И повеле в злате крестъ Господень устроити, в сребре же ковчегъ[513] кресту сковати. Вдати же оно повеле има, иже заутра преже идущимъ человеком путем симъ[514]. Слышаста же сия, аки наяве мнящемася, вземше и ввивше[515] каяждо злато и сребро в зарукавие си. И егда же има возбнувшима[516] от сна, исповеда Марфа сестре си Марии виденное, такожде и Мария Марфе возвести от ангела явлшееся има вкупе единако. Тогда восхотеста си уверити видение, аще истинна суть, и абие обретосте в зарукавие си Марфа убо злато, Мария же сребро. И возрадовастася о предивном томъ видении, паче же Божии даровании, и слезы от радости испустивше, Богу благодать воздаяху, и печастеся[517] о семъ, како бы има повеленное от Бога сотворити.

Во утрии же день узревше грядущих мимо путем темъ триехъ мужей во образе инок и возвасте къ себе сих и возвестисте им вся о себе бывшая, еже от анггела има во сне видение и како приясте от него во сне злато, соделати крестъ Господень, сребро же сотворити кресту ковчегъ, отдати же сия во устроение человекомъ, заутра первошествующим путем сим. Слышавше же чаемии[518] иноцы от нею глаголы сия и рекоша к нима: «Не скорбита о семъ, мы сего ради дела к ваю приидохом!» Тогда Марфа и Мария отдаете старцем темъ в злате слити крестъ Господень, в сребре же кресту ковчегъ устроити. И тако мнимии иноцы, вземше от рукъ сестру злато и сребро, отидоша от очию их. Сестрома же Марфе и Марии дошедшема града Мурома и ту обитаста в дому си.

Слышавше же ближницы[519] и сродственницы пришествие ею, сошедшеся к нима, начаша о преже бывших има и мужию их и скорбети и сетовати. Еще же и самема плачющемася за безсоветное и несогласное между себе житие, паче же вдовства и сиротства. Та же возвестиста о себе сродником своимъ, како подвигшимася коейждо от себе в путь к сестре си, не согласившимися, ниже сославшимася[520], и како сретостася на пути, идеже и пъреславное оно видение ото анггела видеша во сне, дающа има злато — сотворити крестъ Господень, сребро же — устроити ковчегъ кресту, и заутра прежешествующимъ человеком, еже и отдаша има на пути, и все по ряду, еже преже написася. Слышавше же сия, ужики[521] ею вознегодоваша и реша к нима: «То како сицево сокровище, паче же Божие дарование, с небрежением отдаста, а не весте[522] кому! Или не чаясте зде обрести златаря[523], в семъ велицем и многонароднемъ граде, на устроение Божия делеси[524]!» Сице истязующе ею[525]. Онема же отвещавшема к нимъ: «Иже явився и давый нама злато и сребро, имже повеле отдати сотворити дело Божие, отдахом».

Бе же тогда собравшеся к нима не едины сродницы ею, но и от нарочитых града, боляръ же и дворян, вопросиша о месте том, идеже явися чюдное видение то, и злато и сребро обретеся има, да идутъ тамо. Та же собравшеся множество людей и совещавшеся убо тамо итти.

Поемше же с собою Марфу и Марию и приидоша на место оно. И советъ сотвориша твердо: со тщанием и всякою быстротою послати на все страны по путем и малым стезямъ коегождо господина с чюжим рабом и раба с чюжим господиномъ на взыскание старцовъ онех: да аще кии от нихъ техъ старцов со златом и сьребромъ обрящутъ, и ничтоже скрыто или утаено от сихъ сотворят. Сице убо им урядившем и уже хотяху вскоре тещи[526] на взыскание инок техъ.

И абие[527] узревше нецыи юноши трех инокъ, несуще крестъ Господень, в злате устроен, и ковчегъ, в сребре сотворен, и въложи юношам темъ в сердце искони ненавистный Сатана восхитити от рукъ старчихъ богодарованное сокровище сие, и уже окаяннии коснутися хотящу, старцы же рекоша имъ: «Человецы, отидите, отнюду[528] же приидосте». Тогда же в той часъ узревше со онема сестрама Марфою и Мариею муромстии градожителие триех старцов, грядущих и несущих крестъ Господень, и возбраниша неистовству отрокъ онехъ, сами же устремишася на стретение честънаго креста, несомаго от старцов, да с честию великою приимут его.

Мнимии же старцы дошедше к сестрама и рекоша: «Марфо и Мария! Иже убо в видении от анггела данное вама злато и сребро, еже вдасте намъ во устроение креста Господня и ковчега ему, се по вере ваю[529], паче же повелением Божиимъ в том злате сей животворящий крестъ Господень сотворен, в сребре же ковчегъ кресту соделан. Прииместа си на спасение и на благоденствие, миру же всему на исцеление недугом и разрешение страстем и бесом на прогнание». Та же сродницы тою и вси пришедшии с нима на взыскание техъ инок вопросиша их: «Где убо, отцы святии, бысте и откуду приидосте семо?» Мнимии же иноцы рекоша: «Во Цареграде быхом». И паки вопросиша их: «Господие, колико время идосте от царьствующаго града, еже есть ис Костянтинополя?» Сим же рекшимъ: «Се убо третий есть час отнележе[530] изыдохом». Слышавше же сия, удивишася вси, тогда сущии ту, начаша молити их, да причастятца брашну от трапезы их. Отвещаша же им непщуемии[531] старцы: «Несмь бо ядущии, ниже пьющии[532], но убо вам благоволи Богъ в славу свою питатися от сихъ». И, се рекше, невидими быша от нихъ. Тогда убо познавше Марфа и Мария с сродники своими и со градоначалники, яко и тии, от Бога посланнии во образе инок, анггели суть. И воздаша хвалу Богу, творящему дивная и преславная чюдеса.

По сихъ же убо восхотевшима сестрама Марфе и Марии советъ сотворити и совопроситися со ужиками и с сродники своими о семъ, да где убо има поставить той святый животворящий крестъ Господень молитися: в дому ли си, или в церькве Господне. И бысть има видение от чюдотворнаго креста Господня во сне, глаголя: «Поставите мя во святилище Божии в церькви архистратига Михаила честнаго его Собора на погосте, иже есть вмале отстоящь от пути места сего, яко с поприще едино». Марфа же и Мария возрадовастеся о видении, яко не презре Господь желания ею. Тогда дошедше со тщанием церькви тоя и поставиша той святый и животворящий крестъ Господень в предиреченней церькви архистратига Михаила и прочих небесных сил бесплотных честнаго их Собора, иже бе во уезде града Мурома, яко двадесяти и пяти поприщъ[533] града не достигши, пребывание имея во Унжеском стану на реке Унже[534], идеже подает благодатию Христовою бесчисленная чюдеса и исцеления приходящимъ к нему с верою.

По сих же убо оныя благочестивыя две жене, Марфа и Мария, начасте к чюдотворному оному целбоносному[535] кресту притичюще[536]. И не сии убо едини, но и всего града Мурома всенародное множество с великою верою прибегая; паче же различными болезньми одержимии прикасахуся, вскоре исцеление приемлюще, благодаряще Бога, в домы своя отхождаху.

Прохождаше повсуду слава о немъ, любитъ бо таковая сих з дерзостию притицати и скорее крилатых обноситца, еже и до царьствующаго града Москвы самодержцем в слухи внидоша, и сердца техъ к честному оному кресту верою воспалистася и, з желаниемъ приемлюще сего, целоваху. Сего ради обыкоша и служители тоя церькви даже и доднесь по вся лета приносити того в царьствующий градъ Москву к державнымъ и в благочестии сияющим царемъ и святителемъ и всему православному християнству на освящение душамъ и на отгнание страстемъ и на исцеление телесемъ от различных недугъ.

Тем же мы, братие, возрадуемся о явлении креста Господня, днесь и веселуемся о обретении креста Христова, днесь Владычень крестъ от небесных вестникъ приносится, днесь бо крестъ не рукотворенный, но богосоделанный человекомъ даровася. Сего приятию, радующеся, празнуемъ. Сего обретению мы, веселящеся, торжествуемъ: днесь бо паче солнца многоразличными чюдесы в Муромстем граде осия и всю Рускую землю просвети, днесь святая церькви, аки гривною, златымъ крестом Господним украшается[537]. Людие же, с верою и любовию сего целующе, душами и телесы вкупе освящаются. Како убо мы, убозии, исполнени греха суще, возможем по достоинству кресту Господню похъвалу принести или похвалити? Но токъмо с верою и сердечною любовию вопити: «О великия креста силы, коликих благъ сподобихомся, яко от толикия мерзости и тьмы заблужения род человеческий призва, и от смерти на животъ возведе, и от тля на нетъление приведе! Не к тому бо очи мысленнии неведения мраком покрываютца, но креста ради светом разумнымъ просвещаются, сия креста ради исправления, сия нам креста ради дарования. Кое ли исцеление не креста ради содеяся? Креста бо ради благочествовати навыкохом[538] и благодать Духа Святаго прияти сподобихомся. Что убо креста честнейши, что же ли сего душам нашим полезнейши? Да не убо постыдимся, крестъ Господень именующе, но со всяцем дерзновением той исповедающе, имже и звани быхом во спасение и в вечную жизнь, еяже буди получити всем нам о Христе Исусе, Господе нашемъ, емуже слава со Отцем и с пресвятым благим и животворящим Духом ныне и присно и во веки веком. Аминь».

Комментарии.

Повесть написана в первой половине XVII в. в Муроме. В ней использован широко распространенный мотив средневековой литературы — перенесение или создание какой-либо святыни с Божественной помощью. Однако появление чудесного креста в соборе Архангела Михаила в Унженском погосте оказалось тесно связанным с сюжетом, посвященным судьбе двух сестер, происходящих родом из города Мурома. И непроизвольно на первый план повествования здесь выступили человеческие взаимоотношения, обусловленные бытом и нравами той эпохи. Благодаря вниманию автора к характеру поведения отдельных лиц в соответствующих обстоятельствах «Повесть о Марфе и Марии» — рассказ не о чуде, а скорее о психологии человеческих взаимоотношений.

Повесть известна в нескольких редакциях. См. об этом: Демкова Н. С. Повесть о Марфе и Марии (Сказание об Унженском кресте) и ее переделки в XVII веке // Демкова Н. С. Средневековая русская литература: Поэтика, интерпретации, источники. СПб., 1977. С. 103—121.

Текст издается по списку XVII в.: РНБ, собр. Погодина, № 1582, л. 55—66 об., опубликованному без предисловия и послесловия в книге «Русская повесть XVII века». Л., 1954. С. 48—53; исправления внесены по списку XVII в.: ГИМ, Синод, собр., № 850, опубликованному Н. С. Демковой в сб.: Источники по истории русского общественного сознания периода феодализма. Новосибирск, 1986. С. 201—208.