Брачыслаў радасць з сабой прынёс:
На руках — гайдануў высока.
Прабівае белагаловае хлапчанё
Галавой бярэмя аблокаў.
Аж да Сонца ляціць! Зачапіўся нагой
За штыкеціну Перуновага плота.
Віцьба ўнізе кальчугаю дарагой
Са сваім рукавом — Палотай
Блішчыць на сонцы... Такі прастор!
Хлебам і мёдам прапахлі нівы.
Над Полацкім краем рукі прасцёр
Хлопчык: «Будзеш шчаслівым!»
Ды толькі нікому час не дае
Свой лёс прачытаць, як у кнізе.
Не бачыць і ён, як кроў праліе
Братоў сваіх на Нямізе,
Як будзе, насунуўшы нізка шалом,
Сяброў сваіх косці пляжыць...
Смяецца бацька.
Падставіў далонь:
«Здароў будзі, княжыч!»