Прайшлі ўжо, кажуць мне, твае гады,
Каб бачыць свет скрозь шкельцаў каляровасць
I верыць шчыра, што і сапраўды
Ён сам такі, яго не шкельцы робяць.
Прайшлі ўжо, кажуць мне, твае гады,
Каб бегаць па расе вясновым раннем,
I верыць шчыра, што і сапраўды
Гавораць між сабой зямля і травы.
Прайшлі ўжо, кажуць мне, твае гады,
Каб ад людзей нічога не утойваць
I верыць шчыра, што і сапраўды
На дабрату адкажуць дабратою.
Твае парады чую, Дабрабыт,
У нормы, лічбы, правілы ўрастаю.
А ўсё ж начамі бачу ў сне, нібы
Над каляровым поплавам лятаю...