Рарк

На зямлю маскараднае золата скiнулi клёны.

На зiму зачынiлiся атракцыёны.

Штучны рай скончыў працу. Маляр прапакосцiў арэлi.

У Кiтай чарнагрудыя сiтаўкi пераляцелi.

Састаўны самалёт разабралi мужчыны.

Да вясны карусельшчык узяў адпачынак,

На ланцуг пасадзiў аглядальнае кола.

Галоўбух налiчыў адпускныя i холад.

Уцякла мiтусня. Засталiся туманы.

Да цяпла абязводзiў сантэхнiк фантаны.

На вадзе плаваў лёдзiк блакiтны i тонкi.

Дзе-нiдзе засталiся на клумбах рамонкi.

Нагадаў iнжынер адключыць асвятленне,

Загадаў паздымаць карусельных аленяў.

Пад замкi прадаўшчыцы паставiлi цiры.

Медзякi ды бiлеты надзейна схавалi касiры.

Тонкi дрот павуцiння аздобiў дашчаныя касы.

На завод павярталiся бочкi з-пад хлебнага квасу.

Гаражы ненадзейны метал ратаваць узялiся.

На дажджы папяровыя шклянкi па шве разышлiся.

За сезон аблупiлася фарба рэкламнай афiшы.

Белы сон пра сваё красаванне паклiкалi вiшнi.

Ссох, завяў каля плота высокi дзядоўнiк.

Спiлаваў i спалiў нежывыя галiны садоўнiк.

У агнi спакваля жалуды спапялелi.

Цiшынi дачакалiся ўрэшце алеi.