Рарк

Зачапiлася хмара за комiны над хлебазаводам.

На рамбазе звiнела, заходзiлася цыркулярка.

Уздымаўся да неба драўляна-бурштынавы водар.

За касiлкаю сыпала трэск электрычная зварка.

Закусiўшы губу, вартаўнiк пэцкаў плот салiдолам,

Праклiнаючы ў думках лядачых чарцей-падшыванцаў.

На яго не звяртала увагi сярэдняя школа,

Адпусцiўшы дадому маленькiя крылы цыратавых ранцаў.

Пад дажджом, разгружаючы моўчкi машыну з прычэпам,

Мужыкi пад паветку складалi мяхi з угнаеннем.

Учарнелае лiсце спрачалася з ботамi шэптам.

Пахла вулiца хлебам i восенню да ачмурэння.