Запрашэнне да роздуму

Да піхт,

кіпарысаў і кедраў,

Што высяцца ў парку старым,

За тысячы аж кіламетраў

Прывёз хтось

бярозкі дзве ў Крым.

Не важна,

з якое нагоды,—

Сябрам партызанскім зарок,

Юнацкі інстынкт лесавода,

Паэта няўрымслівы крок.

Я ўдзячны яму за іх росквіт,

Таму што яны з тых часоў

Прывабным паркалем бяросты

I шоўкам даўгіх валасоў

Сябрам навяваюць у скрусе

Знаёмыя змалку да слёз

Гаі беластволых бяроз

Татарыі ды Беларусі.

Краёў дарагіх, запаветных,

Дзе грэшны пабачыў ты свет,

Заслонава мужны разведчык

I шчыры татарскі паэт.