Yeddi gözəl

Taxtı qəsb edənə yetişdi xəbər

Ki, açmış ağzını bir cavan əjdər.

Göy yerə enməyə göstərməkdə meyl.

Başını qaldırmış Yəməndən Süheyl[134].

Açmış pəncəsini o cavan aslan

Eləsin düşməni qanına qəltan.

Taxta çıxıb tacı əlinə alsın,

Yatsın fitnə tozu, tamam yoxalsın.

Şahın sarayına ölkə rəhbəri:

Möbidlər, ordunun sərkərdələri

Toplanıb rəy üçün hey yığın-yığın,

Kəsdilər kökünü dikbaşlılığın.[135]

Nəhayət o məclis yetdi əncama,

Dedilər ki, məktub yazaq Bəhrama.

Hərə bir söz dedi, söhbət açdılar,

Qabıqlı-qabıqlı toxum saçdılar.

Verdi sözlərinə katib min sığal,

Açdı bu məktubda uzun şərhi-hal.

Məktubu bükdülər, iş başa gəldi,

Elçilər kaqızla yola düzəldi.

Elə ki, yetişib endilər atdan,

Yeni şaha salam göndərdi dövran.

Şahın xadimləri alıb da rüsxət,

Etdilər onlara olmazın hörmət.

Bəhram hüzuruna icazə verdi,

Dərban bu uğurda xəbər gətirdi.

Min qorxuyla gəlib şah hüzuruna,

Səcdəyə düşərək etdilər səna.

Ən ağıllı qasid irəli getdi,

Məktubu öpərək, o təqdim etdi.

Katib möhrü qırıb açdı kağızı,

Oxundu padşaha yazılan yazı:

Məktubun başlanğıç sözü bismillah,

Ağzına fəzliylə rəhbərdir Allah.

Göydə də, yerdə də pərvərdigardır,

Yoxluq dedikləri onunla vardır.

Aləmdən başlayıb canlı nə ki var,

O yüksək fələklər, bu uca dağlar

Səxa nəqqaşından almışlar surət,

Bütün varlıqlara o vermiş qüvvət.

Heç bir şeydə onun təmənnası yox,

Dəhrin ondan başqa bir xudası yox.

Açdığı düyünlə həyat qurulmuş,

Adına sitayiş möhrü vurulmuş.

Onun hökmündədir zəminlə zaman,

Onu da, bunu da odur saxlayan.

Belə tərif yazıb uca Allaha,

Salamlar yollayır sonra da şaha,

Yazır ki: "Ey başı uca dünyada!

Həmi şövkətli şah, həmi şahzada!

Kişilik, insanlıq yağan işindən,

Kəsranın adını daşıyıram mən,

Cəsarətdən salmaz, bil, xamlar məni,

Gücum var, görməyib dünya xar məni.

Bəyənmiş adımı sonsuz kainat,

Nəvaziş göstərir bəxtim hər saat.

Tacım, hünərim var mənim cahanda,

Hünərsizlər handa, səltənət handa!

Hünərli dünyada taxtü-tac alar,

Alçalmaz heç zaman başı ucalar.

Şah olsam da əgər bütün yerə mən,

İnsan övladına, mələklərə mən,

Könül sanma bundan çox razı haldır,

Şahlıq dedikləri zəhərli baldır.

Mülküm, malım vardı, hökmüm rəvandı,

Bu üzdən hər zaman bəxtim cavandı.

Belə qalsa idim uzaqdım şərdən,

Ucalıq deyildir xali xətərdən.

Neyləyim ki, məni bu əhli-İran

Güclə dilə tutdu, etdi hökmüran.

"Gəl, şah ol" dedilər, etdilər vadar

Ki, taxta əyləşim, olum tacidar.

O gündən ölkəyə mən həyan oldum,

Buna şahlıq demə, pasiban oldum.

Bu məsəl gözəldir, aydın əyandır:

"Dünyanı sevənlə arzu düşmandırı.

Belə bir aləmdən yox səndə xəbər,

Səni cəlb eyləyir başqa aləmlər.

Sənə gur kababı xoş gələr, əlbət,

Nəyinə gərəkdir dadsız əzəmət.

Bir rud çalğısıyla içilən meyin

Zövqünü verərmi bu dünya, deyin?

Keçir ovda, keyfdə günlərin belə,

Başını ağrıtma dünya işiylə.

Sənindir dünyanın eyşi, işrəti,

Çünki çəkməyirsən ölkə xiffəti.

Ovda gün sürürsən, içir, yatırsan,

Gecəli-gündüzlü kama çatırsan.

Mənsə dərd çəkirəm, daim dalıram,

Xalqın qayğısına hər an qalıram.

Gah olur dost qəmi çəkmək sənətim,

Gah olur yağıdan qorxmaq qismətim.

Tac uğrunda qılınc qaldırıb sənə

Vuruşmaq ən kiçik bir dərddir mənə.

Xoşbəxtsən, həyatın keçir firavan,

Uzaqdır fitnələr, fellər başından,

Olaydı sənətim o peşə, ey kaş,

Asudə olardı o zaman bu baş.

Keçərdi dövranım işrət içində,

Şərabla, çalğıyla, ülfət içində.

Demirəm şahlıqdan biliyin yoxdur,

Dünyadan, dövlətdən xəbərin çoxdur.

Sənsən bu ölkəyə həqiqi varis,

Şahdan bu məmləkət sənə qalmış irs.

Xam iş gördü atan, neyləyim ancaq,

Tacın kölgəsindən sən oldun uzaq.

Onun hər əməli əziyyət oldu,

Xalqın elədiyi şikayət oldu.

El onun zülmundən heyrətdə qaldı,

Bu üzdən zülümkar adını aldı.

Qəzəblənib tökmüş məmləkətdə qan,

Gah azğın olmuşdur, gah da qudurğan.

Kimsə bu toxuma afərin deyə,

İnan, səpməyəcək bizi zəmiyə,

Kimsə istəməyib tacidar səni;

Yaxşıdır, tərk eylə, gəl, bu qayəni

Oda rast gələrsən coşsan, əgər sən,

Çalışsan, soyuq bir dəmir döyərsən.

Ehtiyacın varsa açıb xəznəni,

Qızıldan eyləyim, gəl, təmin səni.

Özünə bab şeyi xərcləsən əgər,

Daha faydalıdır, hər şeyə dəyər".