І радасць i боль

Мяне выхоўвалі,

Мяне захоўвалі,

Я то з'яўляўся,

То знікаў,

Мяне вадзілі

I ахоўвалі,

Хоць я нікуды

Не ўцякаў.

I пад замкамі,

I пад пломбамі,

Нібы каштоўнасць,

Бераглі

I неба клеткамі

I ромбамі

Разлінавалі

Як маглі.

Мяне узважвалі

I мералі,

Здымалі ў профіль

I анфас,

Але ні разу

Не праверылі

Душы наяўнасць

I запас.

Шкада,

Што не здымаюць копію

З яе юрысты

I ўрачы,

I нi адна дактыласкопія

Не можа

Тут дапамагчы.

Мая душа

Супраціўлялася,

Бо верыла i тым жыла,

Не чэрсцвела

I не ламалася —

Была такою, як была.

Хоць дзіўна,

Ў чым яна трымалася,

А паспрабуй

Яе сагні!

Яна ж з маленства

Гартавалася

На чыстым,

Праведным aгнi.

1964