Sonetler

15

Hər şey yetkinliklə qazanır zəfər,

Onu da tez alır hökmü rüzgarın.

Dünya bir səhnədir, burda şəkillər

Dəyişir sehriylə kəhkəşanların.

İnsan taleyilə bir ota bənzər,

Ot kimi göyərər, məhv olar hökmən.

Bahar gəlişiylə hüsnünü bəzər,

Payız şuxluğunu alar əlindən.

Belədir, dəyişir həyat həmişə,

Bu, daha şəfəqli edir üzünü:

Zaman ölüm ilə girib sazişə,

Çevirir gecəyə al gündüzünü.

Qəm yemə, qələmim bağ tiyəsi tək

Ömrünü şerimlə peyvənd edəcək.