Sonetler

25

Xoşbəxt ulduz altda kim ki doğulub,

Qoy hər vaxt öyünsün şan — şöhrətiylə.

Mənimsə qismətim məhəbbət olub,

Məst edir könlümü səadətiylə.

Şahın əyanları içdikcə şəfqət,

Günəbaxan kimi açar hər yanda.

Azalsa günəşdə atəş, hərarət,

Solar yavaş-yavaş günəbaxan da.

Qalib bir sərkərdə — döyüş övladı

Birdən məğlub olsa vuruşda əgər,

Şöhrət kitabından silinər adı,

Bütün qazandığı əlindən gedər.

Məni bu dəhşətdən kənar edib bəxt,

Sevib sevilirəm, xoşbəxtəm hər vaxt.