Sonetler

64

Öz ağır əlini çəkib varlığa,

Dövrün zinətini məhv edir zaman;

Uça qalaları qatır torpağa,

Dağılır min illik neçə xaniman.

Yeriyib sahili tutur ümman da,

Torpaq da zəbt edir göy dənizləri.

Döyüşlər, vuruşlar gedir hər yanda,

Biri itirsə də, qazanır biri.

Baxıram aləmin dəyişməsinə,

Görürəm həyatın aqibətini.

Sanki solan hər gül söyləyir mənə:

Zaman bir gün alar məhəbbətini.

Bu dərddən göynəyir köksümdə ürək,

Ölümdən ağırdır səni itirmək.