За гаманлівасць звонкіх завушніц,
За пыху каляровае сукенкі
Плачу святлом, што пакідае зрэнкі...
Але і мілых мне шкада дурніц,
Што лашчацца да шыі, да плячэй
I цешацца надзеяй шчабятлівай
Зрабіць мяне прыгожай і шчаслівай...
Прыгожай, праўда, толькі для вачэй!
Я іх люблю. Крыўдлівым галаскам
Адказваю маўчаннем і тугою.
Ды за святлом дарогаю другою
Спяшаюся. У ім — мой скарб і скам.
Усё ж падчас адчайна я крычу:
«Ці мне спазнаць гармонію рамонкі,
Калі нямеюць вусны без гамонкі
I без пяшчоты холадна плячу?!»