Je, François Villon

Je cognois bien mouches en let,

Je cognois a la robe l’omme,

Je cognois le beau temps du let,

Je cognois au pommier la pomme,

Je cognois l’arbre a voir la gomme,

Je cognois quant tout est de mesmes

Je cognois qui besoigne ou chome,

Je cognois tout fors que moy mesmes.

Je cognois pourpoint au colet,

Je cognois le moyne a la gonne,

Je cognois le maistre au varlet,

Je cognois au voile la nonne,

Je cognois quant parleur jargonne,

Je cognois folz nourriz de cresme,

Je cognois le vin a la tonne,

Je cognois tout fors que moy mesmes.

Je cognois cheval et mulet,

Je cognois leur charge et leur somme,

Je cognois Bietrix et Belet,

Je cognois gect qui nombre assomme,

Je cognois visïon et somme,

Je cognois la faulte des Boesmes,

Je cognois le pouvoir de Romme,

Je cognois tout fors que moy mesmes.

Prince, je cognois tout en somme.

Je cognois colorez et blesmes,

Je cognois Mort qui tout assomme :

Je cognois tout fors que moy mesmes.