I чую я голас...: выбраныя вершы, 1954-2008

Гасподзь! Чаму й завошта

Ты мне даеш «адстаўку»

І так караеш жорстка —

На дзён маіх астатку?

Чаму мне не даеш ты

Патрэбнай сілы-моцы,

Каб выбавіць дарэшты

Душу з грызот бясконцых?

Чаму дазволіў д'яблу,

Замест дабра з любоўю,

Нянавісць i няпраўду

Прыставіць к узгалоўю?

Чаму ў такім рэжыме

Ты гоніш дні i ночы?

Як жыць, як жыць, скажы мне,

Пад грузам гэткай ношы?

Як жыць, калі наўкола,

Куды ні кінь вачыма, —

Як наркаман на ўколах,

Трымаецца Айчына.

1997, снежань