Каханне [Кніга лірыкі]

Шукаюць вёску Стэфанова

аблокі сорак два гады...

Дзядок з касой сядзеў на дровах,

стаяла цётка ля грады.

Хлапчук выцягваў з пальца стрэмку

над дошкай з гэблікам карпеў...

Дзяліла маці дзецям семкі

і бурачынне несла ў хлеў.

Пад плот адцягвала балею

бабуля — светлае чало...

Да хат зіхоткаю лілеяй

з усходу сонейка плыло...

Прымрою вёску Стэфанова,

хоць не была ў ёй да вайны...

Бур'ян глухі шуміць за ровам,

там сховы ладзяць кажаны.