Каханне [Кніга лірыкі]

Не абяцаюць, калі ўсё — цацанка.

Таксама я... Што даць табе магла?

Шчыруе ў днях гарэзлівых каханка,

а я табе каханаю была.

Няхай мне доля мужнасць выкладае,

жанчыне слёзы дадаюць гадоў...

Стаю на раздарожжы маладая,

а ў маладое — шмат заўжды шляхоў.

Пражытае на дне вачэй хаваю,

жыву з цяпельца даўняга святла...

Забытая! Няхай. Затое знаю,

што я табе каханаю была.