Английская поэзия XIV–XX веков в современных русских переводах

Of my lady well me rejoise I may!

Hir golden forheed is full narw and smal;

Hir browes been lik to dim, reed coral;

And as the jeet hir yen glistren ay.

Of my lady, etc.

Hir bowgy cheekes been as softe as clay,

With large jowes and substancial.

Of my lady, etc.

Hir nose a pentice is that it ne shal

Reine in hir mouth thogh she uprightes lay.

Of my lady, etc.

Hir mouth is nothing scant with lippes gray;

Hir chin unnethe may be seen at al.

Hir comly body shape as a footbal,

And she singeth full like a papejay.

Of my lady, etc.

Wel may I pleyne on yow, lady moneye,

þat in the prison of your sharp scantnesse

Souffren me bathe in wo and heuynesse

And deynen nat of socour me pourueye.

Whan þat I baar of your prison the keye

Kepte I yow streite? Nay, God to witnesse,

Wel may I pleyne, etc.

I leet yow out. O, now of your noblesse

Seeth vnto me, in your deffaute I deye.

Wel may I pleyne, etc.

Yee saillen al to fer. Retourne, I preye,

Conforteth me ageyn this Christemesse.

Elles I moot in right a feynt gladnesse

Synge of yow thus and yow accuse and seye,

Wel may I pleyne, etc.

Hoccleue, I wole it to thee knowen be,

I, lady moneie, of the world goddesse,

þat haue al thyng vndir my buxumnesse,

Nat sette by thy pleynte risshes three.

Myn hy might haddest thow in no cheertee

Whyle I was in thy slipir sikirnesse.

Hoccleue, I wole it, etc.

At instance of thyn excessif largesse

Becam I of my body delauee

Hoccleue, I wole it, etc.

And syn þat lordes grete obeien me,

Sholde I me dreede of thy poore symplenesse?

Go, poore wrecche. Who settith aght by thee?

Hoccleue, I wole it, etc.